‏ Ezekiel 33

Qudaydıń Ezekieldi Izrailǵa gúzetshi qılıp tayınlawı

1Maǵan Jaratqan Iyeden sóz tústi:

2– Insan ulı, óz xalqıń menen sóylesip, olarǵa bılay dep ayt: «Eger Men bir elge qılısh jibersem, sol jerdiń xalqı ózlerinen bir adamdı saylap, onı gúzetshi qılıp tayınlaydı. 3Ol jerine kiyatırǵan qılıshtı kórip, kárnay shalıp, xalqın eskertedi. 4Eger birew kárnaydıń sestin esitse de, saqlanbasa hám qılısh kelip, onı óltirse, onıń qanı óz moynında qaladı. 5Ol kárnay sestin esitip turıp, itibar bermegeni ushın, óz ólimine ózi ayıplı. Al ózin qáwipten saqlaǵan adam óz ómirin saqlap qaladı. 6Eger gúzetshi qılısh kiyatırǵanın kórse hám xalqın eskertiw ushın kárnay shalmasa, qılısh kelip, olardan birewiniń janın alsa, onda bul adam óz gúnası ushın óledi. Biraq onıń qanınıń qunın Men gúzetshiden talap etemen».

7Insan ulı, Men seni Izrail xalqına gúzetshi etip tayınladım. Sen Meniń awzımnan shıqqan sózlerdi tıńlap, olardı Meniń atımnan eskert. 8Men nahaq adamǵa: «Nahaq adam, sen sózsiz óleseń!» – desem, al sen nahaqtı jolınan qaytarıw ushın hesh nárse aytpasań, onda nahaq óz gúnası ushın óledi. Biraq Men onıń qanınıń qunın sennen talap qılaman. 9Eger sen nahaqtı jolınan qaytarıw ushın eskertseń, biraq ol óz jolınan qaytpasa, ol óz gúnası ushın óledi, al sen óz janıńdı saqlap qalasań.

10Insan ulı, sen Izrail xalqına sizler bılay deysizler dep ayt: «Bizler qılmıslarımız benen gúnalarımızǵa kómildik, olar bizlerdiń dimarımızdı qurtıp atır. Bul awhalda qalay tiri qalamız?» 11Olarǵa bılay dep ayt:

«Men, Quday Iye Óz tiriligim haqı aytaman: Men nahaq adamnıń ólimin qálemeymen, onıń óz jolınan qaytıp, jasawın qáleymen. Qaytıńlar! Jaman jollarıńızdan qaytıńlar! Nege óliwińiz kerek, Izrail xalqı?!»

12Insan ulı, óz xalqıńa bılay dep ayt: «Eger haq adam gúna islese, onıń haqlıǵı onı qutqara almaydı. Eger nahaq adam tuwrı jolǵa kirse, qılǵan qılmısları qulawına sebep bolmaydı. Sol sıyaqlı, haq adam gúna islese, burınǵı haqlıǵı onı tiri saqlap qala almaydı. 13Eger Men haq adamǵa jasaytuǵının aytsam, al ol haqlıǵına isenip, gúnaǵa qol ursa, onda onıń burınǵı haqlıǵı eske alınbaydı, qaytama, ol islegen jawızlıǵı ushın óledi. 14Al nahaq adamǵa sózsiz óletuǵının aytsam, ol gúnalarınan júz burıp, tuwrılıq hám ádillikti júzege asırsa, 15qarızı ushın girewge alǵan zatın da, urlaǵan zatın da qaytarıp berse, ómirge eristiretuǵın qaǵıydalardı orınlasa hám qaytıp zulımlıq qılmasa, ol sózsiz jasaydı, ólmeydi. 16Ol islegen gúnalardıń hesh biri eske alınbaydı. Bul adam tuwrı hám ádil isler qılǵanı ushın, sózsiz jasaydı».

17Seniń xalqıń: «Iyeniń jolı natuwrı», – deydi. Biraq ózleriniń jolı natuwrı. 18Eger haq adam haqlıǵınan tayıp, natuwrı islerge qol ursa, bunıń ushın óledi. 19Eger nahaq adam nahaqlıǵın taslap, ádil hám tuwrı islerdi isley baslasa, ol usılay islep, janın saqlap qaladı. 20Sizler bolsańız: «Iyeniń jolı natuwrı», – deysiz. Izrail xalqı, Men sizlerdiń hár birińizdi isińizge jarasa húkim qılaman.

Erusalimniń qulawı

21Súrginde bolǵan waqtımızdıń on ekinshi jılınıń onınshı ayınıń besinshi kúni Erusalimnen qashıp qutılǵan bir adam maǵan kelip:

– Qala basıp alındı, – dedi.

22Sol qashqın kelmesinen bir kún burın keshte Jaratqan Iyeniń qolı meniń ústimde boldı. Qashqın azanda aldıma kelmey turıp, Ol maǵan sóylew qábiletin qaytarıp berdi. Men jáne tilge kirdim ▼

▼ 3:26-27; 24:26-27.

. 23Maǵan Jaratqan Iyeden sóz tústi:

24– Insan ulı, Izrail jeriniń wayran bolǵan jerlerinde jasap júrgen adamlar: «Ibrayım jalǵız ózi bolsa da, bul jerge iyelik qılǵan edi. Al bizler kóppiz, sonlıqtan bul jerdiń bizlerge iyelikke berilgenin anıq bilemiz», – dep aytpaqta. 25Sonlıqtan olarǵa ayt: «Quday Iye bılay deydi: Sizler góshti qanı menen jeysiz, butlarǵa tabınasız, qan tógesiz. Solay qıla tura, bul jerge iyelik qılmaqshımısız? 26Sizler qılıshıńızǵa isenesiz, jerkenishli islerdi qılasız, hár birińiz basqa adamnıń hayalın haramlaysız. Solay qıla tura, bul jerge iyelik qılmaqshımısız?» 27Olarǵa ayt: «Quday Iye bılay deydi: Tiriligim haqı ant ishemen: wayran bolǵan jerde jasap atırǵanlar qılıshtan nabıt boladı. Ashıq dalada bolǵanlardı Men jabayı haywanlarǵa jem qılaman. Bekinisli jerlerde hám úńgirlerde bolǵanlar illetten óledi. 28Bul jerdi qańıraǵan shólistanǵa aylandıraman. Onıń maqtanıshlı qúdireti payanına jetedi. Izrail tawlarında da adam qalmaydı, ol jerge hesh kim ayaq baspaydı. 29Islegen jerkenishli isleri ushın jerdi qańıraǵan shólistanǵa aylandırǵanımda, olar Meniń Jaratqan Iye ekenimdi bilip aladı».

30Insan ulı, jerlesleriń diywallar qasında hám úyleriniń bosaǵasında turıp, sen tuwralı bir-birine: «Júriń, Jaratqan Iyeden qanday sóz kelgen eken, esiteyik», – dep atır. 31Olar toparlasıp keledi. Meniń xalqım seniń aldıńda otıradı, sózlerińdi tıńlaydı, biraq olardı orınlamaydı. Olar tillerinde jaǵımpazlanǵanı menen, júreklerinde óz paydasın gózleydi. 32Sen olar ushın, jaqsı sazende hám muhabbat haqqında qosıq aytatuǵın xosh hawaz qosıqshısań. Olar sózlerińdi esitedi, biraq olardı orınlamaydı. 33Bular júzege asqanda, mine, júzege asıp ta atır, olar ózleriniń arasında bir payǵambardıń bolǵanın bilip aladı.