‏ Ezekiel 43

Jaratqan Iyeniń saltanatınıń Ibadatxananı toltırıwı

1Keyin adam meni shıǵısqa qarap turǵan dárwazaǵa alıp keldi. 2Mine, Izraildıń Qudayınıń saltanatı shıǵıs tárepten kirip keldi. Dawısı kúshli aqqan suwlardıń gúmbirlisi yańlı edi. Saltanatınan jer júzi nurǵa tolıp turdı. 3Bul ayan Quday Erusalimdi nabıt qılıwǵa kelgeninde hám Kebar kanalı boyında bolǵanımda kórgen ayanlarıma uqsar edi. Men jerge et betimnen jıǵıldım. 4Jaratqan Iyeniń saltanatı shıǵısqa qaraǵan dárwazadan Ibadatxanaǵa kirdi. 5Ruwx meni kóterip, ishki háwlige alıp keldi. Men Ibadatxananıń Jaratqan Iyeniń saltanatına tolıp turǵanın kórdim.

6Adam qasımda turǵanında, Ibadatxanadan maǵan sóylegen dawıstı esittim. 7Ol bılay dedi:

– Insan ulı, bul orın Meniń taxtım turatuǵın hám taban tireytuǵın jerim. Usı jerde, Izrail xalqınıń arasında máńgige bolaman. Bunnan bılay, Izrail xalqı da, patshaları da, ózleriniń opasızlıǵı menen hám marhum patshalarına sıyınıwı menen muxaddes atımdı haramlamaytuǵın boladı. 8Olar bosaǵasın bosaǵamnıń qasına, qapılarınıń jaqlawların Meniń qapı jaqlawlarımnıń qasına qurdı. Meniń menen olardıń arasında tek ǵana bir diywal bar edi. Olar islegen jerkenishli isleri arqalı Meniń muxaddes atımdı haramladı. Sonlıqtan ǵázep penen olardı joq qıldım. 9Endi Izrail xalqı opasızlıqların hám marhum patshalarına sıyınıwdı Mennen awlaq qılsın. Sonda Men olardıń arasında máńgige mákan basaman.

10Insan ulı, usı Ibadatxana tuwralı Izrail xalqın xabardar qıl. Olar islegen gúnalarınan uyalsın, mına Ibadatxananıń jobası menen tanısıp shıqsın. 11Eger olar islegen barlıq islerinen uyalıp, pushayman bolsa, onda olarǵa Ibadatxananıń kórinisin, jaylasıw tártibin, kiretuǵın hám shıǵatuǵın jerlerin, onıń qurılısı menen dúzilisin hám tártip-qaǵıydaların kórset. Onıń qurılısı menen qaǵıydaların saqlawı hám olarǵa ámel qılıwı ushın, bulardıń hámmesin olardıń kóz aldına jazıp qoy. 12Ibadatxana nızamı mınaday: tawdıń tóbesi hám onıń átirapındaǵı aymaq – júdá muxaddes! Ibadatxana nızamı mine usınday!

Qurbanlıq orın

13Ibadatxanadaǵı qurbanlıq orınnıń ólshemleri bir shıǵanaq hám qosımsha tórt eli turatuǵın uzınıraq shıǵanaq penen ólshenedi. Qurbanlıq orınnıń aynalasında tereńligi bir shıǵanaq, eni bir shıǵanaq, erneginiń eni bir qarıs bolǵan salmasha boladı. Qurbanlıq orınnıń biyikligi mınaday: 14Qurbanlıq orınnıń tómengi bóleginiń biyikligi salmashanıń túbinen ólshegende eki shıǵanaq, ústingi tárepiniń ekinshi bólektiń túbine deyingi aralıǵı bir shıǵanaq. Ortadaǵı bólektiń biyikligi tórt shıǵanaq, ústingi tárepiniń úshinshi bólektiń túbine deyingi aralıǵı bir shıǵanaq. 15Eń ústingi úshinshi bólektiń, yaǵnıy qurbanlıq jaǵılatuǵın orınnıń biyikligi tórt shıǵanaq bolıp, onnan tórt shaq shıǵıp turadı. 16Qurbanlıq orınnıń oshaǵınıń uzınlıǵı da, eni de on eki shıǵanaq bolıp, tórt múyeshlik kórinisinde boladı. 17Ortadaǵı bóleginiń tórt tárepi de on tórt shıǵanaqtan edi. Qurbanlıq orınnıń túbindegi salmashanıń erneginiń biyikligi yarım shıǵanaq boladı. Dógeregine aylandırıp islengen salmashanıń tereńligi bir shıǵanaq edi. Qurbanlıq orınnıń tekshesi shıǵıs tárepte boladı.

18Adam maǵan bılay dedi:

– Insan ulı! Quday Iye bılay deydi: «Qurbanlıq orındı qurǵannan keyin, onıń ústinde jandırılatuǵın qurbanlıqtı usınıw hám qan serpiw qaǵıydaları mınaday: 19Maǵan xızmet etiw ushın janıma jaqınlasa alatuǵın Sadoq násilinen bolǵan lebiyli ruwxaniylerge gúna qurbanlıǵı retinde bir buǵa ber, – deydi Quday Iye. 20– Buǵanıń qanın alıp, qurbanlıq orınnıń tórt shaqına súrtip, joqarǵı bólektiń tórt múyeshine hám erneklerine aylandırıp serpip shıqsın. Usılayınsha qurbanlıq orın tazalanıp, páklenedi. 21Keyin gúna qurbanlıǵı ushın shalınǵan buǵanı Muxaddesxananıń sırtındaǵı arnawlı orınǵa alıp barıp, órtep jibersin.

22Ekinshi kúni gúna qurbanlıǵı ushın minsiz teke usınılsın. Buǵanıń qanı menen tazalanǵanı sıyaqlı, tekeniń qanı menen de qurbanlıq orın tazalansın. 23Qurbanlıq orındı páklegennen soń, minsiz buǵa menen qoshqardı 24Jaratqan Iyeniń, Meniń aldıma alıp kel. Ruwxaniyler olarǵa duz sewip, olardı jandırılatuǵın qurbanlıq qılıp Maǵan usınsın.

25Jeti kún dawamında, hár kúni minsiz bir tekeni gúna qurbanlıǵı qılıp usınsın. Jáne de, minsiz bir buǵa menen minsiz bir qoshqardı da qurbanlıqqa usınsın. 26Usı jeti kún dawamında ruwxaniyler qurbanlıq orındı páklep tazalasın. Keyin onı paydalanıwǵa boladı. 27Jeti kún tamam bolǵannan keyin, segizinshi kúnnen baslap ruwxaniyler jandırılatuǵın qurbanlıqlarıńızdı hám tatıwlıq qurbanlıqlarıńızdı qurbanlıq orında usınadı. Sonda Meniń sizlerge kewlim toladı, – deydi Quday Iye».