‏ Ezekiel 32

Faraon ushın joqlaw aytıw

1Súrginde bolǵan waqtımızdıń on ekinshi jılınıń on ekinshi ayınıń birinshi kúni maǵan Jaratqan Iyeden sóz tústi:

2– Insan ulı, Mısır patshası faraon ushın bılay dep joqlaw ayt:

«Sen ózińdi xalıqlar arasındaǵı arıslan dep bileseń,
Biraq óziń teńizdegi aydarhaǵa uqsaysań.
Dáryalarıńa boy taslaysań,
Ayaqlarıń menen suwlardı basqılaysań,
Tarmaqların ılaytasań.
3Quday Iye bılay deydi:
Ústińe torımdı taslayman.
Kóplegen xalıqlar jıynalıp,
Torım menen seni tartıp shıǵaradı.
4Seni jerge ılaqtıraman,
Ashıq maydanǵa taslayman.
Aspandaǵı barlıq quslardı ústińe qondıraman,
Jer betindegi barlıq jabayı haywanlar saǵan toyadı.
5Góshińdi tawlarǵa jayıp taslayman,
Oypatlıqlardı óligińe toltıraman.
6Jerdi tawlarǵa deyin aqqan qanıńa qandıraman,
Say-salalardı etińe toltıraman.
7Seni gúm qılǵanımnan keyin, kóklerdi jawaman,
Ondaǵı juldızlardı túnertemen,
Quyashtıń júzin bult penen qaplayman,
Ay da sáwle shashıwın toqtatadı.
8Aspandaǵı barlıq jaqtılıq shıraqların,
Ústińde qarańǵı qılaman,
Jerińdi zulmat penen qaplayman,
– deydi Quday Iye –
9– Jer boylap, sen tanımaytuǵın xalıqlar arasında,
Seniń qulaǵanıńdı járiyalap,
Kóp xalıqlardıń júregine ǵulǵıla salaman.
10Kóp xalıqlardı saǵan hayran qaldıraman,
Aldında qılısh oynatqanımda,
Olardıń patshaları sen sebepli qaltırap qorqadı.
Sen qulaǵan kúni,
Hár biri óz janı ushın hár sátte titireydi.

11Quday Iye bılay deydi:
Babiloniya patshasınıń qılıshı saǵan dúbeydi.
12Xalıqlar arasındaǵı eń jawızı bolǵan,
Kúshli áskerlerdiń qılıshı menen,
Seniń kóp sanlı xalqıńdı qıraman.
Olar Mısırdıń menmenligin ayaq astı qılıp,
Sansız xalqın qırıp joyadı.
13Mol suwlar janında baǵılıp atırǵan,
Pútkil malların joq qılaman,
Bunnan bılay, adam ayaǵı da,
Haywan tuyaǵı da bul suwlardı basqılamaydı.
14Sonda suwlardı tındıraman,
Dáryaların mayday bolıp aǵatuǵın qılaman,
– deydi Quday Iye. –
15Mısır jerin qańıratıp, bos qaldırǵanımda,
Onı hámme nársesinen jurday etkenimde,
Onda jasaytuǵınlardı qırıp taslaǵanımda,
Olar Meniń Jaratqan Iye ekenimdi bilip aladı.

16Mine bul, milletlerdiń qızları aytatuǵın joqlaw. Mısır hám onıń kóp sanlı xalqı tuwralı usı joqlawdı aytadı, – deydi Quday Iye».

Mısır óliler mákanına túsedi

17Súrginde bolǵan waqtımızdıń on ekinshi jılı, aydıń on besinshi kúni maǵan Jaratqan Iyeden sóz tústi:

18– Insan ulı, Mısırdıń kóp sanlı xalqı ushın qayǵırıp jıla. Olardı hám kúshli milletlerdiń qızların górge kirgenler menen birge jer astındaǵı dúnyaǵa jiber. 19Olarǵa bılay dep ayt: «Sen ózińdi basqalardan unamlıman dep oylaysań ba? Túsip, súnnetsizler menen birge jat».

20Olar qılıshtan qaza tapqanlardıń arasında jan tapsıradı. Qılısh berildi. Mısırdı hám onıń kóp sanlı xalqın qırıp taslań. 21Óliler mákanındaǵı eń kúshli sárkárdalar Mısır hám onıń awqamlasları tuwralı: «Qılıshtan ótkerilgen súnnetsizler jer astına túsirildi, olar sol jerde jatırıptı», – deydi.

22Assiriya hám onıń pútkil áskerleri sol jerde jatır. Qılıshtan qaza tapqan áskerleriniń qábirleri átirapın qorshap alǵan. 23Olardıń qábirleri tuńǵıyıqtıń eń túbinde, áskerleri onıń átirapında. Tiriler áleminiń húreyin ushırǵanlardıń hámmesi qılıshtan ótkerilip óltirildi.

24Elam da sol jerde, kóp sanlı xalqı da onıń qábiriniń átirapında. Olardıń hámmesi qılıshtan qaza tapqan. Tiriler áleminiń húreyin ushırǵan bul súnnetsizler jer astındaǵı dúnyaǵa tústi. Olar tuńǵıyıqqa túskenler menen birge óz shermendeligin alıp ketti. 25Elamǵa hám onıń kóp sanlı xalqına óltirilgenler arasınan orın berildi. Adamları onıń dógeregine qoyıldı. Olardıń hámmesi súnnetsiz bolıp, qılıshtan ótkerilgen edi. Olar tiriler áleminiń húreyin ushırǵan edi, endi tuńǵıyıqqa túskenler menen birge óz shermendeligin alıp ketti. Olar qaza tapqanlardıń arasına ornalastı.

26Meshex penen Tubal da sol jerde kóp sanlı xalqı menen birge jatır. Adamlarınıń qábirleri olardıń átirapında. Bul súnnetsizler de tiriler áleminiń húreyin ushırǵanı ushın qılıshtan qaza tapqan. 27Olar óliler mákanına qural-jaraqları menen kirgen, qılıshları basına qoyılǵan, súnnet etilmegen batırlar menen birge jatpaydı. Meshex penen Tubaldıń gúnaları súyeklerine ornalasıp alǵan. Óytkeni olar batırlar kibi tiriler áleminiń húreyin ushırdı. 28Faraon, sen de tas-talqan qılınıp, qılıshtan qaza tapqanlar menen birge súnnetsizler arasında jatasań.

29Edom da óz patshaları hám barlıq húkimdarları menen birge ol jerde. Kúshliligine qaramastan, olardıń hámmesi qılıshtan qaza tapqanlar menen birge qoyılǵan. Olar súnnetsizler hám tuńǵıyıqqa túskenler menen birge jatır.

30Arqa táreptiń barlıq basshıları menen sidonlılar da sol jerde. Olar kúshli bolıp, adamlardıń húreyin ushırǵanına qaramastan, qaza tapqanlar menen birge shermendelik penen ol jerge kirdi. Bul súnnetsizler qılıshtan qaza tapqanlar menen birge jatır hám tuńǵıyıqqa túskenler menen birge óz shermendeligin alıp ketti.

31Faraon hám onıń barlıq áskerleri bulardı kórip, ózleriniń qılıshtan qaza tapqan sansız xalqı ushın táselle tabadı, – deydi Quday Iye. 32– Men olarǵa tiriler áleminiń húreyin ushırıwǵa jol bergen bolsam da, faraon hám onıń sansız xalqı qılıshtan qaza tapqanlar menen birge súnnetsizlerdiń arasında jatadı, – deydi Quday Iye.