Eze 25 | KaaIBT22L | STEP | Maǵan Jaratqan Iyeden sóz tústi:

‏ Ezekiel 25

Qońsı xalıqlarǵa qarsı payǵambarshılıqlar

Ammon

1 Maǵan Jaratqan Iyeden sóz tústi:

2 – Insan ulı, júzińdi ammonlarǵa qaratıp, olarǵa qarsı payǵambarshılıq qıl. 3 Olarǵa ayt: «Quday Iyeniń sózin tıńlań! Quday Iye bılay deydi: Muxaddes mákanım haramlanǵanda, Izrail jeri wayran qılınǵanda hám Yahuda xalqı tutqınǵa túskende, „Hay-hay“dep olardıń ústinen kúlgen edińiz. 4 Sonlıqtan Men sizlerdi shıǵıs xalıqlarınıń iyeligine beremen. Olar elińizge orda qurıp, shatırların tigedi, ónimlerińizdi jep, sútińizdi ishedi. 5 Rabba qalasın túyelerdiń órisine, Ammon elin qoylardıń qorasına aylandıraman. Sonda sizler Meniń Jaratqan Iye ekenimdi bilip alasız.

6 Quday Iye bılay deydi: Sen qol shappatlap, ayaq tapırlatıp, Izrail jerin jek kórip, baxıtsızlıǵına shın júrekten quwandıń. 7 Sonlıqtan Men de saǵan qarsı qol kóterip, seni xalıqlarǵa olja qılıp beremen. Seni xalıqlar arasınan joq qılaman, eller arasınan qurtıp, tuqımqurt qılaman. Sonda sen Meniń Jaratqan Iye ekenimdi bilip alasań».

Moab

8 «Quday Iye bılay deydi: Moab penen Seir: „Yahuda xalqınıń basqa xalıqlardan artıqmashlıǵı joq“, – dep ayttı. 9 Sonlıqtan Moabtıń qaptalın eldiń maqtanıshı bolǵan Beyt-Eshimot, Baal-Meon hám Kiryatayım qalalarınan baslap ashıp taslayman. 10 Moabtı ammon xalqı menen birge shıǵıs xalıqlarınıń iyeligine beremen. Ammon xalqı milletler arasında eske alınbaytuǵın boladı. 11 Men Moab ústinen húkim shıǵaraman. Sonda olar Meniń Jaratqan Iye ekenimdi bilip aladı».

Edom

12 «Quday Iye bılay deydi: Edom qaslıq penen Yahudadan ósh alıp, awır gúnaǵa qol urdı. 13 Sonlıqtan Quday Iye bılay deydi: Edomǵa qarsı qolımdı kóteremen, ondaǵı adamlardı hám haywanlardı joq qılaman, al eldi shólge aylandıraman. Temannan Dedanǵa shekemgi xalıq qılıshtan qırıladı. 14 Men xalqım Izraildıń qolı menen Edomnan ósh alaman. Olar Edomda Meniń qáhár-ǵázebim menen háreket etedi. Sonda edom xalqı Meniń ósh alıwımnıń qanday ekenin bilip aladı, – deydi Quday Iye».

Filist

15 «Quday Iye bılay deydi: Áyyemnen dushpanlıǵı bolǵan filistler yahudalılardan ósh alıwǵa háreket etti, júregindegi jek kóriwshilik sebepli olardı jer menen jeksen etip ósh aldı. 16 Sol sebepli Quday Iye bılay deydi: Mine, Men filistlerge qarsı qolımdı kóterip, keretlerdi joq qılaman hám olardıń teńiz jaǵasında qalǵanların qırıp jiberemen. 17 Ǵázep penen jazalap, olardan qattı ósh alaman. Sonda olar Meniń Jaratqan Iye ekenimdi bilip aladı».