Eze 22 | KaaIBT22L | STEP | Maǵan Jaratqan Iyeden sóz tústi:

‏ Ezekiel 22

Erusalimniń gúnası

1 Maǵan Jaratqan Iyeden sóz tústi:

2 – Sen, insan ulı, húkim qıl, qanxor qalanı húkim qıl! Onıń islegen jerkenishli islerin aytıp ber. 3 Oǵan Quday Iye bılay deydi dep ayt: «Háy, óz ishińde qan tógip, jaza kúnin jaqınlatqan qala! Sen butlar soǵıp, ózińdi haramladıń! 4 Tókken qanıń menen ayıplı boldıń, soqqan butlarıń menen haramlandıń. Kúnleriń jaqınlastı, jıllarıń payanına jetti. Sonıń ushın Men seni milletlerdiń mazaqlawına, pútkil ellerdiń ústińnen kúliwine jol qoyaman. 5 Jaman at shıǵarǵan, ǵawǵaǵa tolǵan qala, jaqındaǵılar da, alıstaǵılar da seni mazaqlaydı.

6 Mine, ishińde jasap atırǵan hár bir Izrail húkimdarı óz hámelinen paydalanıp, qan tógedi. 7 Qalada ata-anasın mensinbeydi, kelgindini ezedi, jetim hám jesirge zulımlıq qıladı. 8 Sen Meniń muxaddes nárselerimdi húrmet etpediń, Shabbatıma biypárwa boldıń. 9 Arańızda jala jawıp, qan tógetuǵınlar, tóbeshiklerde butlarǵa arnalǵan qurbanlıq máresimine qatnasatuǵınlar hám uyatsız qılıqlardı qılatuǵınlar bar. 10 Arańızda ákesiniń hayalı menen jatatuǵınlar, etek kiri kelip júrgen hayaldı zorlaytuǵınlar bar. 11 Birewi qońsısınıń hayalı menen jerkenishli is qılsa, basqası shermendelershe kelinin haramlaydı, basqası tuwısqan qarındasınıń namısına tiyedi. 12 Sendegi adamlar qan tógiw ushın para aladı. Sen ósim hám ústeme alasań, zorlıq penen jaqınıńnıń mal-múlkin tartıp alasań, al Meni bolsa, umıttıń, – deydi Quday Iye.

13 Minekey, haram paydań hám ishińde qan tókkeniń ushın Men ashıw menen alaqanımdı alaqanıma uraman. 14 Men saǵan qarsı háreketke kirgen kúni júregiń daw berip, qolıńda kúshiń qalar ma eken? Bunı Men, Jaratqan Iye aytaman hám júzege asıraman. 15 Men seni milletler arasına tarqatıp, el boylap shashıp jiberemen hám arańızdaǵı haram islerge shek qoyaman. 16 Xalıqlardıń kóz aldında xor bolǵanıńda, Meniń Jaratqan Iye ekenimdi bilip alasań».

17 Maǵan Jaratqan Iyeden sóz tústi:

18 – Insan ulı, Izrail xalqı Men ushın ǵawajaqtay qádirsiz bolıp qaldı. Olardıń hámmesi – oshaqtaǵı mıs, qalayı, temir hám qorǵasın. Olar gúmisten qalǵan ǵawajaqqa aylandı.

19 Sonlıqtan Quday Iye bılay deydi: «Hámmeńiz ǵawajaqqa aylanǵanıńız ushın, Men sizlerdi Erusalimge jıynayman. 20 Ottı alıstırıp, gúmisti, mıstı, temirdi, qorǵasındı hám qalayını eritiw ushın oshaqqa salǵanınday, Men de qáhár-ǵázebim menen sizlerdi jıynayman, hámmeńizdi salıp, eritemen. 21 Sizlerdi jıynap, ǵázep otımdı ústińizge úpleymen hám qala ishinde erip ketesiz. 22 Gúmistiń oshaqta erigenindey, sizler de qala ishinde eriysiz. Sonda ǵázep otın ústińizge tókken Men – Jaratqan Iye ekenimdi bilip alasız».

23 Maǵan Jaratqan Iyeden sóz tústi:

24 – Insan ulı, elge: «Sen tazalanbaǵan jerseń. Ǵázep kúni jawın menen suwǵarılmaǵansań», – dep ayt. 25 Onıń ishindegi húkimdarları ^{▼▼ húkimdarları – Áyyemgi grekshe awdarmadan. Evreyshe qoljazbalarda «payǵambarlar toparı».} ırıldap, oljasın tilkimlep atırǵan arıslanǵa uqsaydı. Olar adamlardı jeydi, múlik hám baylıqlardı tartıp aladı, jesirlerdiń sanın kóbeytedi. 26 Onıń ruwxaniyleri nızamımdı buzadı, muxaddes zatlarımdı haramlaydı. Muxaddes zat penen haram zattı parıqlamaydı. Hadal menen haramnıń ayırmashılıǵın túsindirmeydi. Shabbatıma kóz jumadı, Men olardıń arasında xorlanıp atırman. 27 Olardıń hámeldarları oljasın tilkimlep atırǵan qasqırǵa uqsaydı. Baylıq arttırıw ushın qan tógedi, adamlardıń janın aladı. 28 Al payǵambarları bolsa olardıń qılmısların hák penen aqlaydı. Ótirikten ayanlar kórip, Jaratqan Iye solay aytpasa da: «Quday Iye usılay aytadı», – dep jalǵan boljawlar aytadı. 29 Eldiń xalqı birin biri ezedi, tonaydı, jarlı hám kámbaǵalǵa zulımlıq qıladı, kelgindini nahaq jábirleydi.

30 Eldi joq qılmawım ushın, diywaldıń buzılǵan jerlerin dúzetetuǵın, onıń buzılǵan jerine qalqan bolıp, sol jer ushın Meniń aldımda turatuǵın birewdi izledim, biraq taba almadım. 31 Solay etip, Men olarǵa qáhárimdi tógemen, ǵázep otım menen joq qılaman hám qılǵan qılmıslarına jarasa jazasın beremen, – deydi Quday Iye.