‏ Ezekiel 18

Jeke juwapkershilik

1Maǵan Jaratqan Iyeden sóz tústi:

2«Ne ushın sizler Izrailda: „Ákeleri qıshqıl júzim jeydi, balalarınıń tisi qamasadı“, – degen naqıldı qollanasız? 3Men, Quday Iye tiriligim haqı ant ishemen: bul naqıldı Izrailda endi aytpaytuǵın bolasız. 4Bilip qoyıń: hár bir tiri jan Maǵan tiyisli. Ákeniń de, balanıń da janı Meniki. Tek gúna qılǵan adam óledi. 5Haq adam ádalatlı hám tuwrı bolǵan nárseni isleydi. 6Ol tóbeshiklerdegi butlarǵa arnalǵan qurbanlıq máresimine qatnaspaydı, Izrail xalqınıń butlarına kóz salmaydı, basqanıń hayalın haramlamaydı hám etek kiri kelgen waqtında hayalǵa jaqınlamaydı. 7Hesh kimge zulım qılmaydı, girewge alǵan zatın qaytarıp beredi, talanshılıq qılmaydı, ash adamǵa nan, jalańashqa kiyim beredi. 8Ósim ushın qarız bermeydi, ústeme almaydı, nahaqlıqtan qolın tıyadı, eki adam arasındaǵı dawdı ádillik penen sheshedi. 9Ol Meniń qaǵıydalarıma ámel qıladı, nızamlarımdı shın júrekten orınlaydı. Bunday adam – haq adam, ol sózsiz jasaydı, – deydi Quday Iye.

10Biraq usı haq adamnıń qan tógip júrgen, bir qaraqshı balası bolıp, ol usı nadurıs nárselerden birin islese, 11yaǵnıy ákesi islemegen isti qılıp, tóbeshiklerdegi butlarǵa arnalǵan qurbanlıq máresimine qatnassa, basqanıń hayalın haramlasa, 12jarlı hám kámbaǵalǵa zulım qılsa, talanshılıq qılsa, girewge alǵan zatın qaytarıp bermese, butlarǵa tabınsa, jerkenishli islerdi islese, 13ósim ushın qarız berip, ústeme alsa, onda ol aman qalar ma eken? Ol aman qalmaydı. Bunday jerkenishli islerge qol urǵan adam sózsiz óltiriliwi tiyis. Ólimine ózi sebepshi boladı.

14Eger bunday adamnıń perzenti bolsa hám ol ákesi islegen barlıq gúnalardı kóre tura, ákesine eliklemese, 15yaǵnıy tóbeshiklerdegi butlarǵa arnalǵan qurbanlıq máresimine qatnaspasa, Izrail xalqınıń butlarına kóz salmasa, jaqınınıń hayalın haramlamasa, 16hesh kimge zulım qılmasa, qarızdardan girew talap qılmasa, talanshılıq qılmasa, ashqa nan, kiyimsizge kiyim berse, 17kámbaǵaldı jábirlemese, ósim hám ústeme almasa, Meniń nızamlarıma boysınıp, qaǵıydalarıma ámel qılsa, onda ol ákesiniń gúnası ushın ólmeydi, ol jasaydı. 18Al ákesi óz gúnası ushın óledi. Sebebi ol zulımlıq qıldı, tuwısqanın taladı, óz xalqı arasında jaramas islerdi isledi.

19Sizler: „Ne ushın perzent ákeniń gúnası ushın juwap bermeydi?“, – dep aytasız. Sebebi perzent ádil hám tuwrı islerdi isledi. Meniń barlıq qaǵıydalarıma muqıyatlı túrde ámel qıldı. Ol sózsiz jasaydı. 20Tek gúna qılǵan adam óledi. Perzent ákeniń, áke bolsa, perzenttiń gúnası ushın juwapker emes. Haq adam haqlıǵınıń, nahaq adam óz nahaqlıǵınıń juwabın aladı.

21Eger nahaq adam islegen barlıq gúnaları ushın táwbe qılıp, Meniń barlıq qaǵıydalarıma ámel qılsa, ádil hám tuwrı islerdi islese, ol jasaydı, ólmeydi. 22Ol qanday qılmıs islemesin, hesh biri eske alınbaydı, ol islegen ádil isleri sebepli jasaydı. 23Men nahaq adamnıń ólimin qáleymen be? – deydi Quday Iye, – Men onıń jaman joldan qaytıwın hám jasawın qálemeymen be?

24Eger haq adam óz haqlıǵınan tayıp, nahaq is tutsa, jawızlar kibi barlıq jerkenishli islerdi islese, ol jasay ma? Ol islegen ádalatlı islerdiń hesh biri eske alınbaydı, al ózi islegen qıyaneti hám gúnası ushın óledi.

25Sizler: „Iyeniń jolı natuwrı“, – deysizler. Tıńlań, Izrail xalqı! Men tutqan jol natuwrı ma? Sizlerdiń jolıńız natuwrı emes pe? 26Eger haq adam haqlıǵınan tayıp, natuwrı islerge qol ursa hám usı sebepli ólse, onda ol ózi islegen gúnası ushın óledi. 27Eger nahaq adam óz nahaqlıǵınan qaytıp, ádil hám tuwrı islerdi qılsa, ol óz ómirin saqlap qaladı. 28Ol ózi islegen barlıq qılmıslarına kóz jiberip, olar ushın táwbe qılǵanı sebepli jasaydı, ólmeydi. 29Sonday bolsa da, Izrail xalqı: „Iyeniń jolı tuwrı emes“, – deydi. Meniń jolım natuwrı ma, Izrail xalqı? Natuwrı jol sizlerdiki emes pe? 30Bunıń ushın, Izrail xalqı, sizlerdiń hár birińizdi óz jollarıńızǵa bola húkim etemen, – deydi Quday Iye. – Táwbe qılıń, barlıq gúnalarıńızdan qaytıń, qılmıslarıńız sizlerdi nabıt qılmasın. 31Islegen barlıq gúnalarıńızdan júz burıp, ózlerińizge jańa júrek hám jańa ruwx alıń. Izrail xalqı, sizlerge óliwdiń ne keregi bar? 32Men hesh kimniń ólimin qálemeymen, – deydi Quday Iye. – Jaman joldan qaytıń hám jasań!»