Eze 4 | KaaIBT22L | STEP | – Insan ulı! Endi bir gerbish alıp aldıńa qoy, onıń ústine Erusalim qalasınıń súwretin sal.

‏ Ezekiel 4

Erusalim qamalınıń kórinisi

1 – Insan ulı! Endi bir gerbish alıp aldıńa qoy, onıń ústine Erusalim qalasınıń súwretin sal. 2 Qalanı qorshawǵa alıp, oǵan qarsı qamal minaraların qur, diywalǵa topıraq úy, dushpan ordasın qur hám qala aylanasına diywal buzatuǵın úskenelerdi ornat. 3 Keyin temir taba alıp, onı óziń menen qalanıń ortasına temir diywal etip ornat. Keyin júzińdi qalaǵa qarat. Qala qamal qılınadı, sen onı qamal qılǵan bolasań. Bul Izrail xalqı ushın eskertiw boladı. 4 Sońınan shep qaptalıń menen jambaslap jatıp, Izrail xalqınıń gúnasın ústińe júkle. Shep jaǵıń menen qansha kún jatsań, sonsha kún olardıń gúnasın ózińe júkleyseń. 5 Olardıń gúna qılǵan jıllarınıń sanına bola, sen ushın sonsha kún ajırattım. Sen úsh júz toqsan kún dawamında Izrail xalqınıń gúnasın ózińe júkleyseń. 6 Belgilengen waqıt tamam bolǵannan keyin, oń jaǵıńa jambaslap jat, endi Yahuda xalqınıń gúnasın ózińe alasań. Men hár jıldı bir kún dep esaplap, saǵan qırıq kún belgiledim. 7 Erusalimniń qamal qılınǵan diywallarına júzińdi qarat, bilegińdi túrip, oǵan qarsı payǵambarshılıq qıl. 8 Qalanı qamal qılǵan kúnleriń pitpegenshe, Men seni bir jaǵıńnan ekinshi jaǵıńa awnay almaytuǵınday etip, arqan menen baylap taslayman.

9 Endi biyday, arpa, aq hám qızıl lobiya, tarı hám jazlıq biyday alıp, bir ıdısqa sal hám nan pisir. Onı úsh júz toqsan kún bir jaǵıńda jatqanıńda jeyseń. 10 Hár kúni jeytuǵın nanıńnıń muǵdarı jigirma shekeldiń ^{▼▼ Jigirma shekel – bir shekel shama menen 11 gr.} awırlıǵına teń boladı, onı belgilengen waqıtta jeyseń. 11 Suwdı da ólshep isheseń, onıń muǵdarı hinniń altıdan bir bólegine ^{▼▼ Hinniń altıdan bir bólegi – bir hin shama menen 3,7 l.} teń boladı. Onı da belgilengen waqıtta isheseń. 12 Nanıńdı arpa gúlshelerindey etip tayarlap je. Olardı adamlardıń kóz aldında, adamnıń úlken dáretine pisir.

13 Jaratqan Iye taǵı:

– Men Izrail xalqın basqa milletler arasına súrgin qılǵanımda, olar haram nan jeydi, – dedi. 14 Sonda men:

– Ah, Quday Iye! Men hesh qashan ózimdi haramlamaǵanman. Jaslıǵımnan usı kúnge deyin, hesh qashan haram ólgen yaki jırtqısh talap óltirgen haywandı jemegenmen. Hesh qanday haram góshti awzıma alǵan emespen, – dedim.

15 – Yaqshı, – dedi Ol, – nanıńdı adam dáretiniń ornına, maldıń tezegine pisiriwińe ruxsat beremen.

16 Sońınan Ol maǵan bılay dedi:

– Insan ulı! Men Erusalimdi bir tislem nanǵa zar qılaman. Olar qorqıw ishinde nanın ólshep jeydi hám ǵulǵılaǵa túsip, suwın ólshep ishedi. 17 Suw hám nan jetispeydi. Adamlar qorqınıshtan esten ayırıladı hám gúnalarınıń zardabınan dimarları qurıydı.