‏ Ezekiel 28

Tir patshasına qarsı payǵambarshılıq

1Maǵan Jaratqan Iyeden sóz tústi:

2– Insan ulı, Tirdiń húkimdarına ayt: «Quday Iye bılay deydi: Seniń kókiregiń kóterilip: „Men qudayman, teńiz qoynındaǵı qudaylardıń taxtında otırıppan“, – dediń. Óziń quday emes, adam bola tura, ózińdi qudayǵa teń bileseń. 3Sen Danielden de dana ekenseń-dá, sennen jasırın sır joq eken-dá! 4Danalıǵıń hám aqılıń menen baylıq arttırdıń hám ǵáziynexanańa altın menen gúmis jıynadıń. 5Sawda-satıqtaǵı danalıǵıń menen baylıq arttırdıń hám baylıǵıń sebepli menmensip kettiń.

6Sonlıqtan Quday Iye bılay deydi: Ózińdi qudayday dana bilgeniń ushın, 7ústińe jat jerlilerdi, xalıqlardıń eń jawızın alıp kelemen. Olar danalıǵıń jaratqan gózzallıqqa qarsı qılıshların jalańashlaydı hám nurlı saltanatıńdı sóndiredi. 8Ózińdi górge tıǵadı hám sen teńiz qoynındaǵı qalańda jawızlıq penen óltirileseń. 9Sonda ózińdi óltirgenler aldında: „Men qudayman“, – dey alasań ba? Ózińdi óltirgenlerdiń qolında sen quday emes, al ápiwayı bir adam bolasań. 10Sen jat jerlilerdiń qolınan súnnetsizlerdiń ólimi menen óleseń. Bunı Men aytıp turman, – deydi Quday Iye».

11Maǵan Jaratqan Iyeden sóz tústi:

12– Insan ulı, Tir patshası ushın joqlaw ayt hám oǵan Quday Iye bılay deydi dep ayt:

«Sen minsizlik tımsalısań,
Danalıqqa tolǵan, gózzallıqta bárkamal ediń.
13Sen Edende, Qudaydıń baǵında ediń.
Serdolik, xrizolit, gagat,
Sarı yaqıt, oniks, yashma,
Lazurit, periwza, zúmret sıyaqlı,
Qımbatbaha taslarǵa bezendiń.
Bezeniw buyımlarıń altınnan islengen edi.
Sen jaratılǵan kúni, bular tayarlanǵan edi.
14Sen maylanǵan qorǵawshı kerub ediń,
Usı iske seni Men qoyǵan edim.
Sen Qudaydıń muxaddes tawı ústinde ediń,
Otlı taslar arasında júrer ediń.
15Jaratılǵan kúnińnen baslap,
Qılmısqa qol urǵanǵa deyin,
Óz jolıńda minsiz ediń.
16Sawdańnıń kópligi sebepli,
Ishiń nahaqlıqqa toldı,
Gúnaǵa qol urdıń.
Men seni haram dep sanap,
Qudaydıń tawınan ılaqtırdım.
Qorǵawshı kerub, seni,
Otlı taslardıń arasınan quwıp jiberdim.
17Gózzallıǵıń sebepli júregiń tákabbirlendi,
Dańqparazlıǵıń sebepli danalıǵıńdı joq qıldıń.
Soǵan bola, Men seni jerge ılaqtırdım,
Patshalar aldında shermende qıldım.
18Qılmıslarıńnıń kópligi menen,
Sawda-satıqtaǵı nahaqlıǵıń menen,
Óz muxaddes orınlarıńdı haramladıń.
Sonda Men ortańnan ot shıǵardım,
Ol seni jalmap qoydı.
Kórgenlerdiń kóz aldında,
Seni kúlge aylandırdım.
19Xalıqlar arasında seni tanıytuǵınlardıń hámmesi,
Awhalıńa tań qaldı.
Aqıbetiń qorqınıshlı boldı,
Sen máńgige joq bolasań».

Sidonǵa qarsı payǵambarshılıq

20Maǵan Jaratqan Iyeden sóz tústi:

21– Insan ulı, júzińdi Sidonǵa qaray burıp, oǵan qarsı payǵambarshılıq qıl. 22Oǵan Quday Iye bılay deydi dep ayt:

«Háy, Sidon, Men saǵan qarsıman.
Men seniń ishińde dańqqa erisemen.
Saǵan húkim shıǵarıp,
Óz muxaddesligimdi ayan qılǵanımda,
Hámme Meniń Jaratqan Iye ekenimdi bilip aladı.
23Men Sidonǵa illet jiberemen,
Kóshelerinde qan tógiledi.
Ján-jaqtan urılǵan qılıshtan,
Qala ortasında qaza tapqanlar qulap jatadı.
Sonda olar Meniń Jaratqan Iye ekenimdi bilip aladı».

24Izrail xalqın jek kóretuǵın qońsılardıń hesh biri, endi qaytıp Izrailǵa jaralawshı tiken yamasa tikenli jantaqtay bolmaydı. Sonda olar Meniń Quday Iye ekenimdi biledi.

25Quday Iye bılay deydi: Xalıqlar arasına tarqatıp jiberilgen izraillılardı jıynap alǵanımda, milletlerdiń kóz aldında olarǵa Óz muxaddesligimdi ayan etemen. Keyin olar óz jerlerine, qulım Yaqıpqa bergen jerlerge mákan basadı. 26Ol jerde qáwipsiz jasaydı, úyler quradı, júzimzarlar otırǵızadı. Dógerektegi olardı jek kórgenlerge húkim shıǵarǵanımnan keyin, olar qáwipsizlikte jasaydı. Sonda olar Meniń ózleriniń Qudayı Jaratqan Iye ekenimdi bilip aladı.