‏ Ezekiel 16

Biyopa Erusalim

1Maǵan Jaratqan Iyeden sóz tústi:

2– Insan ulı! Erusalimniń barlıq jerkenishli islerin áshkaralap, 3Quday Iye bılay deydi dep ayt: «Seniń ata tegiń hám seniń tuwılǵan jeriń Qanan, ákeń amor xalqınan, anań xet xalqınan. 4Tuwılǵanıńda seniń kindigiń kesilmedi, tazalap shomıldırılmadıń, duzǵa salınbadıń, jórgekke de oralmadıń. 5Hesh kim ayap, saǵan bulardan birewin islemedi, miyrim kórsetpedi. Qaytama, dúnyaǵa kelgen kúni-aq, sen jek kórilip, dalaǵa ılaqtırıp taslandıń. 6Qaptalıńnan ótip baratırıp, Men seniń qanıńa bılǵanıp jatırǵanıńdı kórip qaldım, saǵan: „Jasa!“– dedim. Men saǵan: „Jasa!“– dep ayttım. 7Men seni daladaǵı ósimlik kibi ósirdim. Sen ósip kámalǵa jettiń, ayrıqsha gózzallıqqa bólendiń, kókiregiń tolısıp, shashlarıń ósti. Biraq sen tırday jalańash ediń. 8Men jáne qasıńnan óttim hám saǵan ser saldım, sen muhabbatqa tayar ediń. Etegimdi jalańash deneńe jawıp, onı qımtadım. Ant iship, seniń menen neke kelisimin dúzdim hám sen Meniki boldıń, – deydi Quday Iye.

9Seni shomıldırıp, qannan tazaladım hám deneńe záytún mayın jaqtım. 10Ústińe naǵıslı kóylek, ayaǵıńa jumsaq teriden ayaq kiyim kiygizip, basıńa hasıl zıǵır oraypek oradım hám jipekten kiyimler kiygizdim. 11Seni bezendirdim, qollarıńa bilezik, moynıńa monshaq taqtım. 12Murnıńa árebek, qulaqlarıńa sırǵa taǵıp, basıńa ájayıp taj kiygizdim. 13Sen altın hám gúmiske bólendiń. Hasıl zıǵır hám jipekten tigilgen naǵıslı kiyimler kiydiń. Sapalı biyday unınan jabılǵan nan, pal hám záytún mayı menen awqatlandıń. Sen asa sulıw bolıp, xansha dárejesine jettiń. 14Sulıwlıǵıń milletler arasında dańq tarattı, Meniń saǵan bergen ullılıǵım sebepli, gózzallıǵıń minsiz edi, – deydi Quday Iye.

15Sen bolsań, gózzallıǵıńa isendiń, dańqıńnan paydalanıp, buzıqshılıq islediń. Ótken-ketkenge kewil qoyıp, gózzallıǵıńdı olarǵa berdiń. 16Kiyimlerińnen birazı menen sıyınıw orınların bezediń hám sol jerde buzıqshılıq qıldıń. Bunday nárse burın bolmaǵan, endi de bolmaydı. 17Men bergen altın hám gúmis taǵınshaqlardan erkek butlardıń músinin islettiń hám olar menen buzıqshılıq qıldıń. 18Naǵıslı kiyimlerdi olardıń ústine jawıp, Men bergen záytún mayın hám xosh iyisli tútetkini olardıń aldına qoydıń. 19Meniń nanımdı, Men saǵan bergen sapalı biyday unın, záytún mayın hám paldı xosh iyisli sıy retinde olardıń aldına qoydıń. Awa, solay islediń, – deydi Quday Iye.

20Hátte, Maǵan tuwıp bergen ullarıńdı hám qızlarıńdı olarǵa jem qılıp, qurbanlıqqa berdiń. Buzıqshılıq qılǵanıń az bolǵanday, 21sen Meniń balalarımdı shalıp, otta jaǵıp, olarǵa berdiń. 22Usı jerkenishli islerdi hám buzıqshılıqlardı islegenińde, ózińniń tırday jalańash bolıp, qanıńa bılǵanıp jatırǵan kúnińdi, jaslıǵıńdı eslemediń.

