Eze 40 | KaaIBT22L | STEP | Súrginde bolǵan waqtımızdıń jigirma besinshi jılınıń birinshi ayınıń onınshı kúni Erusalimniń basıp alınǵanına on tórt jıl bolǵan edi. Sol kúni Jaratqan Iyeniń qolı meniń ústimde bolıp, Jaratqan Iye meni sol jerge alıp bardı.

‏ Ezekiel 40

Taza Ibadatxana tuwralı ayan

1 Súrginde bolǵan waqtımızdıń jigirma besinshi jılınıń birinshi ayınıń onınshı kúni Erusalimniń basıp alınǵanına on tórt jıl bolǵan edi. Sol kúni Jaratqan Iyeniń qolı meniń ústimde bolıp, Jaratqan Iye meni sol jerge alıp bardı. 2 Ayanda Quday meni Izrail eline alıp barıp, bálent bir tawdıń ústine turǵızıp qoydı. Ol jerdiń qubla tárepinde imaratlar bolıp, qalaǵa uqsap turǵan edi. 3 Meni sol jerge alıp bardı. Qarasam, dárwaza aldında bir adam tur. Onıń kórinisi jıltıraǵan qoladay bolıp, qolında zıǵır jip hám ólsheytuǵın tayaq bar edi. 4 Sol adam maǵan bılay dedi:

– Insan ulı, kózleriń menen kór, qulaqlarıń menen esit. Kórsetken nárselerimniń hámmesine dıqqat qoy. Meniń saǵan kórsetiwim ushın, sen bul jerge alıp kelindiń. Kórgenlerińniń hámmesin Izrail xalqına jetker.

Shıǵıs dárwaza imaratı

5 Qarasam, Ibadatxananıń sırtı aylana diywal menen qorshalǵan eken. Sol adamnıń qolındaǵı ólsheytuǵın tayaqtıń uzınlıǵı altı shıǵanaq bolıp, hár bir shıǵanaqtıń uzınlıǵı ádettegi ólshemnen tórt elige artıq edi. Ol diywaldı ólshedi, diywaldıń qalıńlıǵı da, biyikligi de bir ólshew tayaǵına teń boldı. 6 Keyin ol shıǵısqa qarap turǵan dárwazaǵa barıp, tekshelerden kóterilip, dárwaza bosaǵasın ólshedi. Bosaǵa tabaldırıǵınıń eni bir tayaqqa teń bolıp, bul birinshi bosaǵa edi. 7 Dárwaza imaratınıń ishinde saqshılardıń bólmeleri bar edi. Olardıń uzınlıǵı da, eni de bir tayaqqa teń bolıp, usı bólmelerdi ajıratıp turǵan diywallardıń qalıńlıǵı bes shıǵanaq edi. Dáliz jolınıń aqırında Ibadatxana háwlisine qaraǵan aywan bolıp, usı aywanǵa shıǵatuǵın tabaldırıqtıń eni bir tayaqqa teń boldı. 8 Soń ol aywandı ishten ólshedi, onıń dálizden tısqarı uzınlıǵı bir tayaq shıqtı. 9 Keyin ol aywandı sırttan ólshedi, onıń uzınlıǵı segiz tayaq shıqtı. Aywan esiginiń eki qaptalındaǵı sútinge uqsaǵan shıǵıńqı diywallardıń hár qaysısınıń qalıńlıǵı eki shıǵanaqtan edi. Bul aywan dárwaza imaratınıń ishinde bolıp, Ibadatxanaǵa qarap turǵan edi. 10 Shıǵıs dárwaza imaratınıń ishiniń eki qaptalında da úsh-úshten bólmeler bolıp, olardıń hámmesiniń ólshemi de, olardıń arasındaǵı diywallar da birdey qalıńlıqta edi. 11 Ol dárwazanıń kirer awzın ólshedi, ol on shıǵanaq, al dálizdiń eni on úsh shıǵanaq shıqtı. 12 Saqshılardıń bólmeleriniń hár qaysısınıń aldında eni bir shıǵanaqtan bolǵan páskeltek paqsa bar edi. Saqshılardıń bólmeleriniń eni de, uzınlıǵı da altı shıǵanaq edi. 13 Keyin dárwaza imaratınıń tóbesiniń enin, bir bólmeniń shetki diywalınan qarama-qarsı turǵan bólmeniń shetki diywalına shekemgi aralıqtı ólshedi. Tóbeniń eni jigirma bes shıǵanaq shıqtı. 14 Keyin ol dárwaza imaratınıń háwli tárepindegi shıǵıńqı diywalların ólshedi. Olardıń biyikligi alpıs shıǵanaq shıqtı. 15 Dárwaza imaratınıń kirer awızdan shıǵar awızǵa shekemgi uzınlıǵı eliw shıǵanaq edi. 16 Dárwaza imaratınıń ishiniń eki tárepinde jaylasqan saqshılardıń bólmeleri menen olardıń arasındaǵı diywallarda, sonday-aq aywannıń ishiniń hár bir tárepinde ayna tárizli oyıqlar bar edi. Aywannıń háwli tárepindegi shıǵıńqı diywalları palma aǵashınıń súwretleri menen bezelgen edi.

