‏ Ezekiel 20

Biyopa Izrail

1Súrgin bolǵan waqtımızdıń jetinshi jılınıń besinshi ayınıń onınshı kúni Izrail aqsaqallarınan ayırımları Jaratqan Iyeden másláhát soraw ushın meniń aldıma keldi. 2Maǵan Jaratqan Iyeden sóz tústi:

3– Insan ulı! Izrail aqsaqalları menen sóylesip, olarǵa ayt: «Quday Iye bılay deydi: Sizler Mennen másláhát soraw ushın keldińiz be? Tiriligim haqı ant iship aytaman: sizlerge hesh qanday másláhát bermeymen, – deydi Quday Iye».

4Olardı húkim qıl! Olardı húkim qıl, insan ulı! Olarǵa ata-babalarınıń jerkenishli islerin aytıp ber. 5Olarǵa ayt: «Quday Iye bılay deydi: Men Izraildı tańlaǵan kúnim, Yaqıptıń urpaqlarına ant ishkenmen hám Mısırda Ózimdi tanıtqanman. Men olarǵa ant iship: „Men Qudayıńız Jaratqan Iye bolaman“, – degenmen. 6Sol kúni Men olarǵa, ózlerin Mısırdan shıǵarıp, olar ushın gózlegen jer betindegi eń ájayıp úlkege, sút hám pal aǵıp turǵan jerge alıp baratuǵınımdı aytıp ant bergen edim. 7Olarǵa: „Hár bir adam ózi kewil bergen jerkenishli músinlerin ılaqtırıp taslasın, Mısır butları menen ózlerin haramlamasın. Men Qudayıńız Jaratqan Iyemen“, – degen edim.

8Biraq olar Maǵan qarsı bas kóterdi hám Meni tıńlamadı. Kewil qoyǵan jerkenishli músinlerin ılaqtırıp taslamadı hám Mısır butlarınan júz burmadı. Sonda Men Mısırda-aq qáhárimdi tógip, ǵázebimdi tolıq shashpaqshı boldım. 9Biraq olar arasında jasaǵan milletler aldında atıma daq túsirmew ushın, Óz atım húrmeti ushın háreket ettim. Men ol milletlerdiń kóziniń aldında izraillılardı Mısırdan alıp shıǵıp, Ózimdi olarǵa tanıttım. 10Men olardı Mısırdan shıǵarıp, shólge alıp keldim. 11Óz qaǵıydalarımdı berdim hám nızamlarımdı járiyaladım. Olarǵa ámel qılǵan hár bir adam olar arqalı jasaydı. 12Jáne, ózlerin muxaddes qılatuǵın Men, Jaratqan Iye ekenimdi bilsin dep, Ózim hám olar arasındaǵı belgi retinde Shabbatımdı berdim.

13Degen menen, Izrail xalqı shólde de Maǵan qarsı shıqtı. Meniń qaǵıydalarıma ámel qılmadı, nızamlarımdı mensinbedi. Usılardı orınlaǵan adam olar arqalı aman qalatuǵın edi. Olar Shabbatımdı da tolıq xorladı. Sonda Men olardıń ústine ǵázebimdi tógip, shólde olardı qırıp jibermekshi boldım. 14Biraq Izraildı Mısırdan alıp shıqqanımdı kórgen milletler aldında atıma daq túspesin dep, Óz atım húrmeti ushın háreket ettim. 15Olardı ózlerine bermekshi bolǵan jer betindegi eń ájayıp úlkege, sút hám pal aǵıp turǵan jerge alıp barmaytuǵınımdı aytıp, shólde ant ishtim. 16Sebebi olar Meniń nızamlarımdı mensinbedi, qaǵıydalarıma ámel qılmadı hám Shabbatımdı xorladı. Olardıń júregi butlarǵa berilgen edi. 17Degen menen, olardı qırıp jiberiwge kózim qıymadı hám Men olardı shólde joq qılmadım.

