Eze 24 | KaaIBT22L | STEP | Súrginde bolǵan waqtımızdıń toǵızınshı jılınıń onınshı ayınıń onınshı kúni Maǵan Jaratqan Iyeden sóz tústi:

‏ Ezekiel 24

Qaynaǵan qazan

1 Súrginde bolǵan waqtımızdıń toǵızınshı jılınıń onınshı ayınıń onınshı kúni Maǵan Jaratqan Iyeden sóz tústi:

2 – Insan ulı, usı kúndi, búgingi sáneni jazıp qoy. Babiloniya patshası usı búgin Erusalimdi qamal qıldı. 3 Bul qozǵalańshı xalıqqa bir tımsal aytıp, Quday Iye bılay deydi dep ayt: «Qazandı oshaqqa qoyıp, ishine suw quy. 4 Oǵan góshtiń jaqsı bóleklerin: jambas hám jawırın góshlerin salıp, saylandı jiliklerge toltır. 5 Gósh saylandı qoydıń góshi bolsın. Astına otındı úyip salıp, súyegin jaqsılap pisir.

6 Quday Iye bılay deydi: Qanxor qala hásiret shegedi! Tat basıp, tatı tazalanbaǵan bul qazan hásiret shegedi! Shek taslap saylamastan, góshti bólek-bólek qılıp alıp, ılaqtırıń. 7 Qalanıń qanı onıń ortasında. Ol qandı keyin shań menen bastırılıp qalatuǵın jerge emes, al jalańash jartastıń ústine tókti. 8 Ósh alıwǵa degen ǵázebimdi oyatıw ushın, Men de qandı jartas ústinde qaldırdım, onı jasırıp bolmaydı.

9 Sonlıqtan Quday Iye bılay deydi: Qanxor qala hásiret shegedi! Men úlken qılıp otın úyemen. 10 Otındı mol etip salıp, ottı alıstır, góshti qaynat hám dám beriwshi zatlardı qos. Súyekler de kúyip kúl bolsın. 11 Qazandı bosat, kómirdiń ústine qoyıp, qızdır. Mıs qızıp, ishindegi pataslıq erisin hám tatı kúyip ketsin. 12 Biraq barlıq miynetim bosqa ketti, qalıń tattı eritiw ushın, hátte, ot ta járdem bermedi. 13 Uyatsız qılıǵıń seni haramladı. Seni tazalamaqshı bolǵanımda, sen tazalanbadıń. Sol sebepli ústińe ǵázebimdi tolıq tógip bolmaǵansha, tazalanbaysań. 14 Bunı Men, Jaratqan Iye aytıp turman. Meniń háreketke kiretuǵın waqtım boldı. Men Ózimdi toqtatpayman, ayamayman, rehim de qılmayman. Sen óz jolıń hám islerińe góre húkim qılınasań, – deydi Quday Iye».

Ezekieldiń hayalınıń óliwi

15 Maǵan Jaratqan Iyeden sóz tústi:

16 – Insan ulı, men bir soqqı menen seni kózińe qádirli bolǵan adamnan juda qılaman. Biraq joqlaw aytpa, jılama, kóz jas tókpe. 17 Ishińnen jıla, marhum ushın aza tutpa. Sálleńdi hám ayaq kiyimińdi sheshpe, saqalıńdı jawma, kewil aytıwǵa kelgenler ákelgen awqattan jeme.

18 Azanda men xalıq penen sóylestim, keshte hayalım qaytıs boldı. Kelesi kúni azanda men ózime buyırılǵanlardı orınladım. 19 Sonda adamlar mennen:

– Sen islep atırǵan bul nárselerdiń bizler ushın qanday mánisi bar? – dep soradı. 20 Men olarǵa Jaratqan Iyeden maǵan mınaday sóz túskenin ayttım:

21 «Izrail xalqına ayt, Quday Iye bılay deydi: Kúshińizdiń maqtanıshı, kózińizge qádirli hám janıńızdıń arzıwı bolǵan Muxaddes mákanımnıń haramlanıwına jol qoyaman. Qaldırıp ketken ul hám qızlarıńız qılıshtan qırıladı.

22 Sonda Ezekiel ne qılǵan bolsa, sizler de sonı qılasız. Saqalıńızdı jawmaysız, kewil aytıwǵa kelgenler ákelgen awqattan jemeysiz. 23 Sálleńiz basıńızda, ayaq kiyimińiz ayaǵıńızda boladı. Joqlaw aytpaysız, jılamaysız. Qılmıslarıńızdıń zardabınan dimarıńız qurıp, birge nala shegesiz.

24 Ezekiel sizler ushın belgi boladı. Ol ne islegen bolsa, sizler de solay isleysiz. Bular júz bergende, sizler Meniń Quday Iye ekenimdi bilesiz».

25 Bunnan keyin Quday Iye maǵan bılay dedi:

– Saǵan kelsek, insan ulı, Men olardıń qorǵanın, saltanatlı shadlıǵın, kózine qádirli bolǵan nársesin hám janınıń arzıwın, sonday-aq ulların hám qızların tartıp alǵanımda, 26 sol kúni qashıp qutılǵan bir adam xabardı jetkeriw ushın saǵan keledi. 27 Sonda jáne tilge kirip, sol adam menen sóyleseseń, artıq tiliń tutılmaydı ^{▼▼ 3:26-27; 33:21-22.}. Sen xalqım ushın bir belgi bolasań, sonda olar Meniń Jaratqan Iye ekenimdi bilip aladı.