‏ Ezekiel 39

Gogtıń jeńiliske ushırawı

1– Insan ulı, sen Gogqa qarsı payǵambarshılıq qılıp, oǵan ayt: «Quday Iye bılay deydi: Háy, Meshextiń hám Tubaldıń ullı húkimdarı Gog, Men saǵan qarsıman! 2Seni basqa tárepke burıp jiberemen, arqadaǵı alıs jurttan shıǵarıp, Izrail tawlarına alıp kelemen. 3Shep qolıńdaǵı sadaǵıńdı hám oń qolıńdaǵı oǵıńdı urıp túsiremen. 4Sen pútkil láshkerleriń hám janıńdaǵı xalıqlar menen birge Izrail tawlarında qulaysań. Seni hár túrli jırtqısh quslarǵa hám jabayı haywanlarǵa jemtik qılaman. 5Sen ashıq maydanda óleseń. Bunı Men aytıp turman, – deydi Quday Iye. 6– Men Magog jerine hám atawlarda qáwipsiz jasap atırǵanlarǵa ot jiberemen. Sonda olar Meniń Jaratqan Iye ekenimdi bilip aladı.

7Men Ózimniń muxaddes atımdı xalqım Izrailǵa ayan etemen. Bunnan bılay, muxaddes atıma til tiygiziwine jol qoymayman. Sonda xalıqlar Izraildıń Muxaddesi, Jaratqan Iye Men ekenimdi bilip aladı. 8Mine, bul kún keledi hám júzege asadı, – deydi Quday Iye, – yaǵnıy sol Men aytqan kún.

9Izrail qalalarınıń turǵınları sırtqa shıǵıp, qural-jaraqlardı, úlken hám kishkene qalqanlardı, oq jay hám onıń oqların, tayaq hám nayzalardı otqa jaǵadı. Olar jeti jıl otın boladı. 10Daladan otın tasıwǵa, toǵaydan otın shabıwǵa hájet qalmay, qural-jaraqlardı otın qıladı. Izrail xalqı ózlerin tonaǵanlardı tonaydı, ózlerinen tartıp alǵanlardan tartıp aladı, – deydi Quday Iye.

11– Sol kúni Men Izraildan, teńizdiń shıǵısındaǵı Jolawshılar oypatlıǵınan Gogqa qábirstan ushın orın beremen. Ol ótken-ketkenlerdiń jolın tosadı. Ol jerge Gog penen onıń pútkil láshkerleri jerlenedi hám ol jer „Gogtıń sansız láshkerleriniń oypatlıǵı“dep ataladı. 12Eldi tazalaw ushın, Izrail xalqı olardı jeti ay boyı jerleydi. 13Eldegi pútkil xalıq olardı jerlewge qatnasadı. Men Ózimdi dańqqa eristirgen kúnim, Izrail xalqı abırayǵa iye boladı, – deydi Quday Iye. 14– Usı jeti ay ótkende, hár kúni eldi gezip júretuǵın adamlar belgilenedi. Olar menen birge eldi tazalaw ushın kómiwsiz qalǵan ólilerdi kómetuǵın adamlar da belgilenedi. 15Eldi gezip júrgenler adam súyegin kórip qalsa, onıń qasına belgi qoyıp ketedi. Jerlewshiler onı alıp, Gogtıń sansız láshkerleriniń oypatlıǵına jerleydi. 16Sol jerde Hamona degen qala da boladı. Olar usılayınsha eldi tazalaydı».

17Insan ulı, sen bolsań, – deydi Quday Iye, – hár túrli quslarǵa hám barlıq jabayı haywanlarǵa bılay dep ayt: «Meniń sizler ushın soyatuǵın qurbanlıǵıma, Izrail tawlarındaǵı ullı qurbanlıqqa ján-jaqtan jıynalıp kelińler. Ol jerde gósh jep, qan ishesiz. 18Bashan úlkesinde semirtilip baǵılǵan qoshqarlardıń, toqlılardıń, tekelerdiń, buǵalardıń góshi hám qanı sıyaqlı, kúshli adamlardıń hám dúnya húkimdarlarınıń góshin jep, qanın ishesiz. 19Meniń sizler ushın soyatuǵın qurbanlıǵımnan toyǵansha góshtiń mayın jep, más bolǵansha qan ishesiz. 20Meniń dasturxanımnan atlarǵa, atlılarǵa, kúshli jawıngerlerge hám hár qıylı áskerlerge toyasız, – deydi Quday Iye. 21– Men milletler arasında ullılıǵımdı ayan etemen. Barlıq xalıqlar Meniń shıǵarǵan húkimimdi hám olardı qúdiretli qolım menen jazalaǵanımdı kóredi. 22Sol kúnnen baslap, Izrail xalqı Meniń ózleriniń Qudayı Jaratqan Iye ekenimdi bilip aladı. 23Basqa xalıqlar Izrail xalqınıń Maǵan qıyanet qılǵanı sebepli, óz jazıǵı ushın súrgin etip alıp ketilgenin biledi. Men olardan júzimdi jasırdım, olardı dushpanlardıń qolına berdim hám hámmesi qılıshtan qaza taptı. 24Olarǵa óz napákligine hám nızamsızlıǵına jarasa is tuttım hám júzimdi olardan jasırdım.

25Sonlıqtan Quday Iye bılay deydi: Endi Men Yaqıptı burınǵı abadanshılıǵına eristiremen, pútkil Izrail xalqına rehim qılaman hám muxaddes atım húrmeti qızǵanaman. 26Olarǵa hesh kim qáwip tuwdırmay, óz ellerinde qorqınıshsız jasap atırǵanında, olar Maǵan qılǵan qıyanetleri ushın uyaladı. 27Olardı xalıqlar arasınan qaytarıp, dushpan jerlerinen jıynap alǵanımda, kóp milletlerdiń kóziniń aldında olar arqalı Óz muxaddesligimdi ayan etemen. 28Men olardı xalıqlar arasına tarqatıp jibergen bolsam da, keyin ol jerde olardıń birde birewin qaldırmay óz jerine jıynaǵanımda, olar Meniń ózleriniń Qudayı Jaratqan Iye ekenimdi bilip aladı. 29Men Izrail xalqınıń ústine Ruwxımdı tógemen, endi hesh qashan júzimdi olardan jasırmayman, – deydi Quday Iye».