Sırtqı háwli

17 Keyin ol meni sırtqı háwlige alıp kirdi. Háwli átirapında otız bólme hám tas tóselgen jol bar edi. 18 Dárwazalardıń eki tárepindegi tas joldıń eni dárwazalardıń uzınlıǵına teń edi. Bul tas jol háwlidegi tas joldan pásirek edi. 19 Ol háwliniń enin, shıǵıstaǵı dárwaza imaratınıń shıǵar awzınan ishki háwliniń kirer awzına shekemgi aralıqtı ólshedi, ol júz shıǵanaq shıqtı.

Arqa dárwaza

20 Ol sırtqı háwliniń arqaǵa qaraǵan dárwazasınıń uzınlıǵı menen enin ólshedi. 21 Imarattıń eki tárepindegi úsh-úshten qurılǵan saqshılardıń bólmeleri, olardıń arasındaǵı diywallardıń hám aywannıń ólshemi birinshi dárwaza imaratınıń ólshemleri menen birdey edi. Imarattıń uzınlıǵı eliw shıǵanaq, eni jigirma bes shıǵanaq edi. 22 Diywallardaǵı ayna tárizli oyıqlardıń, aywannıń hám palma aǵashınıń súwretleriniń ólshemleri shıǵıs dárwazasındaǵı menen birdey edi. Dárwazaǵa jeti basqaldaqlı tekshe arqalı kóteriletuǵın edi. Al aywan imarattıń ishki tárepinde edi. 23 Arqa dárwazasınıń aldında da shıǵıs dárwazasınıń aldındaǵıday qarama-qarsı turǵan ishki háwliniń dárwaza imaratı bar edi. Bul adam ishki dárwaza imaratınan sırtqı dárwaza imaratına shekemgi aralıqtı ólshedi. Aralıq júz shıǵanaq shıqtı.

Qubla dárwaza

24 Ol meni qubla tárepke alıp bardı. Ol jerde qublaǵa qaraǵan dárwaza imaratı bar edi. Ol imarattıń diywalların hám aywanın ólshedi. Olardıń ólshemleri basqalardiki menen birdey shıqtı. 25 Basqa dárwaza imaratlarında bolǵanınday, bul dárwaza imaratınıń da, onıń aywanınıń da hámme tárepinde ayna tárizli oyıqlar bar edi. Imarattıń uzınlıǵı eliw shıǵanaq, eni jigirma bes shıǵanaq bolıp shıqtı. 26 Oǵan jeti basqaldaqlı tekshe arqalı kóterilip, aywanǵa kiretuǵın edi. Imarattıń ishki diywalları palma aǵashınıń súwretleri menen bezelgen edi. 27 Ishki háwliniń de qublaǵa qaraǵan dárwazası bar edi. Ol qubladaǵı sırtqı dárwazadan usı dárwazaǵa shekemgi aralıqtı ólshedi. Aralıq júz shıǵanaq shıqtı.

Ishki háwlige kiretuǵın dárwazalar

28 Ol meni qubla dárwaza arqalı Ibadatxananıń ishki háwlisine alıp kirdi de, qubladaǵı dárwazanı ólshedi. Onıń da ólshemleri basqalardiki menen birdey edi. 29 Saqshılardıń bólmeleriniń, olar arasındaǵı diywallardıń hám aywannıń ólshemi de basqa imaratlardaǵılar menen birdey bolıp shıqtı. Dárwaza imaratınıń hám onıń aywanınıń hámme tárepinde ayna tárizli oyıqlar bar edi. Dárwaza imaratınıń uzınlıǵı eliw shıǵanaq, eni jigirma bes shıǵanaq edi. 30 Ishki háwlidegi dárwaza imaratlarınıń hár biriniń aywanınıń uzınlıǵı jigirma bes shıǵanaq, eni bes shıǵanaq edi. 31 Aywan sırtqı háwlige qarap turǵan bolıp, onıń kirer awzınıń eki qaptalındaǵı shıǵıńqı diywalları palma aǵashınıń súwretleri menen bezelgen edi. Dárwazaǵa segiz basqaldaqlı tekshe arqalı kóteriletuǵın edi.

