‏ Ezekiel 23

Opasız apa-sińliler

1Maǵan Jaratqan Iyeden sóz tústi:

2– Insan ulı! Bir anadan tuwılǵan eki qız bar edi. 3Olar jaslıq shaǵınan-aq buzıq jolǵa túsip, Mısırda buzıqshılıq qıldı. Sol jerde olardıń kókiregi sıypalanıp, qızlıq emshekleri aymalandı. 4Úlkeniniń atı Ohola, kishkenesiniń atı Oholiba edi. Olar Meniki boldı, ul hám qızlar tuwdı. Ohola – Samariyanı, Oholiba – Erusalimdi bildiredi. 5Ohola Meniki bola tura, buzıqshılıq etip, oynasları bolǵan assiriyalılardıń ıshqında jandı. 6Bular qızǵısh kók reńli lipas kiygen jawıngerler, hákimler hám lawazımlı adamlar bolıp, hámmesi sawlatlı jigitler hám atqa mingen áskerler edi. 7Ohola Assiriyanıń kórnekli adamları menen buzıqshılıq qıldı hám ózi ıshqında janǵanlardıń butları menen ózin haramladı. 8Ol Mısırda baslaǵan buzıqshılıǵın taslamadı. Jaslıǵında-aq erkekler onıń menen jatıp, qızlıq emsheklerin aymalap, qumarların qandırǵan edi. 9Sonlıqtan Men onı ózi ıshqında janǵan oynaslarınıń qolına, assiriyalılardıń qolına berdim. 10Olar Oholanı tırday jalańash qılıp sheshindirdi, ul-qızların tutqın qılıp alıp, ózin qılısh penen óltirdi. Oǵan usınday húkim shıǵarıldı hám ol hayallar arasında shermende boldı.

11Oholanıń sińlisi Oholiba bunı kórse de, qumarlıǵı hám buzıqshılıǵı menen ájapasınan da asıp tústi. 12Ol da assiriyalılardıń hákimleri menen lawazımlı adamlarınıń, bezenip kiyingen jawıngerleri menen atlı áskerleriniń, barlıq sawlatlı jigitleriniń ıshqında jandı. 13Men onıń da ózin haramlaǵanın kórdim. Olardıń ekewiniń de jolı bir edi. 14Oholiba buzıqshılıǵın arttırdı. Ol qızıl reń menen diywalǵa sızılǵan kaldeyli erkeklerdiń súwretin kórdi. 15Olardıń bellerinde qayıs, baslarında jelbiregen sálleleri bolıp, hámmesi kaldeylerdiń jerinde tuwılǵan babiloniyalı láshkerbasılarǵa uqsaytuǵın edi. 16Olardı kóriwden, Oholibanıń ıshqı ketti hám kaldeylerdiń jerine shabarmanlar jolladı. 17Babiloniyalılar onıń janına, ıshqı tósegine keldi hám buzıqshılıq qılıp, onı haramladı. Oholiba haramlanǵannan keyin, olardan jerkenish penen júz burdı. 18Ol ashıq túrde buzıqshılıqqa berilip, jalańash denesin kórsetkende, onıń ájapasınan jerkenip júz burǵanımday, onnan da jerkenip, júz burdım. 19Degen menen, ol Mısırda buzıqshılıq qılǵan jaslıǵın eslep, jáne de kóbirek buzıqshılıq qıla basladı. 20Ol jınısıy aǵzaları eshektikindey, urıǵı ayǵırdikindey bolǵan oynaslarına ıntıqtı. 21Solay etip, sen mısırlılar emsheklerińdi aymalap, kókireklerińdi sıypalaǵan jaslıǵıńdaǵı uyatsız qılıqlarıńdı saǵındıń.

22Sonlıqtan, Oholiba, Quday Iye bılay deydi: «Men óziń jerkenip júz burǵan oynaslarıńdı ózińe qarsı qozǵayman, olardı hámme jaqtan jıynap alıp kelemen. 23Babiloniyalılardı, barlıq kaldeylerdi, peqod, shoa hám qoa urıwlarınıń adamların, olar menen birge barlıq assiriyalılardıń sawlatlı jigitlerin, hákimlerin, lawazımlı adamların, láshkerbasıların hám jawıngerlerin – barlıq atqa minerlerin alıp kelemen.