23Sorıń qurısın, sorıń qurısın! – deydi Quday Iye. – Islegen barlıq jawızlıqlarıńa qosa, 24sen hár bir ashıq maydanda ózińe shatır hám sıyınıw ornın qurdıń. 25Hár bir kósheniń basına sıyınıw ornın qurıp, gózzallıǵıńdı ayaq astı qıldıń. Ótken-ketkenge satanıńdı ashıp, buzıqshılıq ústine buzıqshılıq qıldıń. 26Jınısıy aǵzası iri bolǵan qońsılarıń mısırlılar menen buzıqshılıq islediń. Buzıqshılıq ústine buzıqshılıq qılıp, Meniń qáhárimdi keltirdiń. 27Mine, Men saǵan qarsı qolımdı kóterip, ırısqıńdı kemeyttim. Seni dushpanıń filistli qızlardıń qolına berdim. Hátte, seniń uyatsız qılıqlarıńnan olardıń da júzi qızarǵan. 28Sen assiriyalılar menen de buzıqshılıq islediń, toymadıń. Olar menen buzıqshılıq islediń, qanaatlanbadıń. 29Sawdagerlerdiń jeri bolǵan kaldeylerdiń jerine deyin buzıqshılıǵıńdı arttırdıń, biraq bunıń menen de qanaatlanbadıń.

30Júregiń qanday buzıq! – deydi Quday Iye. – Bulardıń hámmesin, júwensiz jezókshedey júzege asırdıń. 31Hár kósheniń basına shatır qurıp, hár bir maydanǵa sıyınıw ornın salǵanıńda, sen jezóksheden parıq qıldıń, sebebi tólemnen júz burdıń. 32Sen biyopa hayalsań. Óz kúyewińnen góre, basqa erkeklerdi abzal kórdiń. 33Hámme buzıqlar sıy aladı, al sen óziń oynaslarıńa sıylar berdiń. Hár jaqtan kelip, seniń menen jatıwı ushın, olardı satıp aldıń. 34Sen basqa buzıqlardan ózgesheseń. Hesh kim seni buzıqshılıq qılıwǵa iytermelemegen, saǵan hesh kim haqı tólemegen, sen óziń olarǵa haqı tólegenseń. Sonıń ushın sen basqalarǵa uqsamaǵansań.

35Sonlıqtan, jezókshe, Jaratqan Iyeniń sózin tıńla! 36Quday Iye bılay deydi: Seniń betsizligiń áshkara boldı, oynaslarıń menen buzıqshılıq qılǵanıńda, jalańashlıǵıń ashılıp qaldı, barlıq jerkenishli butlarıńa tabınıp, balalarıńdı olarǵa qurbanlıqqa berdiń. 37Bular ushın káypi-sapa qurǵan barlıq oynaslarıńdı, barlıq súyiklilerińdi, olar menen birge sen jerkengenlerdi hámme jaqtan bir jerge toplayman. Seni tırday jalańash qılıp, olardıń aldına shıǵarıp qoyaman. Olar seniń tolıq jalańash deneńdi kóredi. 38Neke hadallıǵın buzǵan hám qan tókken hayallarǵa beriletuǵın jazanı saǵan beremen. Ǵázebim hám qızǵanıshım menen seniń qanıńdı aǵızaman. 39Seni oynaslarıńnıń qolına tapsıraman, olar seniń shatırıńdı jıǵıp, sıyınıw orınlarıńdı buzıp taslaydı. Ústińdegi kiyimlerińdi hám taǵınshaqlarıńdı tartıp alıp, seni tırday jalańash qaldıradı. 40Olar saǵan qarsı alamandı toplaydı, seni tas boran qılıp óltirip, deneńdi qılısh penen tilkimleydi. 41Úyińdi órtep, kóplegen hayallardıń kóz aldında seni húkim qıladı. Solay etip, buzıqshılıǵıńa shek qoyaman, artıq oynaslarıńa haqı tólemeyseń. 42Sonda saǵan degen ǵázebimnen túsip, qáhárden qaytaman. Tınıshlanaman hám basqa ǵázeplenbeymen. 43Sen jaslıq kúnlerińdi eske almadıń. Qılmıs islep, Meni ǵázeplendirgeniń ushın, usı qılmıslarıńa jarasa jaza beremen, – deydi Quday Iye. – Barlıq jerkenishli islerińniń ústine bul uyatsız qılıqlardı da qospadıń ba?

