Eze 31 | KaaIBT22L | STEP | Súrginde bolǵan waqtımızdıń on birinshi jılınıń úshinshi ayınıń birinshi kúni maǵan Jaratqan Iyeden sóz tústi:

‏ Ezekiel 31

Kedr aǵashı tuwralı tımsal

1 Súrginde bolǵan waqtımızdıń on birinshi jılınıń úshinshi ayınıń birinshi kúni maǵan Jaratqan Iyeden sóz tústi:

2 – Insan ulı, Mısır patshası faraonǵa hám onıń sansız xalqına bılay dep ayt:

«Ullılıqta saǵan teń keletuǵın kim bar?
3 Ánekey, sulıw shaqalı, qoyıw sayalı,
Lebanondaǵı kedr aǵashına uqsaǵan,
Assiriyaǵa qara!
Onıń boyı bálent bolıp,
Tóbesi bultlarǵa tiyip turatuǵın edi.
4 Suwlar onı suwǵardı,
Jer astı bulaqları onı ósirdi.
Aǵısları ol ósken jerden aqtı,
Tarmaqları toǵaydaǵı hámme tereklerdi qandırdı.
5 Ol toǵaydaǵı barlıq tereklerden biyik bolıp ósti,
Suwǵa jaqsılap qanǵanlıqtan,
Baldaqları irilenip,
Shaqaları uzaydı.
6 Aspandaǵı barlıq quslar,
Shaqalarına uya saldı.
Barlıq jabayı haywanlar,
Shaqaları astında balaladı.
Barlıq ullı milletler,
Onıń sayasında jasadı.
7 Ol óziniń bálentligi menen,
Shaqalarınıń uzınlıǵı menen kórkem edi.
Sebebi tamırı ullı suwlarǵa tiyip turǵan edi.
8 Qudaydıń baǵındaǵı kedrler onıń menen bellese almas edi.
Sárwiler onıń putaqlarına teń kelmes edi.
Shınarlardıń shaqaları onıkindey emes edi.
Qudaydıń baǵındaǵı birde bir terek,
Gózzallıqta oǵan teń kelmes edi.
9 Men onı qalıń shaqalar menen bezedim,
Qudaydıń Eden baǵındaǵı hámme aǵashlar,
Oǵan háwes qılar edi.

10 Sonlıqtan Quday Iye bılay deydi: Onıń boyı ósip, tóbesi bultlarǵa jetkende, ol biyikliginen tákabbirlenip ketti. 11 Sonıń ushın Men onı milletlerdiń húkimdarınıń qolına berdim hám ol onı óz jawızlıǵına jarasa jazaladı. Men onı quwıp jiberdim. 12 Xalıqlar arasındaǵı eń jawızı onı kesip, taslap ketti. Shaqaları tawlarǵa hám oypatlıqlarǵa túsip, sınǵan putaqları jerdiń barlıq say-salalarında shashılıp jattı. Jer betindegi hámme milletler onıń sayasın tárk etip, ózin taslap ketti. 13 Aspandaǵı barlıq quslar qulaǵan aǵashqa kelip qondı, barlıq jabayı haywanlar shaqaları arasına jaylastı. 14 Endigiden bılay, suw boyında ósken hesh bir terek bunday bálent bolıp ósip, tóbesi bultlarǵa tiymewi, mol suw iship ósken hesh bir terek bunday dárejede bálent bolmawı ushın usılay boldı. Olardıń hámmesi górge kirgen adamlar menen birge ólimge, jer astındaǵı dúnyaǵa tapsırılǵan.

15 Quday Iye bılay deydi: Kedr aǵashı óliler mákanına kirgen kúni, Men onıń ushın aza tutsın dep, jer astı suw kózlerin bekittim. Olardıń aǵısın toqtattım, mol suwların aǵızbay qoydım. Bul aǵash ushın pútkil Lebanondı túnekke qapladım, barlıq tereklerin solıttım. 16 Men onı górge kirgenler menen birge óliler mákanına túsirgenimde, qulawınıń shawqımınan milletlerdi titirettim. Sonda Eden baǵınıń barlıq terekleri de, Lebanonnıń eń jaqsı hám saylandı terekleri de, mol suw iship ósken terekler de jer astındaǵı dúnyada táselle taptı. 17 Onıń sayasında jasaǵanlar, yaǵnıy xalıqlar arasındaǵı onıń awqamlasları onıń menen birge óliler mákanına túsip, qılıshtan qaza tapqanlarǵa qosıldı. 18 Eden baǵındaǵı tereklerdiń qaysı biri dańq-ataqta hám ullılıqta saǵan teń keledi eken? Biraq sen Eden terekleri menen birge jer astındaǵı dúnyaǵa kireseń. Sen qılıshtan qaza tapqanlar menen birge súnnetsizlerdiń arasında jatasań. Bul faraonnıń hám onıń sansız xalqınıń tımsalı, – deydi Quday Iye».