Eze 42 | KaaIBT22L | STEP | Adam meni arqadaǵı jol arqalı sırtqı háwlige alıp shıǵıp, ruwxaniylerdiń bólmelerine alıp bardı. Bul bólmeler ashıq maydannıń hám Ibadatxananıń artındaǵı jaydıń arqa tárepinde jaylasqan edi.

‏ Ezekiel 42

Ruwxaniylerdiń bólmeleri

1 Adam meni arqadaǵı jol arqalı sırtqı háwlige alıp shıǵıp, ruwxaniylerdiń bólmelerine alıp bardı. Bul bólmeler ashıq maydannıń hám Ibadatxananıń artındaǵı jaydıń arqa tárepinde jaylasqan edi. 2 Bólmelerdiń esigi arqaǵa qarap turǵan bolıp, imarattıń uzınlıǵı júz shıǵanaq, eni eliw shıǵanaq edi. 3 Imarattıń bir tárepi ishki háwliniń eni jigirma shıǵanaq bolǵan ashıq jerine, ekinshi tárepi sırtqı háwlidegi tas tóselgen jolǵa qarap turǵan edi. Imarat úsh qabat qılıp qurılǵan bolıp, onıń qaptal dálizleri bar edi. 4 Imarattıń aldında eni on shıǵanaq, uzınlıǵı júz shıǵanaq ^{▼▼ júz shıǵanaq – Áyyemgi grek hám suriya tilindegi awdarmalardan. Evreyshe qoljazbalarda «bir shıǵanaq».} bolǵan ayaq jol bolıp, sol jol arqalı imaratqa kiriwge bolatuǵın edi. Bólmelerdiń qapıları arqaǵa qaray ashılatuǵın edi. 5 Úshinshi qabattaǵı bólmeler ekinshi qabattaǵıǵa, ekinshi qabattaǵı bólmeler birinshi qabattaǵıǵa qaraǵanda tarlaw edi. Sebebi ústingi qabattaǵı bólmelerdiń dálizleri kóbirek orın alıp turǵan edi. 6 Usı úsh qabatlı imaratta háwlilerdegidey sútinler bolmadı. Sonlıqtan joqarǵı qabattaǵı bólmeler tómengi qabattaǵı bólmelerden tar edi. 7 Bólmeler sırtqı háwliden diywal arqalı ajıratılıp turdı. Diywal bólmelerdiń aldında eliw shıǵanaqqa sozılıp jattı. 8 Sırtqı háwlidegi bólmelerdiń uzınlıǵı eliw shıǵanaq, al Ibadatxana táreptegi bólmelerdiń uzınlıǵı júz shıǵanaq edi. 9 Sırtqı háwliden tómengi bólmelerge kiretuǵın awız shıǵıs tárepte jaylasqan edi. 10 Bul awız háwliniń diywalı baslanǵan jerde edi.

Ibadatxananıń qubla ^{▼▼ qubla – Áyyemgi grekshe awdarmadan. Evreyshe qoljazbalarda «shıǵıs».} tárepinde de ruwxaniylerdiń bólmeleri bar edi. Olar ashıq maydannıń hám Ibadatxananıń artındaǵı imarattıń qubla tárepinde jaylasqan edi. 11 Bólmelerdiń aldında ayaq jol bar edi. Bul bólmelerdiń uzınlıǵı da, eni de, barlıq esikleri de, jaylasıwı da arqa táreptegi bólmeler menen birdey kóriniste edi. 12 Qubladaǵı bólmelerge shıǵıstan, diywaldı boylap turǵan joldıń baslanǵan jerinen kiretuǵın edi.

13 Adam maǵan bılay dedi:

– Ashıq maydannıń arqasındaǵı hám qublasındaǵı bólmeler – muxaddes bólmeler. Jaratqan Iyege jaqınlasatuǵın ruwxaniyler eń muxaddes zatlardı sol jerde jeydi. Eń muxaddes qurbanlıqlardı – ǵálle sadaqaların, gúna hám ayıp qurbanlıqların sol jerge qoyadı. Sebebi ol jer muxaddes. 14 Ruwxaniyler muxaddes orınnan sırtqı háwlige tuwrı shıǵıp ketpewi tiyis. Olar xızmet waqtında kiygen kiyimlerin usı jerge sheship qoyıwı kerek. Sebebi bul kiyimler muxaddes. Xalıqtıń aldına shıqpasınan aldın, ruwxaniyler kiyimlerin ózgertiwi kerek.

Ibadatxana aymaǵı

15 Ol Ibadatxananıń ishki jaǵındaǵı ólshemlerdi alıp bolǵannan soń, meni shıǵıstaǵı dárwaza arqalı alıp shıǵıp, Ibadatxana dógeregindegi sırtqı aymaqtı ólshey basladı. 16 Ol ólsheytuǵın tayaq penen shıǵıs tárepti ólshedi. Ol bes júz shıǵanaq shıqtı. 17 Arqa tárepti ólshedi, ol bes júz shıǵanaq shıqtı. 18 Qubla tárepti ólshedi, ol da bes júz shıǵanaq shıqtı. 19 Keyin batısqa aylanıp, onı ólshedi, ol da bes júz shıǵanaq shıqtı. 20 Usılayınsha, ol Ibadatxana aymaǵınıń tórt tárepin ólshep shıqtı. Muxaddes orındı muxaddes emes orınnan ajıratıp turatuǵın diywal bar edi. Onıń uzınlıǵı da, eni de bes júz shıǵanaqqa teń edi.