‏ Ezekiel 36

Quday Izrailǵa bereket bermekshi

1– Insan ulı, Izrail tawlarına payǵambarshılıq qılıp, olarǵa ayt: «Izrail tawları, Jaratqan Iyeniń sózin tıńlań! 2Quday Iye bılay deydi: Dushpan sizler tuwralı: „Hay-hay, áyyemgi biyiklikler endi bizlerdiki boldı!“– dep aytqan edi». 3Sonlıqtan payǵambarshılıq etip, mına sózlerdi ayt: «Quday Iye bılay deydi: Hár tárepten talap, wayran qılǵanı sebepli, sizler aman qalǵan milletlerdiń múlkine aylandıńız, olardıń tabasına hám ósegine qaldıńız. 4Háy, Izrail tawları, Quday Iyeniń sózin tıńlań! Quday Iye tawlarǵa hám tóbelerge, saylar menen oypatlıqlarǵa, dógerektegi aman qalǵan milletlerge olja bolıp, tabaǵa qalǵan elsiz qarabaqanalarǵa hám adamsız qalǵan qalalarǵa sóylemekte. 5Quday Iye bılay deydi: Aman qalǵan milletlerge, ásirese, Edomǵa qarsı lawlaǵan ǵázebim menen sóyleymen. Olar jaylawlardı talan-taraj qılıw ushın, júregi shadlanıp, jek kóriwshilik penen jerimdi ózlerine múlik qılıp aldı».

6– Sonlıqtan Izrail jeri tuwralı payǵambarshılıq etip, tawlarǵa hám tóbelerge, saylar menen oypatlıqlarǵa ayt: «Quday Iye bılay deydi: Sizler xalıqlardıń mazaqlawlarınan azap shekkenińiz ushın, Men qızǵanıshım hám ǵázebim menen sóyleymen. 7Endi bolsa Quday Iye bılay deydi: Men ant iship aytaman: átirapıńızdaǵı xalıqlardıń ózleri masqaralanıp, azap shegedi. 8Al sizler bolsańız, Izrail tawları, shaqalarıńızdı jayıp, xalqım Izrail ushın miywe beresiz, sebebi olar jaqında eline qaytıp keledi. 9Mine, Men sizlerge qayırılıp qarap, názer salaman, sizler súrilip, egilesiz. 10Sizlerdiń turǵınlarıńızdı, pútkil Izrail xalqın, olardıń hámmesin kóbeytemen. Qalalar adamǵa toladı, qarabaqanalar abat qılınadı. 11Adamlardıń hám mallardıń sanın kóbeytemen, olar ónip-ósip kóbeyedi. Men sizlerge burınǵıday adamlardı qonıs bastıraman hám burınǵıdan da kóbirek jaqsılıq qılaman. Sonda sizler Meniń Jaratqan Iye ekenimdi bilip alasız. 12Xalqım Izraildı ústińizge alıp kelemen, olar sizlerdi iyeleydi, sizler olardıń múlki bolasız. Qaytıp olardı balalarınan mahrum etpeysiz.

13Quday Iye bılay deydi: Izrail tawları, sizler tuwralı: „Adamlardı jalmaytuǵın, xalqın perzentinen mahrum qılatuǵın“, – deydi. 14Sonlıqtan, endi adamlardı jalmamaysız, bunnan bılay, xalqıńnıń súrnigiwine sebep bolmaysız, – deydi Quday Iye. 15– Endi milletlerdiń ústińizden kúlgenin esitpeytuǵın bolasız, xalıqlardıń tabalawın kóterip júrmeysiz, xalqıńdı perzentlerinen juda etpeysiz, – deydi Quday Iye».