24Olar qurallar, sawash hám júk arbalar, kóplegen xalıqlar menen kelip, seni ján-jaqtan úlken-kishi qalqan hám duwlıǵa menen qorshawǵa aladı. Men olarǵa seni húkim qılıw ıqtıyarın beremen, olar óziniń ádet-dástúrleri boyınsha húkim qıladı. 25Men saǵan qarsı qızǵanıshımdı qozǵayman. Olar seni rehimsiz jazalaydı. Qulaq hám murnıńdı kesip taslaydı, aman qalǵanlar qılıshtan ótkeriledi. Ullarıńdı hám qızlarıńdı tutqınǵa aladı, aman qalǵanlardı ot jandırıp joq qıladı. 26Ústińdegi kiyimlerińdi sheship alıp, qımbatbaha taǵınshaqlarıńdı aladı. 27Men seniń Mısırdan alıp kelgen azǵınlıǵıń menen uyatsız qılıǵıńa shek qoyaman. Endi olarǵa kóz salmaytuǵın hám Mısırdı eske almaytuǵın bolasań.

28Quday Iye bılay deydi: Bilip qoy, Men seni óziń jek kórgen, kewliń jerkengen adamlardıń qolına tapsıraman. 29Olar saǵan ayawsız qatnas jasaydı, miynet penen jıynaǵanlarıńdı alıp ketedi, ózińdi tırday jalańash qaldıradı. Usılayınsha seniń uyatsız jalańashlıǵıń, uyatsızlıǵıń hám buzıqshılıǵıń ayan boladı. 30Bular seniń milletler menen buzıqshılıq islegeniń, olardıń butları menen ózińdi haramlaǵanıń sebepli júz beredi. 31Sen ájapańnıń jolınan júrdiń, sol sebepli oǵan ishkizgen jaza kesemnen saǵan da ishkizemen.

32Quday Iye bılay deydi: Sen ájapańnıń shúńgil hám keń kesesinen isheseń. Seniń ústińnen kúledi, masqara bolasań. Kesege júdá kóp ketedi. 33Sen más bolasań hám qayǵıǵa batasań. Bul qırǵın hám wayranshılıq kesesi, bul ájapań Samariyanıń kesesi. 34Onnan iship, tawısasań, onı sındırıp, kókiregińdi tilkimleyseń. Bunı Men aytıp turman, – deydi Quday Iye.

35Sonlıqtan Quday Iye bılay deydi: Sen Meni umıtıp, Maǵan arqańdı qaratqanıń ushın, uyatsızlıǵıńnıń hám buzıqshılıǵıńnıń jazasın tart».

36Jaratqan Iye maǵan bılay dedi:

– Insan ulı, Ohola menen Oholibanı húkim qıl! Olardıń jerkenishli islerin áshkaralap ayt! 37Olar neke hadallıǵın buzdı, qolları qanǵa bılǵanǵan. Olar butlar menen buzıqshılıq qıldı, hátte, Maǵan tuwıp bergen balaların da, butlarǵa azıq qılıp, jandırıp usındı. 38Olar Maǵan jáne mınanı da qıldı: sol kúni olar Meniń Muxaddes mákanımdı da haramladı hám Shabbatımdı xorladı. 39Balaların butlarǵa arnap shalǵan kúni, olar Meniń Muxaddes mákanıma kirip, onı haramladı. Olar Meniń Úyimde, mine, usılardı isledi.

40Hátte, olar alıs jerdegi adamlarǵa shabarmanlar jiberdi, olar da keldi. Olar kelgende, apa-sińliler olar ushın juwındı, kózlerin boyadı hám áshekóylerin taqtı. 41Jayılǵan tolı dasturxan qasındaǵı sulıw tósekke otırdı. Dasturxanǵa Meniń xosh iyisli tútetkimdi hám záytún mayımdı qoydı. 42Káypi-sapa qurıp otırǵan alaman dawısı esitilip turdı. Shól daladan kelgen bul máskúnemler apa-sińliniń qolına bilezik taqtı, basına ájayıp taj kiydirdi.

43Sonda Men buzıqshılıq islep, haldan tayǵan hayallar tuwralı bılay dedim: «Erkekler bul hayallarǵa jezókshedey qatnas jasasın, sebebi olar sonday». 44Olar jezóksheniń janına kirgendey, olar menen jattı. Solay etip, uyatsız hayallar Ohola hám Oholibaǵa usılay qatnas jasaldı. 45Biraq ádil adamlar olardı neke hadallıǵın buzǵanlıqta hám qanxorlıqta ayıplap, húkim shıǵardı. Óytkeni olar buzıq hayallar bolıp, qolları qanǵa bılǵanǵan edi.

46Quday Iye bılay deydi: Olarǵa qarsı alamandı jıynap alıp kelip, olardıń húreylerin ushırıp, tonat. 47Alaman olardı tas boran qıladı, qılıshı menen shabadı. Balaların hám qızların óltiredi, úylerin jaǵıp jiberedi. 48Usılayınsha Men eldegi uyatsız islerge shek qoyaman, pútkil hayallar bunnan sabaq alıp, sizlerge eliklemeytuǵın boladı. 49Sizler uyatsız qılıqlarıńız hám butqa tabınǵanıńız ushın jazańızdı alasız. Sonda sizler Meniń Quday Iye ekenimdi bilesiz.