‏ Ezekiel 44

Shıǵıs dárwazanıń wazıypası

1Sol adam meni qaytadan Muxaddesxananıń shıǵısındaǵı sırtqı dárwaza janına alıp bardı. Dárwaza jabıq edi. 2Jaratqan Iye maǵan bılay dedi:

– Bul dárwaza bárqulla jabıq tursın, ashılmasın, bunnan hesh kim kirmesin. Sebebi Men, Izraildıń Qudayı Jaratqan Iye bunnan kirdim, sonlıqtan ol jabıq halında qaladı. 3Tek húkimdar ǵana Meniń aldımda qurbanlıq asınan jew ushın bul imaratqa kiredi. Ol aywan arqalı kirip, sol jol menen shıǵıp ketedi.

Ibadatxanadaǵı xızmet tuwralı

4Keyin ol adam meni arqadaǵı dárwaza arqalı Ibadatxanaǵa alıp keldi. Men Ibadatxananıń Jaratqan Iyeniń saltanatına tolıp turǵanın kórdim hám et betimnen jerge jıǵıldım. 5Jaratqan Iye maǵan bılay dedi:

– Insan ulı, kórgen hám esitkenlerińe dıqqatlı bol. Men saǵan Jaratqan Iyeniń Úyiniń qaǵıydaları hám nızamları tuwralı aytaman. Ibadatxanaǵa kimlerdiń kirip-shıǵıwına bolatuǵınına dıqqatlı bol. 6Qozǵalańshı Izrail xalqına ayt: «Quday Iye bılay deydi: Izrail xalqı, jeter endi, jerkenishli islerińizdi toqtatıń! 7Qurbanlıqtıń qanı menen mayın awqat sıpatında Maǵan usınǵanıńızda, júregi hám denesi súnnet etilmegen jat jerlilerdi Muxaddesxanama alıp kirip, onı haramladıńız. Jerkenishli islerińiz benen kelisimimdi buzdıńız. 8Muxaddes zatlarımdı qorǵawǵa baylanıslı talaplarımdı orınlamadıńız. Bul zatlarǵa qaraw ushın ózlerińizdiń ornıńızǵa jat jerlilerdi xızmetke qoydıńız. 9Quday Iye bılay deydi: Júregi hám eti súnnet etilmegen birde bir jat jerli, hátte, ol izraillılar arasında jasasa da Muxaddes mákanıma kirmewi kerek.

10Izrail joldan azıp, butlarǵa tabınıp ketkende, olarǵa qosılıp Mennen júz burǵan lebiyliler óz gúnasınıń jazasın tartadı. 11Olar Muxaddes mákanımda xızmet ete beredi: dárwazada qarawıl boladı, Ibadatxanaǵa baylanıslı xızmetlerdi atqaradı. Jandırılatuǵın qurbanlıqlardı hám basqa qurbanlıqlardı soyadı, xalıqqa xızmet etedi. 12Biraq butlarǵa tabınıp júrgen Izrail xalqına xızmet etip, olardı gúnaǵa baslaǵanı ushın ant ishemen, – deydi Quday Iye, – olar óz ayıbınıń jazasın tartadı. 13Olar ruwxaniy bolıp Maǵan jaqınlaspaydı, muxaddes zatlarıma hám eń muxaddes zatlarıma qol tiygizbeydi. Islegen jerkenishli isleri ushın uyatqa qaladı. 14Degen menen, Ibadatxana menen baylanıslı xızmetti hám ol jerde islenetuǵın barlıq ápiwayı islerdi olarǵa júkleymen.

15Izrail xalqı Mennen júz burıp ketkende, Muxaddesxananıń xızmetin sadıqlıq penen atqarǵan Sadoq násilinen bolǵan lebiyli ruwxaniyler xızmet etiw ushın Maǵan jaqınlasadı. Qurbanlıqtıń mayın hám qanın usınıw ushın Meniń aldımda turadı, – deydi Quday Iye. 16– Tek olar ǵana Muxaddesxanama kirip, Maǵan xızmet etiw hám talaplarımdı orınlaw ushın dasturxanıma jaqınlasadı.

17Ruwxaniyler ishki háwliniń dárwazasınan kirerde, zıǵırdan tigilgen kiyim kiyip alsın. Ishki háwlide yamasa Ibadatxana ishinde xızmet qılǵanında ústine júnli kiyim kiymesin. 18Baslarına zıǵır sálle orasın hám zıǵır diz kiyim kiyip alsın. Terletetuǵın kiyim kiymesin. 19Sırtqı háwlige, xalıqtıń aldına shıqpastan aldın xızmet waqtında kiygen kiyimlerin sheship, muxaddes bólmelerde qaldırıp, basqa kiyim kiysin. Xalıq olardıń muxaddes kiyimlerine tiyip ketpesin.

20Ruwxaniyler shashların páki menen aldırmawı hám uzın etip ósirmewi kerek. Al shashların bárqulla keltertip tursın. 21Ishki háwlige kirgende birde bir ruwxaniy sharap ishpewi kerek. 22Olar jesirge de, ajırasqan hayalǵa da úylenbewi kerek. Tek ǵana Izrail násilinen bolǵan qızlarǵa hám ruwxaniyden qalǵan jesirge úyleniwi múmkin.

23Ruwxaniyler xalqıma muxaddes nárse menen muxaddes emes nárseniń, haram menen hadaldıń ayırmashılıǵın úyretsin. 24Dawlı máselelerde qazılıq etip, Meniń nızamlarıma say qarar shıǵarsın. Men belgilegen bayramlarǵa baylanıslı kórsetpelerimdi hám qaǵıydalarımdı qadaǵalasın. Shabbatımdı muxaddes saqlasın. 25Olardan hesh biri óli denege jaqınlap, ózin haramlamasın. Tek ata-anası, ul-qızı, aǵa-inisi yamasa turmısqa shıqpaǵan ájapa hám qarındası ólse ǵana, ruwxaniy ólige jaqınlap, ózin haramlawı múmkin. 26Ruwxaniy tazalanıw rásiminen ótkennen keyin, jáne jeti kún kútiwi kerek. 27Ol Muxaddes orında xızmet etiw ushın ishki háwlige kirgen kúni, ózi ushın gúna qurbanlıǵın beriwi kerek, – deydi Quday Iye.

28– Ruwxaniylerge Izrail jerinen úles berilmesin. Olardıń miyrası da, úlesi de Men bolaman. 29Olar ǵálle sadaqalarınan, gúna hám ayıp qurbanlıqlarınan jeydi. Izrailda tolıǵı menen Maǵan baǵıshlanǵan hár bir nárse olarǵa tiyisli boladı. 30Qamırdıń birinshi zuwalasınan jabılǵan nanlar hám barlıq sıylarıńız ruwxaniylerdiki boladı. Úyińizde bereket bolıwı ushın, biydaydıń dáslepki tartılǵan unın ruwxaniylerge beriń. 31Haram ólgen yaki jırtqısh haywan talaǵan qustıń hám haywannıń góshin jew ruwxaniylerge qadaǵan etiledi».