Ezekiel 19
Izrail húkimdarları ushın joqlaw
1– Sen Izrail húkimdarları ushın joqlaw aytıp, 2bılay de:«Seniń anań qanday arıslan edi?!Ol arıslanlar arasına ornalastı,
Jırtqısh arıslanlar arasında balaların ósirdi.
3Balalarınan biri kúshli arıslan bolıp jetilisti,
Ol aw qılıwdı úyrendi,
Adamlardı jey basladı.
4Milletler ol tuwralı esitti,
Arıslandı shuqırǵa túsirdi,
Shınjırlap, Mısır jerine alıp bardı.
5Anası kúte-kúte, úmitin úzdi,
Balalarınan basqa birewin alıp,
Onı kúshli arıslan qılıp ósirdi.
6Ol kúshli arıslanǵa aylanıp,
Arıslanlar arasında gezip júrdi,
Aw qılıwdı úyrendi,
Adamlardı jey basladı.
7Olardıń qorǵanların buzdı,
Qalaların wayran qıldı.
Jer hám onda jasawshılar,
Onıń aqırıwınan titiredi.
8Dógerektegi wálayatlardaǵı milletler,
Oǵan qarsı hújim qıldı.
Ústine tor tasladı,
Arıslan olardıń shuqırına tústi.
9Shınjırlap, onı qápeske saldı,
Babiloniya patshasına alıp bardı,
Onı qamaqqa tasladı.
Izrail tawlarınıń ústinde,
Qaytıp esitilmesin, dep onıń dawısı.
10Seniń anań suwlardıń boyına egilgen,
Baǵdaǵı júzim aǵashına uqsar edi.
Suwlardıń molshılıǵınan,
Ol ónimdar hám mol shaqalı edi.
11Húkimdarǵa hasa bolǵanday,
Kúshli shaqaları bar edi.
Qalıń japıraqlar arasında,
Tik boyı bálent kóterildi.
Bálentligi hám mol shaqaları menen,
Kózge taslanıp turar edi.
12Biraq ǵázep penen,
Ol suwırılıp jerge urıldı.
Shıǵıs samalı miywelerin solıttı,
Kúshli shaqaları sınıp quwradı,
Hámmesin ot jalmap tasladı.
13Ol endi shólge,
Qurǵaq hám suwsız jerge kóshirildi.
14Onıń tik shaqasınan jalın shıǵıp,
Solqımların kúydirip jiberdi.
Húkimdarlıq hasası ushın bekkem shaqası qalmadı».
Bul joqlaw qosıǵı bolıp, joqlaw ushın qollanıladı.
Copyright information for
KaaIBT22L