44Naqıl menen sóyleytuǵınlar sen tuwralı: „Anası qanday bolsa, qızı da sonday“, – dep aytadı. 45Sen kúyewinen hám perzentinen waz keshken anańa júdá uqsaysań. Sen kúyewinen hám perzentlerinen waz keshken apa-sińlilerińniń óziseń. Seniń anań xet xalqınan, ákeń amor xalqınan. 46Ájapań – qızları menen arqa tárepińde jasaǵan Samariya, al sińliń – qızları menen seniń qubla tárepińde jasaǵan Sodom. 47Sen olardıń jollarınan júrip, jerkenishli islerine eliklep ǵana qoymay, óz jollarıńda olardan tez ozıp kettiń. 48Men, Quday Iye, tiriligim haqı ant iship aytaman: sińliń Sodom da óz qızları menen sen hám seniń qızlarıń islegen jawızlıqlarıńdı islemedi. 49Sińliń Sodomnıń ayıbı mınaw edi: ol hám onıń qızları menmen, toq, biypárwa edi. Olar kámbaǵal hám jarlılarǵa járdem bermedi. 50Olar tákabbir edi hám Meniń aldımda jerkenishli islerdi isledi. Men bunı kórip, olardı joq qıldım. 51Samariya da sen islegen gúnalardıń yarımın da islegen joq. Sen jerkenishli islerdi islewde olardan asıp tústiń. Sen islegen islerge salıstırǵanda, apa-sińlileriń haq bolıp kórinedi. 52Endi shermendeligińdi kóter. Sen apa-sińlilerińniń jazasın jeńillestirdiń. Sen olardan da beter jerkenishli gúnalardı islep, olardı ózińnen gúnasızıraq qılıp kórsettiń. Uyattan qızarıp, shermendeligińdi kóter. Sebebi sen apa-sińlilerińdi gúnasız qılıp kórsettiń.

53Biraq Sodomnıń hám onıń qızlarınıń, Samariyanıń hám onıń qızlarınıń, olar menen birge seniń de abadanshılıǵıńdı qaytaraman. 54Sonda sen islegen isleriń ushın uyatqa qalıp, shermende bolasań. Bunı kórip apa-sińlileriń ózleriniń awhalına shúkirlik qıladı. 55Apa-sińlileriń Sodom hám Samariya óz qızları menen burınǵı awhalına qaytadı. Sen de óz qızlarıń menen birge burınǵı awhalıńa qaytasań. 56Tákabbir waqtıńda sińliń Sodomdı mazaq qılatuǵın ediń. 57Endi bolsa, seniń jawızlıǵıń ashılıp qaldı. Sen Aram qızları hám onıń barlıq qońsılarına, filistli qızlarǵa hám átiraptaǵı seni jek kóretuǵın barlıq xalıqlarǵa masqara bolasań. 58Uyatsız qılıqlarıń hám jerkenishli isleriń ushın jazańdı tartıwıń shárt, – deydi Jaratqan Iye.

59Quday Iye bılay deydi: Men saǵan ılayıqlı jazańdı beremen. Sen Meniń kelisimimdi buzıp, antqa nemquraydı qaradıń. 60Degen menen, jaslıq shaǵıńda seniń menen dúzgen kelisimimdi yadqa alıp, seniń menen máńgilik kelisim dúzemen. 61Ájapańdı hám sińlińdi qabıl qılǵanıńda, óz jolıńdı esińe alıp, uyalasań. Men olardı saǵan qız qılıp beremen. Biraq bul seniń menen dúzetuǵın kelisimime kirmeydi. 62Men seniń menen kelisimimdi qayta tikleymen. Sonda sen Meniń Jaratqan Iye ekenimdi bilip alasań. 63Men seni barlıq gúnalarıńnan páklegenimde, sen olardı eske alatuǵın, uyalıp, awzıńdı da ashpaytuǵın bolasań, – deydi Quday Iye».