18Men shólde olardıń balalarına bılay dedim: „Atalarıńızdıń úrp-ádetleri boyınsha júrmeń, olardıń butları menen ózlerińizdi haramlamań. 19Men sizlerdiń Qudayıńız Jaratqan Iyemen. Meniń qaǵıydalarıma ámel qılıń hám nızamlarımdı muqıyatlı túrde orınlań. 20Shabbatımdı muxaddes tutıń. Qudayıńız Jaratqan Iye Men ekenimdi biliwińiz ushın, olar bizlerdiń aramızda belgi boladı“.

21Biraq balaları da Maǵan qarsı bas kóterdi. Meniń qaǵıydalarıma ámel qılmadı, nızamlarımdı orınlawǵa háreket etpedi. Adam olardı orınlawı arqalı aman qalatuǵın bolsa da, olardı orınlamadı, Shabbatımdı xorladı. Sonda Men shólde olarǵa ǵázebimdi tógip, qáhárimdi tolıq shashpaqshı boldım. 22Solay bolsa da, Izraildı Mısırdan alıp shıqqanımdı kórgen milletler aldında atıma daq túspesin dep, qolımdı tarttım hám Óz atım húrmeti ushın háreket ettim. 23Jáne de, shólde olardı milletler arasına tarqatıp, el boylap shashıp jiberemen dep ant ishtim. 24Sebebi olar Meniń nızamlarımdı orınlamadı, qaǵıydalarımdı mensinbedi, Shabbatımdı xorladı hám ata-babalarınıń butlarına qushtarlana kóz tikti. 25Sonlıqtan Men olardı jaqsı bolmaǵan qaǵıydalardıń hám adam orınlaǵanı menen aman qalmaytuǵın nızamlardıń biyligine tapsırdım. 26Olardı qorqıtıw ushın hám olar Meniń Quday Iye ekenimdi biliwi ushın, ózleri bergen sıylar, yaǵnıy qarınnan birinshi shıqqan hár bir perzentin otta jaǵıp, qurbanlıq keltiriwi arqalı olardı haramladım».

27Solay eken, insan ulı, Izrail xalqı menen sóylesip, olarǵa ayt: «Quday Iye bılay deydi: Ata-babalarıńız jáne opasızlıq qıldı hám bul arqalı Maǵan til tiygizdi. 28Men beremen dep ant ishken jerime olardı alıp barǵanımda, olar kórgen hár bir biyik tóbeshikte hám hár bir qoyıw japıraqlı terektiń astında óz qurbanlıqların shaldı. Ol jerde Meniń ǵázebimdi keltiretuǵın sadaqalardı berdi, xosh iyisli tútetkilerdi tútetti hám ishimlik sadaqaların quydı. 29Sonda Men olardan: „Sizler barıp atırǵan bul qanday sıyınıw ornı?“– dep soradım».

Sonlıqtan sonday orınlar búgingi kúnge deyin «sıyınıw ornı ▼

▼ Sıyınıw ornı – evrey tilinde «barıw» sózi menen únles keledi.

» dep ataladı.

