‏ Ezekiel 41

1Keyin ol meni Muxaddes bólmeniń qapısına alıp barıp, qapınıń eki tárepindegi diywallardı ólshedi. Eki táreptegi diywaldıń da qalıńlıǵı altı shıǵanaq edi. 2Bosaǵanıń ózi on shıǵanaq, eki tárepindegi diywallar bes shıǵanaqtan edi. Ol Muxaddes bólmeni de ólshedi. Onıń uzınlıǵı qırıq shıǵanaq, eni jigirma shıǵanaq shıqtı. 3Keyin ol ishki bólmege kirip, onıń bosaǵasınıń jaqlaw diywalların ólshedi. Diywallardıń qalıńlıǵı eki shıǵanaqtan, bosaǵanıń ózi altı shıǵanaq, al eki tárepten bosaǵaǵa qosılǵan diywallardıń uzınlıǵı jeti shıǵanaqtan edi. 4Ol ishki bólmeni de ólshedi. Onıń uzınlıǵı da, eni de jigirma shıǵanaq edi. Ol maǵan:

– Bul Eń muxaddes bólme, – dedi.

Ibadatxananıń diywalına qosıp salınǵan bólmeler

5Ol Ibadatxana diywalın ólshedi. Diywaldıń qalıńlıǵı altı shıǵanaq shıqtı. Ibadatxananıń sırtqı diywalına taqap, aylandırıp salınǵan bólmelerdiń eni tórt shıǵanaq edi. 6Bul bólmeler biriniń ústine biri úsh qabat etip salınıp, hár qabatta otız bólmeden bar edi. Ibadatxana diywalları shıǵarılıńqırap tekshedey etip órilip, sol shıǵıńqıraǵan jeri párdiywal xızmetin atqardı. Solay etip, bólmelerdi bastırǵan aǵashlar Ibadatxana diywalına kirmey turdı. 7Ibadatxana diywalınıń tómengi bólegi joqarıdaǵı bólegine qaraǵanda qalıńıraq bolǵanı ushın joqarıdaǵı bólmeler keńirek edi. Tómengi qabattan ekinshi qabatqa, onnan úshinshi qabatqa kóteriletuǵın edi.

8Men Ibadatxana átirapına salınǵan usı bólmelerdiń tırnaǵın kórdim. Onıń biyikligi bir tayaq, yaǵnıy altı shıǵanaq edi. 9Bólmelerdiń sırtqı diywalınıń qalıńlıǵı bes shıǵanaq edi. Ibadatxana aylanasında aylanıp turǵan bólmeler menen 10ruwxaniylerdiń bólmeleriniń arasındaǵı aralıqtıń eni jigirma shıǵanaq edi. 11Bólmelerdiń qubla hám arqa tárepinde ashıq maydanǵa qaraǵan esikleri bar edi. Bólmeler átirapındaǵı sırtqa shıǵıńqırap turǵan tırnaqtıń eni bes shıǵanaq edi.

Ibadatxananıń batısındaǵı imarat

12Ibadatxananıń artındaǵı, yaǵnıy batıs tárepindegi ashıq maydanda eni jetpis shıǵanaq, uzınlıǵı toqsan shıǵanaq, diywalınıń qalıńlıǵı bes shıǵanaq bolǵan úlken bir imarat bar edi.

Ibadatxanaǵa tiyisli ulıwma ólshemler

13Keyin ol Ibadatxananı ólshedi. Ibadatxananıń uzınlıǵı júz shıǵanaq shıqtı. Ibadatxananıń artındaǵı ashıq maydan, art bettegi imarat hám onıń diywalı júz shıǵanaq shıqtı. 14Ibadatxananıń aldınǵı tárepindegi, yaǵnıy shıǵıs tárepindegi ashıq maydannıń eni júz shıǵanaq shıqtı. 15Ol Ibadatxananıń artındaǵı ashıq maydanǵa qarap turǵan imarattıń uzınlıǵın ólshedi. Imarat penen onıń eki qaptalındaǵı dálizlerdiń uzınlıǵı júz shıǵanaq shıqtı.

Ibadatxananıń ishki qurılısı

Ibadatxananıń ishi hám onıń aywanı, 16bosaǵalar, ayna tárizli oyıqlar hám qosımsha islengen ernekler tabaldırıqtıń aldınan hám edennen ayna tárizli oyıqlarǵa shekem aǵash penen qaplanǵan edi. Ayna tárizli oyıqlarǵa da aǵashtan islew berip qaplanǵan edi. 17Ibadatxana hám aywannıń ishindegi hámme diywalları, qapılardıń joqarısı, 18kerublardıń hám palma aǵashınıń súwretleri salınǵan taxtalar menen qaplanǵan edi. Hár eki kerubtıń ortasında bir palma aǵashınıń súwreti salınǵan bolıp, hár bir kerubtıń eki bet-álpeti bar edi. 19Palma aǵashına bir tárepten kerubtıń adamnıń bet-álpetine uqsaǵan júzi, ekinshi tárepten arıslanǵa uqsaǵan júzi qarap turǵan edi. Bunday súwretler Ibadatxananıń ishki diywalların aylandırıp, 20edennen qapılardıń ústilerine shekem islengen edi. 21Muxaddes bólmeniń qapısınıń jaqlawları tórt múyeshli edi. Eń muxaddes bólmeniń qapısınıń jaqlawları da sonday edi. 22Uzınlıǵı hám eni eki shıǵanaq, biyikligi úsh shıǵanaq bolǵan aǵashtan islengen bir qurbanlıq orın bar edi. Onıń múyeshleri, tiykarı hám qaptalları aǵashtan islengen edi. Sol adam maǵan:

– Bul Jaratqan Iyeniń aldındaǵı stol, – dedi.

23Muxaddes bólmeniń de, Eń muxaddes bólmeniń de jarma qapısı bar edi. 24Olardıń hár bir tárepi eki taxtadan ibarat bolıp, jıynalmalı etip islengen edi. 25Muxaddes bólmeniń qapılarına diywallardaǵıday kerublar menen palma aǵashınıń súwretleri salınǵan edi. Aywannıń aldına aǵash shertek qurılǵan edi. 26Aywannıń eki tárepindegi diywallarda ayna tárizli oyıqlar hám palma aǵashınıń súwretleri bar edi. Ibadatxananıń qosımsha bólmelerinde de shertekler bar edi.