‏ Ezekiel 35

Edomǵa qarsı payǵambarshılıq

1Maǵan Jaratqan Iyeden sóz tústi:

2– Insan ulı, júzińdi tawlı Seir jerine qaratıp, oǵan qarsı payǵambarshılıq qılıp, 3oǵan ayt: «Quday Iye bılay deydi: Háy, tawlı Seir jeri, Men saǵan qarsıman. Qolımdı kóterip, seni kimsesiz qańıratıp taslayman. 4Qalalarıńdı qarabaqanaǵa aylandırıp, adamsız qaldıraman. Sonda Meniń Jaratqan Iye ekenimdi bilip alasań.

5Ázelden dushpanshılıǵıń bolǵanlıqtan, Izrail apatqa ushırap, sońǵı jazasın tartıp atırǵanda, olardı qılıshtıń erkine tapsırdıń. 6Sol qılǵanlarıń ushın, tiriligim haqı aytaman, – deydi Quday Iye, – seni qanǵa bılǵayman, qan izińnen qalmaydı. Qan tógiwden tiksinbegeniń ushın, qan da seniń izińnen qalmaydı. 7Tawlı Seir jeri, seni adamsız shólge aylandıraman. Saǵan kelip-ketiwshilerdi joq qılaman. 8Ózińdi óli denege toltıraman. Tóbeshiklerińde, oypatlıqlarıńda hám barlıq saylarıńda qılıshtan qaza tapqanlar qulap jatadı. 9Seni máńgige qańıratıp, bos qaldıraman. Qalalarıńda adam jasamaytuǵın boladı. Sonda Meniń Jaratqan Iye ekenimdi bilip alasań.

10Men, Jaratqan Iye sol jerde bolǵanıma qaramastan, sen: „Bul eki xalıq hám olardıń jerleri biziki boladı, olardı iyelep alamız“, – degeniń ushın, 11tiriligim haqı aytaman, – deydi Quday Iye, – xalqımdı jek kórip, ashıw hám qızǵanshaqlıq penen olarǵa ne qılǵan bolsań, Men de saǵan sonı isleymen. Saǵan qazılıq qılǵanımda, olarǵa Ózimdi ayan etemen. 12Sonda sen Meniń Jaratqan Iye ekenimdi bilip alasań. Men seniń Izrail tawlarına: „Qańırap bos qaldı, olar bizge jem qılıp berildi!“– dep masqaralap aytqan barlıq sózlerińdi esittim. 13Sen kóz aldımda maqtanıp, Maǵan qarsı gápti kóbeyttiń. Men bulardı esittim.

14Quday Iye bılay deydi: Pútkil jer beti quwanıshqa bólenip atırǵanda, men seni qańıratıp, quw dalaǵa aylandıraman. 15Izrail xalqınıń miyras jeri bosap qalǵanda qalay quwanǵan bolsań, sol isti seniń de basıńa salaman. Tawlı Seir jeri hám pútkil Edom birgelikte quw dalaǵa aylanasız. Sonda hámme Meniń Jaratqan Iye ekenimdi bilip aladı».
Copyright information for KaaIBT22L