‏ Ezekiel 17

Eki búrkit hám júzim aǵashı haqqında tımsal

1Maǵan Jaratqan Iyeden sóz tústi:

2– Insan ulı! Izrail xalqına jumbaqlap tımsal aytıp ber. 3Olarǵa ayt: «Quday Iye bılay deydi: Úlken qanatlı, uzın párli, mamıq, ala-shubar bir aybatlı búrkit Lebanonǵa ushıp kelip, kedr aǵashınıń tóbesin búrip, 4eń joqarǵı shaqasın julıp aldı. Onı sawdagerlerdiń eline alıp barıp, alıp satarlardıń qalasına otırǵızdı. 5Keyin úlkeniń tuqımınan alıp, ónimdar topıraqqa ekti. Onı mol suwlar boyına, tal sıyaqlı otırǵızdı. 6Ol ósip, shaqaları jayılǵan, kelte boylı júzim aǵashına aylandı. Onıń shaqaları búrkitke qaray iyildi, tamırı óz ornında qaldı. Solay etip, ol shaqalaǵan, qoyıw japıraqlı aǵash bolıp ósti.

7Biraq úlken qanatlı, mamıq párli basqa bir búrkit te bar edi. Júzim aǵashı suw izlep, otırǵızılǵan ornınan tamırın oǵan qaray burdı hám shaqaların oǵan sozdı. 8Júzim aǵashı shaqalap, miywe berip, sawlatlı bolatuǵınday, mol suwlar boyına, ónimdar topıraqqa egilgen edi».

9– Olarǵa ayt: «Quday Iye bılay deydi: Endi bul júzim aǵashı ǵawlap óse me eken? Birinshi búrkit onı tamırı menen suwırıp, solqımların julıp, solıtıp taslamay ma? Onıń tazadan ósken shaqaları quwrap qaladı. Aǵashtı tamırı menen suwırıp alıw ushın, úlken kúsh yaki kóp sanlı láshker kerek bolmaydı. 10Ol kóshirip egilse de, ǵawlap óse me eken? Shıǵıs samalı eskende, quwrap qalmay ma? Aǵash ósken qarıǵında-aq solıp qaladı».

11Maǵan Jaratqan Iyeden sóz tústi:

12– Qozǵalańshı xalıqqa: «Bulardıń mánisin bilmeysiz be?» – dep ayt. Olarǵa bılay dep ayt: «Mine, Babiloniya patshası Erusalimge kelip, onıń patshasın hám hámeldarların Babilonǵa alıp ketti. 13Ol patsha áwladınan birewin tańlap, onıń menen pitim dúzdi hám ant ishtirip pitimdi bekitti. Ol eldegi barlıq basshılardı tutqın etip alıp ketti. 14Patshalıqtıń boysınıwshań bolıwı, kóterilis qılmawı hám pitim saqlanıp qalıp, bekkem bolıwı ushın ol usılay isledi. 15Biraq taza qoyılǵan patsha atlar menen adamlar beriwin sorap, Mısırǵa elshilerin jiberdi hám usı isi arqalı Babilonǵa qarsı shıqtı. Bul adam tabısqa erise alar ma eken? Bunı islegen adam aman qalar ma eken? Ol pitimdi buzdı, endi aman qala ma? 16Men, Quday Iye tiriligim haqı ant ishemen: ishken antınan qaytıp, dúzgen pitimin buzǵanı ushın, ol ózin patsha etip taxtqa otırǵızǵan patshanıń mákanında, Babilonda óledi. 17Babiloniya patshası kóplerdiń janın alıw ushın, diywalǵa topıraq úygende hám qamal minaraların qurǵanda, ullı kúshi hám sansız xalqı bolsa da, faraon bul urısta járdem bermeydi. 18Ol dúzgen pitimin buzdı, ishken antınan taydı. Ol qol berisken bolsa da, bul islerdi qıldı. Endi ol qashıp qutıla almaydı.

19Sonlıqtan Quday Iye bılay deydi: Óz tiriligim haqı ant ishemen: Meniń aldımda ishilgen antqa nemquraydı qaraǵanı hám Meniń aldımda dúzilgen pitimdi buzǵanı ushın, ondaǵı barlıq náletlerdi onıń basına salaman. 20Men oǵan tor taslayman, ol Meniń duzaǵıma túsedi. Onı Babilonǵa alıp barıp, Maǵan qarsı islegen opasızlıǵı ushın húkim shıǵaraman. 21Onıń qashıp baratırǵan áskerleri qılıshtan qaza tabadı, al qalǵanları samalǵa suwırıladı. Sonda bul sózlerdi aytqan Men – Jaratqan Iye ekenimdi bilip alasız.

22Quday Iye bılay deydi: Kedr aǵashınıń usha basınan bir shaqanı alıp otırǵızaman. Tóbesindegi shaqasınan bir jas shıbıq alıp, onı úlken hám bálent tawdıń tóbesine egemen. 23Onı Izraildıń bálent tawına otırǵızaman. Ol shaqa jayıp, miywe beredi hám bir ullı kedr aǵashına aylanadı. Barlıq quslar shaqalarına mákan basadı, hár qıylı qanatlı janzatlar shaqalarınıń sayasın panalaydı. 24Daladaǵı barlıq aǵashlar biyik aǵashtı jıǵatuǵın, pás aǵashtı biyikletetuǵın, jasıl aǵashtı quwratatuǵın, quwraǵan aǵashtı gúllendiretuǵın bul – Men, Jaratqan Iye ekenimdi bilip aladı. Men, Jaratqan Iye aytaman hám júzege asıraman».
Copyright information for KaaIBT22L