‏ Ezekiel 3

1Ol maǵan:

– Insan ulı, aldıńdaǵı bul orama qaǵazdı je, keyin barıp, Izrail xalqı menen sóyles, – dedi. 2Men awzımdı ashtım, Ol maǵan orama qaǵazdı jewge berdi. 3Keyin maǵan:

– Insan ulı, Men ózińe berip atırǵan usı orama qaǵazdı jep, qarnıńdı toydır, – dedi. Men orama qaǵazdı jedim, ol awzımda palday tatlı boldı. 4Ol maǵan jáne bılay dedi:

– Insan ulı, endi barıp, Izrail xalqına Meniń sózlerimdi ayt. 5Seni túsiniksiz sóyleytuǵın, tili awır xalıqqa emes, al Izrail xalqına jiberip atırman. 6Eger Men seni túsiniksiz sóyleytuǵın, tili awır hám sózlerine túsinip bolmaytuǵın kóp milletler arasına jibergenimde edi, olar saǵan sózsiz qulaq salǵan bolar edi. 7Biraq Izrail xalqı saǵan qulaq salmaydı, olar, hátte, Maǵan da qulaq salmaydı. Óytkeni pútkil Izrail xalqı ójet hám qaysar. 8Mine, Men seni de olardıń ózleri sıyaqlı ójet hám qaysar qılaman. 9Men seni miytindey bekkem qılaman. Olar qozǵalańshı xalıq bolsa da, olardan qorqıp, qáweterlenbe.

10Ol maǵan jáne mınalardı ayttı:

– Insan ulı! Meniń saǵan aytqanlarımdı dıqqat penen tıńlap, hámmesin júregińde saqla! 11Endi súrgindegi jerleslerińe bar da, tıńlasa da, tıńlamasa da, olarǵa: «Quday Iye bılay demekte», – dep ayt.

12Keyin Ruwx meni kóterip aldı. Sonda men art jaǵımnan: «Jaratqan Iyeniń saltanatı Óz mákanında alǵıslansın», – degen bálent, gúmbirlegen dawıstı esittim. 13Bul janzatlardıń qanatlarınıń bir-birine tiygen hám olardıń janındaǵı dóńgeleklerdiń gúmbirlegen dawısı edi. 14Ruwx meni joqarı kóterip, basqa jaqqa alıp ketti. Men bolsam, hásiretke hám ǵázepke tolıp, kete berdim. Jaratqan Iyeniń ústime sozılǵan qolı awır edi. 15Keyin men Kebar kanalınıń boyındaǵı Tel-Abibte jasap atırǵan súrgindegilerge bardım. Sol jerde olardıń arasında jeti kún dawamında ózime kele almay, ań-tań bolıp otırdım.

Ezekieldiń Izrailǵa gúzetshi etip qoyılıwı

16Sol jeti kún ótkennen keyin, Jaratqan Iyeden maǵan sóz tústi:

17– Insan ulı! Men seni Izrail xalqına gúzetshi etip tayınladım. Sen Meniń awzımnan shıqqan sózlerdi tıńlap, olardı Meniń atımnan eskert. 18Eger Men nahaq adamǵa: «Sen sózsiz óleseń», – desem, al sen onıń ómirin saqlap qalıw ushın, onıń menen sóylesip, nahaqlıq jolınan qaytıwdı eskertpeseń, onda ol óz gúnası ushın óledi. Biraq Men onıń qanınıń qunın sennen talap qılaman. 19Eger sen nahaqtı eskertseń, biraq ol jawızlıǵınan da, nahaqlıq jolınan da qaytpasa, onda ol óz gúnası ushın óledi, al sen óz janıńdı saqlap qalasań. 20Eger haq adam haqlıǵınan bas tartıp, nahaqlıqqa qol ursa, Men onı súrniktiremen, ol óledi. Sen oǵan eskertpegeniń sebepli, ol óz gúnası ushın óledi hám islegen jaqsı isleri eske alınbaydı. Al Men onıń qanınıń qunın sennen talap etemen. 21Eger sen haq adamǵa gúna islemewdi eskertseń hám ol gúna islemese, onda ol sózsiz jasaydı. Sebebi ol eskertiwge qulaq saldı, al sen bolsań, óz janıńdı saqlap qalasań.

22Sol jerde Jaratqan Iyeniń qolı meniń ústimde boldı hám Ol maǵan:

– Turıp, oypatlıqqa tús, Men seniń menen sol jerde sóylesemen, – dedi.

23Men turıp, oypatlıqqa tústim. Sol jerde Jaratqan Iyeniń saltanatı maǵan Kebar kanalı janında kóringendey bolıp tur eken. Men et betimnen jerge jıǵıldım. 24Ruwx maǵan kirip, meni ayaqqa turǵızıp qoydı. Ol maǵan til qatıp bılay dedi:

– Úyińe kirip, esigińdi ishten ilip al. 25Endi bolsa, insan ulı, seni arqan menen shırmap baylap taslaydı. Sóytip, sen xalıqtıń arasına shıǵa almaysań. 26Bul qozǵalańshı xalıqtı áshkaralamawıń ushın, Men seni gúń qılıp, tilińdi tańlayıńa jabıstırıp taslayman. 27Biraq saǵan til qatqanımda, sen olarǵa: «Quday Iye bılay dep atır», – dep aytıwıń ushın seni tilge kirgizemen. Tıńlaǵısı kelgenler tıńlasın, tıńlaǵısı kelmegenler tıńlamay-aq qoysın. Aqırı, olar qozǵalańshı xalıq ǵoy!