‏ Ezekiel 27

Tir ushın joqlaw aytıw

1Maǵan Jaratqan Iyeden sóz tústi:

2– Insan ulı, Tirge arnap joqlaw ayt. 3Teńiz dárwazasında mákan basqan hám jaǵalawlardaǵı xalıqlar menen sawda-satıq qılatuǵın Tir qalasına ayt: «Quday Iye bılay deydi:

Tir, sen: „Men gózzallıqta minsizben“, – dediń.
4Seniń shegaralarıń teńiz qoynında edi.
Qurılısshılarıń gózzallıǵıńdı minsizlikke eristirdi.
5Qaptal taxtaylarıń Senir tawındaǵı sárwi aǵashlarınan,
Tayınlanǵan úlken kemedey ediń.
Óreligińdi soǵıw ushın,
Lebanonnan kedr aǵashın alıp keldi.
6Eskeklerińdi Bashan emenlerinen,
Edenlik taxtaylarıńdı Kittim jaǵalawlarındaǵı qaraǵaylardan soǵıp,
Pildiń súyegi menen bezedi.
7Mısırdıń naǵıslı zıǵır tawarı,
Saǵan jelqom qılıp qoyıldı,
Ol sen ushın bayraq boldı.
Elisha jaǵalawlarınan alıp kelingen,
Qızǵısh kók hám shım qızıl tawarlar saǵan sayaban qılındı.
8Eskekshileriń Sidon hám Arwad turǵınları edi,
Sheber adamlarıń, Tir,
Seniń darǵalarıń edi.
9Kemeniń jarıqların pitew ushın,
Geballı tájiriybeli adamlar hám ustalar sende bar edi.
Aldı-sattı qılıw ushın,
Teńizdegi barlıq kemeler hám teńizshiler saǵan keletuǵın edi.
10Parsılar, Lud hám Put adamları,
Ásker bolıp xızmet etti.
Qalqan hám duwlıǵaların saǵan asıp qoyıp,
Olar seni dańqqa eristirdi.
11Arwad hám Xelexten kelgenler,
Diywallarıńda aylanıp turıp saqshılıq etti.
Gammadtan kelgenler minaralarıńda xızmet etti.
Olar qalqanların diywallarıńa asıp qoyıp,
Kórkińe kórik qostı.

12Seniń baylıǵıń asa kóp bolǵanlıqtan, Tarshish te seniń menen sawda-satıq isledi. Olar bergen zatlarıńnıń ornına gúmis, temir, qalayı hám qorǵasın berdi. 13Yawan, Tubal hám Meshex sawdagerleri seniń menen sawda isledi. Olar sen bergen zatlardıń ornına qullardı hám qoladan islengen buyımlardı berdi. 14Togarma turǵınları sen bergen zatlardıń ornına yabılardı, áskeriy atlardı hám ǵashırlardı berdi. 15Dedan xalqı da seniń menen sawda-satıq qıldı. Teńiz jaǵasındaǵı kóplegen ellerdiń bazarı seniń qolıńda edi. Olar pil súyegin hám ebon teregin saǵan tólem qılıp beretuǵın edi. 16Zatlarıńnıń kópligi sebepli, Aram da seniń menen sawda-satıq qıldı. Olar seniń zatlarıńnıń ornına periwza taslar, shım qızıl gezlemeler, naǵıslı kiyimler, hasıl zıǵır tawarlar, marjan hám rubin berdi. 17Yahuda menen Izrail da seniń menen sawda-satıq qıldı. Olar seniń buyımlarıńnıń ornına Minnitten alıp kelingen biyday, sonday-aq mazalı zatlar, pal, záytún mayın hám málhám berdi. 18Seniń zatlarıńnıń kópligi hám sheksiz baylıǵıń sebepli, Damask Xelbonnan sharap hám Zaxardan jún alıp kelip, seniń menen sawda-satıq qıldı. 19Uzaldan kelgen Wedan hám Yawan xalıqları sennen zatlar satıp alıp, olardıń ornına islew berilgen temir, kassiya hám xosh iyisli qamıs beretuǵın edi. 20Dedan attıń erine jabatuǵın qımbatbaha gilemleri menen sawda qıldı. 21Arabstan hám Kedardıń barlıq biyleri seniń qarıydarlarıń edi. Olar qozılar, qoshqarlar hám eshkiler alıp kelip, seniń menen sawda isledi. 22Sheba menen Raamanıń sawdagerleri seniń menen sawda qılıp, alǵan zatlarınıń ornına eń jaqsı xosh iyisli zatlar, qımbatbaha taslar hám altın beretuǵın edi. 23Xaran, Kanne, Eden qalaları, Sheba, Ashshur hám Kilmad sawdagerleri seniń menen sawda-satıq qıldı. 24Olar qımbatbaha kiyimler, qızǵısh kók hám naǵıslı gezlemeler, ráńbáráń gilemler hám jaqsılap esilgen jiplerdi saǵan sattı. 25Úlken sawda kemeleri kárwanlarıń bolıp xızmet etti.

Sen teńiz qoynında awır júkke toldıń.
26Eskekshileriń seni ashıq teńizge alıp shıqtı.
Shıǵıs samalı seni teńiz qoynında qıyrattı.

27Qıyraǵan kúniń, baylıǵıń, zatlarıń, buyımlarıń, teńizshileriń, darǵalarıń, jarıqlardı pitewshileriń, sawdagerleriń, áskerleriń hám kemede bolǵan hámme adamlarıń teńiz túbine ǵarq boladı.

28Darǵalarıńnıń qıshqırıǵınan,
Jaǵadaǵı dala lárzege keledi.
29Barlıq eskekshiler kemelerin tárk etedi.
Teńizshiler hám darǵalar jaǵaǵa shıǵıp aladı.
30Olar sen ushın páriyad qıladı,
Dadlap ashshı kóz jas tógedi.
Baslarına topıraq shashıp,
Kúlge awnaydı.
31Shashların aldırıp,
Aza kiyimin kiyedi.
Seniń ushın júrekleri ezilip,
Zar eńirep, aza tutadı.
32Olar aǵıl-tegil bolıp jılap,
Sen ushın bılay dep joqlaw aytadı:

„Teńiz ortasında qıyraǵan,
Tir kibi basqa qala bar ma?
33Zatlarıń teńizden shıqqanda,
Kóp milletlerdi toydırdıń.
Baylıǵıńnıń hám aldı-sattıńnıń kópligi menen,
Jerdiń patshaların bayıttıń.
34Al teńizde qıyrap, suw túbine shókkenińde,
Buyımlarıń hám adamlarıń seniń menen birge suwǵa ǵarq boldı.
35Atawlarda jasawshılar sen tuwralı esitkende, janları túrshikti,
Patshalarınıń zárresi ushıp, júzinde qan qalmadı.
36Basqa xalıqlardıń sawdagerleriniń janı túrshikti.
Aqıbetiń qorqınıshlı boldı,
Sen máńgige joq bolasań“».