Eze 15 | KaaIBT22L | STEP | Maǵan Jaratqan Iyeden sóz tústi:

‏ Ezekiel 15

Jaramsız aǵash

1 Maǵan Jaratqan Iyeden sóz tústi:

2 – Insan ulı! Júzim aǵashınıń, basqa barlıq tereklerden yamasa júzim shaqasınıń toǵaydaǵı basqa aǵashlardıń shaqasınan artıqmashlıǵı bar ma? 3 Júzim shaqasınan bir nárse islewge bola ma? Hesh bolmasa, bir nárseni ilip qoyıw ushın ilgish soǵa ala ma? 4 Yaq, ol tek otın qılıwǵa jaraydı. Ot onıń eki ushın jandırıp, ortasın kúydirip jibergennen keyin, ol dártke asa ma? 5 Janbaǵan shaqa jaramsız bolǵannan keyin, otqa janıp kúyip ketkennen keyin, qalay iske jaraydı? 6 Sonlıqtan Quday Iye bılay deydi: Toǵaydaǵı terekler arasındaǵı júzim aǵashı kibi, Erusalim turǵınların da otqa taslayman. 7 Olarǵa qarsı shıǵaman. Bir ottan qashıp qutılsa, ekinshisi jalmaydı. Júzimdi olarǵa qarsı qaratqanımda, Meniń Jaratqan Iye ekenimdi bilip alasız. 8 Xalqım Maǵan qıyanet qılǵanı ushın, bul jerdi qańıraǵan shólge aylandıraman, – deydi Quday Iye.