‏ Ezekiel 37

Kewip qalǵan súyekler oypatlıǵı

1Jaratqan Iyeniń qolı meniń ústimde edi. Ol meni Óz Ruwxı menen alıp ketip, oypatlıqtıń ortasına aparıp qoydı. Ol jer súyeklerge tolıp atırǵan edi. 2Ol meni olardıń arası menen jeteledi, men oypatlıqta jatırǵan sansız súyeklerdi kórdim. Súyekler júdá kewip qalǵan edi. 3Ol mennen:

– Insan ulı, mına súyekler tirile ala ma? – dep soradı. Men Oǵan:

– Quday Iye, bunı tek Sen bileseń, – dep juwap berdim. 4Keyin Ol maǵan bılay dedi:

– Payǵambarshılıq etip, mına súyeklerge bılay dep ayt: «Kewip qalǵan súyekler, Jaratqan Iyeniń sózin tıńlań! 5Quday Iye bul súyeklerge bılay demekte: Men sizlerge jan beremen, sizler tirilesiz. 6Ústińizge sińirler pitirip, et ósiremen hám teri menen qaplayman. Ishińizge jan salaman, sizler tirilesiz hám Meniń Jaratqan Iye ekenimdi bilip alasız».

7Men ózime tapsırılǵanday, payǵambarshılıq ettim. Payǵambarshılıq etip atırǵanımda, tasırlaǵan shawqım esitildi, súyekler bir-biri menen birlese basladı. 8Men olarda sińirdiń hám ettiń qalay payda bolǵanın, olardı teri qaplaǵanın kórdim. Biraq denesinde ele jan joq edi. 9Sonda Ol maǵan bılay dedi:

– Janǵa payǵambarshılıq qıl. Insan ulı, payǵambarshılıq qılıp, oǵan bılay dep ayt: «Quday Iye bılay deydi: Háy jan, tórt tárepten samal bolıp, mına óltirilgenlerdiń ústine es, olar tirilsin».

10Men Ol tapsırǵanday, payǵambarshılıq qıldım. Jan olarǵa kirip, olar tirildi, ayaqqa turdı. Olar júdá ullı alamanǵa aylandı. 11Sonda Ol maǵan bılay dedi:

– Insan ulı, mına súyekler – pútkil Izrail xalqı. Olar: «Súyegimiz quwrap qaldı, úmitimiz úzildi, bizler tamırdan úzilip taslanǵanbız», – deydi. 12Sonlıqtan payǵambarshılıq etip, olarǵa ayt: «Quday Iye bılay deydi: Xalqım, Men qábirlerińizdi ashıp, sizlerdi górden shıǵaraman hám Izrail jerine alıp kelemen. 13Qábirlerińizdi ashıp, o, xalqım, sizlerdi górden shıǵarǵanımda, Meniń Jaratqan Iye ekenimdi bilip alasız. 14Sizlerge ruwxımdı salaman, sizler tirilesiz. Men sizlerdi óz jerińizge ornalastıraman. Sonda bunı Meniń, yaǵnıy Jaratqan Iyeniń aytqanın hám júzege asırǵanın bilesiz, – deydi Jaratqan Iye».

15Maǵan Jaratqan Iyeden sóz tústi:

16– Insan ulı, sen bir tayaq alıp, oǵan: «Yahuda hám onıń menen birlesken izraillılar ushın» dep jaz. Keyin basqa tayaq alıp, oǵan: «Yusup hám onıń menen birlesken Izrail xalqı ushın Efrayımnıń tayaǵı» dep jaz. 17Eki tayaqtı bir-birine qosıp usla, olar qolıńda bir tayaqtay bolıp kórinsin. 18Xalqıń: «Qolıńdaǵı ne, túsindirip bereseń be?» – dep sorasa, 19olarǵa bılay dep ayt: «Quday Iye bılay deydi: Men Efrayımnıń qolındaǵı tayaǵın, yaǵnıy Yusup penen birlesken Izrail urıwlarınıń tayaǵın alıp, Yahudanıń tayaǵına qosaman. Olardı bir tayaq qılıp, Óz qolımda uslayman». 20Sen jazıw jazǵan eki tayaq olardıń kóz aldında seniń qolıńda turǵanda, 21olarǵa Quday Iye bılay deydi dep ayt:

«Men Izrail xalqın hámme jaqtan, ózleri barǵan xalıqlardıń arasınan jıynap alıp, ózleriniń jerine alıp kelemen. 22Olardı sol jurtta, Izrail tawlarında bir xalıq qılaman hám olardıń hámmesin bir patsha basqaratuǵın boladı. Olar endi eki xalıq bolmaydı hám eki patshalıqqa bólinbeydi. 23Endi butlar menen, jerkenishli zatlar menen hám hár qıylı nadurıs nárseler menen ózlerin haramlamaydı. Gúnaǵa batıp jasaǵan mánzillerinen olardı azat etip, tazalayman. Olar Meniń xalqım, Men olardıń Qudayı bolaman.

24Qulım Dawıt olarǵa patsha boladı hám hámmesiniń shopanı boladı. Olar Meniń buyrıqlarım menen jasaydı, qaǵıydalarıma ámel qılıp, olardı orınlaydı. 25Olar Men qulım Yaqıpqa bergen jerde, ata-babaları jasaǵan jerde jasaydı. Sol jerge olardıń ózleri, balaları hám balalarınıń balaları máńgige mákan basadı. Qulım Dawıt máńgige olardıń húkimdarı boladı. 26Men olar menen tınıshlıq kelisimin dúzemen, bul kelisim máńgige dawam etedi. Olardı ayaqqa turǵızaman, kóbeytemen hám Ózimniń Muxaddesxanamdı olardıń ortasına máńgige ornataman. 27Olardıń arasında mákan basaman. Men olardıń Qudayı, olar Meniń xalqım boladı. 28Muxaddesxanam máńgige olardıń arasında jaylasqanda, xalıqlar Izraildı muxaddes qılatuǵın Men, Jaratqan Iye ekenin bilip aladı».