16Maǵan Jaratqan Iyeden sóz tústi:

17– Insan ulı, Izrail xalqı óz jerinde jasap atırǵanda, tutqan jolı hám islegen isi menen ol jerdi haramladı. Olardıń jolı Meniń názerimde etegi kelgen hayaldıń haramlıǵına uqsaydı. 18Qan tókkeni hám ózleriniń butları menen jerdi haramlaǵanı ushın, olarǵa ǵázebimdi tóktim. 19Men olardı xalıqlar arasına tarqatıp, jer boylap shashıp jiberdim. Olardı tutqan jolları hám islegen isleri ushın jazaladım. 20Olar qaysı xalıq arasına barsa da, sol jerdegi adamlar: «Olar Jaratqan Iyeniń xalqı, biraq Onıń jerinen shıǵıp ketiwge májbúr bolıptı», – deytuǵın boldı. Usılay etip, xalqım Meniń muxaddes atıma til tiyiwine jol qoya berdi. 21Olar ózleri barǵan xalıqlar arasında til tiygizgen muxaddes atım ushın janım ashıdı.

22Sonlıqtan Izrail xalqına ayt: «Quday Iye bılay deydi: Izrail xalqı, Men bulardı sizler ushın emes, al sizler barǵan jerlerińizde til tiygizgen Ózimniń muxaddes atım ushın isleymen. 23Milletlerdiń arasında til tiygizilgen, olardıń arasında sizler til tiygizgen ullı atımnıń muxaddesligin kórsetemen. Men olardıń kóz aldında sizler arqalı Óz muxaddesligimdi ayan qılǵanımda, xalıqlar Meniń Jaratqan Iye ekenimdi bilip aladı, – deydi Quday Iye. 24– Sizlerdi milletlerdiń arasınan, hámme ellerden jıynap alıp, óz jerińizge alıp kelemen. 25Keyin ústińizge taza suw sebemen, sizler taza bolasız. Sizlerdi barlıq napákligińizden hám barlıq butlarıńızdan tazalayman. 26Sizlerge jańa júrek hám jańa ruwx beremen. Deneńizden tas júrekti alıp taslap, jumsaq júrek beremen. 27Ishińizge Óz Ruwxımdı salaman, sizler Meniń qaǵıydalarıma say jasaysız, buyrıqlarıma ámel qılıp, olardı orınlaysız. 28Sonda ata-babalarıńızǵa bergen jerimde jasaysız. Sizler Meniń xalqım, Men sizlerdiń Qudayıńız bolaman. 29Men sizlerdi barlıq napáklikten saqlayman. Ǵállege ósip, mol ónim beriwdi buyıraman, bunnan bılay ashlıqqa duwshar qılmayman. 30Endi ashlıq sebepli xalıqlarǵa masqara bolmawıńız ushın, miywe jemislerin hám atızlardaǵı ónimdi mol qılaman. 31Sonda jawız jolıńızdı hám jaman islerińizdi esińizge alıp, qılmıslarıńız hám jerkenishli islerińiz sebepli ózińizden jerkenesiz. 32Bunı sizler ushın islep atırǵanım joq, – deydi Quday Iye, – mınanı bilip qoyıń: Izrail xalqı, tutqan jollarıńız ushın qızarıp, uyalıń.

33Quday Iye bılay deydi: Sizlerdi barlıq qılmıslarıńızdan tazalaǵan kúnim qalalarǵa ornalastıraman, qarabaqanalardı abat qılaman. 34Olay-bulay ótkenlerdiń kóz aldında wayran bolıp jatırǵan shólge islew beriledi. 35Sonda olar: „Mına shólge aylanǵan jer Eden baǵınday bolıptı. Mına wayran bolıp, adamsız qarabaqanaǵa aylanǵan qalaǵa diywal salınıp, adamlar mákan basıptı“, – deydi. 36Sonda átirapıńızda qalǵan xalıqlar buzılǵandı tikleytuǵın, shóldi eginzarǵa aylandıratuǵın – bul Jaratqan Iye ekenin biledi. Bunı Men, Jaratqan Iye aytaman hám júzege asıraman.

37Quday Iye bılay deydi: Men xalqım Izraildıń jalbarınıwlarına qulaq salıp, olar ushın mınanı isleymen: adamlardı qoy súriwindey kóp qılaman. 38Belgilengen bayramlarda Erusalimde qurbanlıq qılınatuǵın qoylar qansha kóp bolsa, bosap qalǵan qalalar da adamlarǵa sonshelli tolı boladı. Sonda Meniń Jaratqan Iye ekenimdi bilip aladı».