‏ Ezekiel 26

Tir qalasına qarsı payǵambarshılıq

1Súrginde bolǵan waqtımızdıń on birinshi jılı, aydıń birinshi kúni maǵan Jaratqan Iyeden sóz tústi:

2– Insan ulı, Tir Erusalim tuwralı: «Hay-hay! Xalıqlardıń dárwazası bolǵan qala buzıldı. Men ushın qapıları ashıldı. Ol wayran boldı, men bolsam, bayıp ketemen», – dep atır. 3Sonlıqtan Quday Iye bılay deydi: «Tir, Men saǵan qarsıman. Men kóplegen milletlerdi saǵan qarsı kóteremen. Olar teńiz tolqınlarınıń kóterilgeni kibi saǵan japırılıp keledi. 4Olar diywallarıńdı wayran qılıp, minaralarıńdı qulatadı. Men qalanıń topıraǵın sıpırıp taslap, onı jalańash taslaqqa aylandıraman. 5Teńizdegi bul jer balıqshılar aw jayatuǵın jer boladı. Bunı Men aytıp turman, – deydi Quday Iye. – Tir qalası xalıqlarǵa olja boladı. 6Qurǵaqlıqtaǵı qalalarınıń turǵınları qılıshtan ótkeriledi. Sonda olar Meniń Jaratqan Iye ekenimdi bilip aladı.

7Quday Iye bılay deydi: Men patshalar patshası bolǵan Babiloniya patshası Nabuxodonosordı Tirge qarsı qozǵayman. Ol arqadan atlar, sawash arbaları, atlılar hám top-top láshkerlerin ertip keledi. 8Tir, olar qurǵaqlıqtaǵı qalalarıńnıń turǵınların qılıshtan ótkeredi. Qala átirapına qamal minaraların quradı, qala diywalına topıraq úyedi, saǵan qarsı qalqanlar ornatadı. 9Diywal buzatuǵın qurallar menen diywallarıńdı oyadı, shókkishleri menen minaralarıńdı buzadı. 10Atlardıń kópliginen seni shań-tozań qaplaydı. Dárwazalarıńnan kirgende, diywalları buzılǵan qalaǵa bastırıp kirgendey, atlılardıń, dóńgeleklerdiń hám arbalardıń shawqımınan diywallarıń titireydi. 11Atlarınıń tuyaqları barlıq kóshelerińdi basqılap taslaydı. Adamlarıń qılıshtan qırıladı, úlken kiyeli taslarıń jer menen jeksen boladı. 12Olar baylıǵıńdı talap, satılatuǵın buyımlarıńdı basıp aladı. Diywallarıńdı jıǵıp, sawlatlı imaratlarıńdı wayran qıladı, taslarıńdı, aǵashlarıńdı hám topıraǵıńdı teńizge ılaqtıradı. 13Men qosıqlarıńnıń aytılıwına shek qoyaman, liralarıńnıń ▼
▼ Lira – barmaq penen shertiletuǵın tarlı saz ásbabı.
 sesti qaytıp esitilmeydi. 14Seni jalańash taslaqqa aylandıraman, sen aw jayatuǵın orın bolasań. Endi hesh qashan qayta tiklenbeyseń. Bunı Men, Jaratqan Iye aytıp turman, – deydi Quday Iye.

15Quday Iye Tir qalasına bılay deydi: Qulawıńnıń shawqımınan, jaradarlardıń ıńqıldısınan, basıńa túsken qırǵınnan atawlardaǵı hám jaǵalawlardaǵı xalıqlar titiremey me? 16Barlıq teńiz húkimdarları óz taxtlarınan túsip, shapanların hám kesteli kiyimlerin sheshedi. Qorqınıshqa búrkenip jerge otıradı, toqtawsız qaltırasıp, awhalıńdı kórip ań-tań boladı. 17Keyin saǵan joqlaw aytıp, bılay deydi:

„O, teńizshiler jasaǵan,
Teńizde dańq taratqan qala,
Qalay nabıt boldıń!
Sen hám sende jasaǵanlar,
Teńizde qúdiretli edińler.
Teńizdiń jaǵasında jasaytuǵınlardıń hámmesiniń,
Húreyin ushırdıń.
 18Sen qulaǵan kúni atawlar titiredi,
Teńiz jaǵasındaǵılar seniń nabıt bolıwıńnan qorqıp qaldı“.

19Quday Iye bılay deydi: Seni adamsız qalǵan qalaǵa uqsatıp, qarabaqanaǵa aylandırǵanımnan keyin, tuńǵıyıq suwların kóterip, úlken suwlardı ústińe bastırǵanımnan keyin, 20seni ólim shuqırına túskenler menen birge áyyemgi xalıqtıń janına túsiremen. Tuńǵıyıqqa túskenler menen birge, eski qarabaqanalar arasına, jer astındaǵı dúnyaǵa ornalastıraman. Solay etip, saǵan hesh kim mákan baspaydı hám sen tiriler áleminde húrmetke erispeyseń.

21Men aqıbetińdi qorqınıshlı qılaman, sen joq bolasań. Seni izleydi, biraq hesh qashan taba almaydı, – deydi Quday Iye».
Copyright information for KaaIBT22L