32 Ol shıǵıs dárwazasınıń imaratı arqalı meni ishki háwlige alıp kirdi hám onı ólshedi. Ol da basqalarday bolıp shıqtı. 33 Saqshılar bólmeleri, olar arasındaǵı diywalları hám aywannıń ólshemleri basqaları menen birdey edi. Imarattıń da, onıń aywanınıń da hámme tárepinde ayna tárizli oyıqlar bar edi. Dárwaza imaratınıń uzınlıǵı eliw shıǵanaq, eni jigirma bes shıǵanaq edi. 34 Aywan sırtqı háwlige qarap turǵan bolıp, onıń shıǵıńqı diywalları palma aǵashınıń súwretleri menen bezelgen edi. Dárwazaǵa segiz basqaldaqlı tekshe arqalı kóteriletuǵın edi.

35 Keyin ol meni arqa dárwazaǵa alıp kelip, dárwaza imaratın ólshedi. Onıń ólshemleri basqa imaratlardıń ólshemleri menen birdey edi. 36 Saqshılar bólmeleri, olardıń arasındaǵı diywalları hám aywannıń ólshemi basqalardiki menen birdey edi. Imarattıń ishiniń hámme tárepinde aynala ayna tárizli oyıqlar bar edi. Imarattıń uzınlıǵı eliw shıǵanaq, eni jigirma bes shıǵanaq edi. 37 Aywan sırtqı háwlige qarap turǵan bolıp, onıń shıǵıńqı diywalları palma aǵashınıń súwretleri menen bezelgen edi. Dárwazaǵa segiz basqaldaqlı tekshe arqalı kóteriletuǵın edi.

Qurbanlıqtı tayarlaytuǵın orınlar

38 Ishki dárwazanıń aywanınıń qaptalında, bólek bir bólmeli jay bar edi. Jandırılatuǵın qurbanlıqlar usı jerde juwılatuǵın edi. 39 Jandırılatuǵın qurbanlıqtı, gúna hám ayıp qurbanlıǵın soyıw ushın dárwaza aywanınıń ishinde, eki qaptalda ekew-ekewden tórt stol turdı. 40 Aywannıń sırtında bolsa, eki tárepte eki stoldan tórt stol bolıp, olar arqa dárwazaǵa kiretuǵın teksheden kórinip turdı. 41 Solay etip, dárwazanıń ishki hám sırtqı táreplerinde qurbanlıqlardı soyıwǵa arnalǵan segiz stol bar edi. 42 Jandırılatuǵın qurbanlıqlar ushın jonılǵan tastan qurılǵan jáne tórt stol bar edi. Hár bir stoldıń uzınlıǵı hám eni bir yarım shıǵanaq, biyikligi bir shıǵanaq edi. Jandırılatuǵın qurbanlıqlardı hám basqa qurbanlıqlardı soyıw ushın arnalǵan qural-jaraqlar onıń ústinde turdı. 43 Aywannıń diywallarına hár biri tórt eli bolǵan ilmekler qaǵılǵan edi. Qurbanlıq góshi bolsa stollar ústine qoyılatuǵın edi.

Ruwxaniylerdiń bólmeleri

44 Ishki dárwazanıń sırtında, ishki háwlide eki bólme bar edi. Bulardıń birewi arqadaǵı dárwazanıń janında bolıp, qublaǵa qaraǵan, ekinshisi shıǵıs dárwazanıń janında bolıp, arqaǵa qaraǵan edi. 45 Adam maǵan bılay dedi:

– Qublaǵa qarap turǵan bólme Ibadatxanada xızmet etip atırǵan ruwxaniylerge arnalǵan. 46 Al arqaǵa qarap turǵan bólme qurbanlıq orında xızmet etip atırǵan ruwxaniylerge arnalǵan. Bular Sadoqtıń urpaqları bolıp, olarǵa Lebiy urıwı arasınan Jaratqan Iyege xızmet etiw ushın, Oǵan jaqınlasıwǵa ruxsat etilgen edi.

47 Keyin ol ishki háwlini ólshedi. Ol tórt múyeshli bolıp, uzınlıǵı da, eni de júz shıǵanaq shıqtı. Qurbanlıq orın Ibadatxananıń aldında edi.

Ibadatxana

48 Ol meni Ibadatxananıń aywanına alıp kelip, onıń bosaǵasınıń eki tárepindegi sútinge uqsaǵan shıǵıńqı diywalların ólshedi. Diywallardıń qalıńlıǵı bes shıǵanaq, eni úsh shıǵanaq shıqtı. 49 Aywannıń óziniń uzınlıǵı jigirma shıǵanaq, eni on eki shıǵanaq edi. Aywanǵa on basqaldaqlı tekshe arqalı kóteriletuǵın edi. Aywannıń kirer awzınıń eki tárepinde eki sútin bar edi.