30Solay eken, Izrail xalqına Quday Iye bılay deydi dep ayt: «Sizler de ata-babalarıńızǵa eliklep, ózlerińizdi haramlamaqshımısız? Olardıń jerkenishli músinleri menen buzıqshılıq qılmaqshımısız? 31Usı kúnge deyin, sizler balalarıńızdı otta jaǵıp, qurbanlıq qılıp usınıw arqalı, pútkil butlarıńız benen ózlerińizdi haramlap kiyatırsız. Solay isley otırıp, Izrail xalqı, Mennen másláhát soramaqshımısız? Tiriligim haqı ant iship aytaman: sizlerge hesh qanday másláhát bermeymen, – deydi Quday Iye. 32– Sizler: „Bizler de basqa milletler, basqa jerlerdegi qáwimler sıyaqlı, aǵash hám taslarǵa sıyınayıq“, – deysiz. Biraq oyıńızǵa kelgen bul islerińiz ámelge aspaydı. 33Men, Quday Iye tiriligim haqı ant iship aytaman: kúshli bilegim, sozılǵan qolım hám lawlaǵan ǵázebim menen ústińizden patshalıq qılaman. 34Kúshli bilegim, sozılǵan qolım hám lawlaǵan ǵázebim menen sizlerdi xalıqlardıń arasınan shıǵarıp, tarqap ketken jerlerińizden jıynap alaman. 35Keyin sizlerdi xalıqlardıń shól dalasına alıp barıp, sol jerde júzbe-júz húkim shıǵaraman. 36Mısır jerindegi shólde ata-babalarıńızǵa qanday húkim shıǵarǵan bolsam, sizlerge de sonday húkim shıǵaraman, – deydi Quday Iye. 37– Sizlerdi hasa tayaǵım menen barlap shıǵıp, kelisimime boysınıwǵa májbúr etemen. 38Qozǵalańshılardı hám Maǵan boysınbaytuǵınlardı sizlerden ayıraman. Olardı súrginde bolǵan elden alıp shıqqanım menen, olar Izrail jerine kirmeydi. Sonda Meniń Jaratqan Iye ekenimdi bilip alasız.

39Sizler tuwralı, Izrail xalqı, Quday Iye bılay deydi: Eger Maǵan qulaq salmaytuǵın bolsańız, onda hár birińiz óz butlarıńızǵa xızmet ete berińler. Biraq sıylarıńız hám butlarıńız arqalı Meniń muxaddes atıma artıq daq túsirmeńler. 40Endi Muxaddes tawımda, Izraildıń biyik tawında, – deydi Quday Iye, – sol jerde qansha Izrail xalqı bolsa, hámmesi Maǵan xızmet etedi. Sol jerde Men olardı ırazılıq penen qabıl etemen. Barlıq muxaddes zatlarıńız benen birge sadaqalarıńızdı hám ónimińizdiń birinshi bóleklerin sol jerde talap etemen. 41Sizlerdi xalıqlardıń arasınan alıp shıǵıp, tarap ketken jerlerińizden jıynap alǵanımda, sizlerdi xosh iyisli tútetki sıpatında qabıl etemen hám milletlerdiń kózleriniń aldında Óz muxaddesligimdi ayan etemen. 42Sizlerdi ata-babalarıńızǵa beremen dep ant ishken jerime, Izrail jerine alıp kelgenimde, Meniń Jaratqan Iye ekenimdi bilip alasız. 43Sol jerde ózlerińizdi haramlaǵan jollarıńızdı, islegen jawız islerińizdi esińizge alasız hám islegen barlıq jawızlıqlarıńız sebepli ózińizden ózińiz tiksinesiz. 44Izrail xalqı, Men sizlerdiń tutqan jaman jollarıńızǵa hám jaramas islerińizge qaray emes, al Óz atım húrmeti ushın háreket etkenimde, Sizler Meniń Jaratqan Iye ekenimdi bilip alasız, – deydi Quday Iye».

Qubladaǵı órt

45Maǵan Jaratqan Iyeden sóz tústi:

46– Insan ulı, júzińdi qublaǵa qaratıp, qublaǵa waz ayt hám sol jerdegi toǵayǵa qarsı payǵambarshılıq qıl. 47Qubladaǵı toǵayǵa bılay dep ayt: «Jaratqan Iyeniń sózin tıńla! Quday Iye bılay deydi: Men ishińde ot tutandıraman, ol sendegi barlıq aǵashlardı, jasılın da, quwraǵanın da joq qıladı. Lawlaǵan ot óshpeydi, qubladan arqaǵa shekemgi barlıq jerler janıp kúydiriledi. 48Pútkil insan ulı bul ottı Jaratqan Iyeniń, Meniń jaqqanımdı kóredi, ot óshpeydi».

49Sonda men:

– Ah, Quday Iye! Bul adamlar men tuwralı: «Bul adam qurı tımsal aytıp júrgen joq pa?» – dep aytpaqta, – dedim.