Ezekiel 2
Ezekieldiń shaqırılıwı
1Ol maǵan: – Insan ulı, ornıńnan tur, Men seniń menen sóylespekshimen, – dedi. 2Dawıs maǵan sóylep atırǵanda, maǵan Ruwx kirip alıp, meni ayaqqa turǵızdı hám men sóylep turǵannıń sózlerin esittim. 3Ol maǵan bılay dedi: – Insan ulı, Men seni Maǵan qarsı bas kótergen qaysar millet, Izrail xalqına jiberemen. Olar hám olardıń ata-babaları usı kúnge shekem Maǵan qarsı bas kóterip kelmekte. 4Bul xalıq qaysar hám ójet. Men seni olarǵa jiberemen. Sen olarǵa: «Quday Iye bılay dep atır», – deyseń. 5Bul qozǵalańshı xalıq sózińe qulaq sala ma, salmay ma, bári bir ózleriniń arasında bir payǵambardıń bolǵanın bilsin. 6Al sen bolsań, háy insan ulı, olardan da, olardıń sózlerinen de qorqpa. Hátte, tikenli putalar menen oshaǵanlar átirapıńdı qorshap alsa da, shayanlar arasında jasasań da qorqpa. Olardıń sózlerinen qorqpa, júzlerinen aybınba, olar qozǵalańshı xalıq. 7Seni tıńlasa da, tıńlamasa da, olarǵa sózlerimdi ayt. Olar qozǵalańshı xalıq. 8Sen bolsań, háy insan ulı, Meniń aytqanlarımdı tıńla, bul qozǵalańshı xalıqqa uqsaǵan qaysar bolma. Awzıńdı ashıp, Meniń saǵan beretuǵın nársemdi je. 9Qarasam, maǵan qaray bir qol sozıldı. Qolda bir orama qaǵaz bar edi. 10Qol orama qaǵazdı aldıma ashıp qoydı. Onıń eki tárepine de joqlaw, qayǵı hám hásiret sózleri jazılǵan edi.
Copyright information for
KaaIBT22L