‏ Ezekiel 38

Gogqa qarsı payǵambarshılıq

1Maǵan Jaratqan Iyeden sóz tústi:

2– Insan ulı, Magog jerindegi Meshex hám Tubaldıń ullı húkimdarı Gogqa júzińdi qaratıp, oǵan payǵambarshılıq qıl: 3«Quday Iye bılay deydi: Háy, Meshex hám Tubaldıń ullı húkimdarı Gog, Men saǵan qarsıman! 4Men seni basqa tárepke burıp jiberip, jaqlarıńa qarmaq salaman. Seni hám pútkil ordańdı, atlarıńdı, atlılarıńdı, bezenip kiyinip alıp, úlken hám kishi qalqan uslaǵan úlken toparıńdı, qılısh penen qurallanǵanlardıń hámmesin súyrep shıǵaraman. 5Qalqan uslap, duwlıǵa kiygen Persiya, Xabashstan hám Put xalıqları, 6Gomerdiń barlıq áskerleri, arqadaǵı alıs jurt Togarma xalqınıń pútkil láshkerleri, sonday-aq, kóplegen xalıqlar seniń menen birge boladı.

7Tayar tur! Janıńa jıynalǵan pútkil alaman menen birge tayar tur! Sen olarǵa jetekshi bolasań. 8Kóp waqıttan keyin, sen atlanısqa shaqırılasań. Sońǵı jıllarda sen urıstan ózin tiklep alǵan bir jerge hújim qılasań. Bul jerdiń xalqı kóp milletlerden shıǵıp, uzaq waqıttan beri adamsız qalǵan Izrail tawlarına jıynalǵan. Onıń turǵınları milletler arasınan alıp kelinip, házir qáwipsiz jasap atır. 9Sen dawılday kóterileseń. Seniń óziń, láshkerleriń hám seniń menen bolǵan kóp xalıq eldi qaplap alıw ushın, bulttay bolıp kelesiz.

10Quday Iye bılay deydi: Sol kúni sen jaman qıyallarǵa berilip, jawız jobalar dúzeseń. 11Sen bılay deyseń: „Qorǵansız jerlerge bastırıp barıp, biyǵam, tınısh jasap atırǵan xalıqqa hújim qılaman. Olardıń diywalı da, támbilenetuǵın qapısı da joq. 12Burın qańırap bos jatqan, házir adam mákan basqan qalalarda jasap atırǵan xalıqtı talap, oljalayman. Sharwashılıq hám sawda menen shuǵıllanatuǵın, milletlerdiń arasınan jıynalıp, dúnyanıń orayında jasaytuǵın bul xalıqqa qol salaman“. 13Sheba, Dedan, Tarshish sawdagerleri hám onıń barlıq jolbasshıları sennen: „Sen talaw ushın keldiń be? Talan-taraj qılıw, gúmis hám altın alıp ketiw, mal hám baylıqtı tartıp alıw, mol oljalı bolıw ushın láshker tartıp keldiń be?“– dep soraydı».

14Sonlıqtan insan ulı, payǵambarshılıq qılıp, Gogqa ayt: «Quday Iye bılay deydi: Sol kúni xalqım Izraildıń qáwipsizlikte jasap atırǵanına seniń kóziń jetedi. 15Sonda arqadaǵı alıs jurtıńnan kóp xalıqlardı: atlılardı, ullı jıyındı hám sansız láshkerlerdi ertip keleseń. 16Sen jer júzin qaplaǵan bult kibi, xalqım Izrailǵa hújim jasaysań. Keleshekte, háy Gog, Men seni Óz jerime jiberemen. Milletlerdiń kóz aldında, sen arqalı muxaddesligimdi ayan etip, milletlerge Ózimdi tanıtaman.

17Quday Iye bılay deydi: Áyyemgi dáwirlerde qullarım Izrail payǵambarları arqalı aytqan adamım sen emesseń be? Sol waqıtları olar Meniń seni izraillılarǵa qarsı jiberetuǵınım tuwralı jıllar boyı payǵambarshılıq etti. 18Gogtıń Izrail jerine hújim etetuǵın kúni, – deydi Quday Iye, – qáhárlenip, ǵázebim lawlaydı. 19Qızǵanshaqlıǵım menen ǵázep otında janıp, sol kúni Izrail jerinde ullı jer silkiniw júz beretuǵının járiyalayman. 20Teńizdegi balıqlar, kóktegi quslar, jabayı haywanlar, barlıq jer bawırlawshılar, jer betindegi barlıq adamlar Meniń aldımda titireydi. Tawlar astan-kesten boladı, tik jarlar qulaydı hám barlıq diywallar jer menen jeksen boladı. 21Pútkil tawlarımda Gogqa qarsı qılısh shaqıraman, – deydi Quday Iye. – Hár bir adamnıń qılıshı óz tuwısqanına qarsı boladı. 22Gogtı illet hám qan tógiw menen jazalayman. Onıń hám láshkerleriniń ústine, janındaǵı kóp xalıqlardıń ústine ǵarq etiwshi jawın, taslı burshaq, ot hám kúkirt jawdıraman. 23Solay etip, Men ullılıǵımdı hám muxaddesligimdi kórsetemen hám kóp milletlerdiń kóz aldında Ózimdi ayan etemen. Sonda olar Meniń Jaratqan Iye ekenimdi bilip aladı».
Copyright information for KaaIBT22L