Eze 45 | KaaIBT22L | STEP | «Izrail jerin urıwlarǵa bólgenińizde, uzınlıǵı jigirma bes mıń shıǵanaq, eni jigirma mıń shıǵanaq bolǵan bir bólek jerdi muxaddes aymaq sıpatında Jaratqan Iye ushın ajıratıń. Bul jer tolıǵı menen muxaddes sanalsın.

‏ Ezekiel 45

Jaratqan Iyeniń úlesi

1 «Izrail jerin urıwlarǵa bólgenińizde, uzınlıǵı jigirma bes mıń shıǵanaq, eni jigirma mıń shıǵanaq ^{▼▼ jigirma mıń shıǵanaq – Áyyemgi grekshe awdarmadan (jáne usı baptıń 3-5 ayatlarına hám 48:9-13 ke qarań). Evreyshe qoljazbalarda «on mıń shıǵanaq».} bolǵan bir bólek jerdi muxaddes aymaq sıpatında Jaratqan Iye ushın ajıratıń. Bul jer tolıǵı menen muxaddes sanalsın. 2 Sol jerdiń bes júz shıǵanaqqa bes júz shıǵanaq bolǵan tórt múyeshli jeri Muxaddesxana ushın ajıratılsın. Onıń átirapın aylanǵan eliw shıǵanaqlıq ashıq maydan bolsın. 3 Muxaddes aymaqtan uzınlıǵı jigirma bes mıń shıǵanaq, eni on mıń shıǵanaq bolǵan bir bólek ólshe. Muxaddesxana jaylasqan bul jer júdá muxaddes jer boladı. 4 Jerdiń bul muxaddes bólegi Jaratqan Iyege jaqınlasatuǵın ruwxaniylerge, yaǵnıy Muxaddesxanada xızmet etetuǵın ruwxaniylerge tiyisli boladı. Bul bólekte Muxaddesxana ushın muxaddes orın hám ruwxaniylerdiń úyleri boladı. 5 Uzınlıǵı jigirma bes mıń shıǵanaq, eni on mıń shıǵanaq bolǵan muxaddes aymaqtıń ekinshi yarımı Ibadatxana xızmetindegi lebiylilerge jasaytuǵın qalaların qurıw ushın múlik etip beriledi. 6 Muxaddes aymaqtıń qaptalınan eni bes mıń shıǵanaq, uzınlıǵı jigirma bes mıń shıǵanaq bolǵan jerdi qala ushın ajıratıń. Bul jer pútkil Izrail xalqına tiyisli boladı».

Húkimdar ushın jer

7 «Muxaddes aymaq penen qala aymaǵınıń eki qaptalındaǵı jerler húkimdarǵa berilsin. Ol batıs tárepten batısqa, shıǵıs tárepten shıǵısqa qaray sozılıp, onıń uzınlıǵı batıstan shıǵısqa shekem sozılǵan Izrail urıwlarına ajıratılǵan jerdiń uzınlıǵına teń boladı. 8 Bul Izrailda húkimdardıń úlesi boladı. Bunnan bılay, húkimdarlarım xalqıma zulımlıq qılmaydı. Izrail urıwları óz jerlerine ózleri iyelik qıladı».

Ólshem birlikleri

9 «Quday Iye bılay deydi: Jeter endi, Izrail húkimdarları! Zorlıq-zombılıqtı hám eziwshilikti toqtatıń. Ádalat hám tuwrılıqtı júzege asırıń. Xalqımdı óz iyeliginen quwıp shıǵarıwdı toqtatıń, – deydi Quday Iye. 10 – Tárezińiz tuwrı bolsın, sıyımlılıqtı ólsheytuǵın efa ^{▼▼ Efa – bir efa shama menen 22 l.} hám suyıqlıqtı ólsheytuǵın bat ^{▼▼ Bat – bir bat shama menen 22 l.} ıdıslarıńız durıs ólshemde bolsın. 11 Efa menen battıń sıyımlılıq kólemi birdey bolsın. Efa da, bat ta xomerdiń onnan bir bólegine ^{▼▼ Xomer – bir xomer shama menen 220 l.} teń bolsın. Efa ushın da, bat ushın da xomer úlgi bolıp belgilensin. 12 Bir shekel jigirma geraǵa ^{▼▼ Gera – bir gera shama menen 0,5 gr.} teń bolsın, jigirma shekel, jigirma bes shekel hám on bes shekel qosılıp bir minanı ^{▼▼ Mina – bir mina shama menen 550 gr.} qurasın».

Salıqlar

13 «Beretuǵın salıǵıńız mınadan ibarat: biydaydıń alpıstan bir bólegi, arpanıń alpıstan bir bólegi, 14 záytún mayınıń júzden bir bólegi. Maydı ólshegende battan paydalanıń, on bat bir xomerge, yaǵnıy bir korǵa ^{▼▼ Kor – bir kor shama menen 220 l.} tuwrı keledi. 15 Sonday-aq Izrail jaylawındaǵı eki júz qoydan birewi húkimdarǵa berilsin. Bular ǵálle sadaqası, jandırılatuǵın qurbanlıq hám tatıwlıq qurbanlıǵı bolıp, gúnadan pákleniw ushın beriledi, – deydi Quday Iye. 16 – Eldegi pútkil xalıq bul salıqlardı Izrail húkimdarına beriwi kerek. 17 Húkimdar Izrailda barlıq bayramlarda – úlken bayramlarda, jáne de Jańa ay bayramında hám Shabbat kúnlerinde jandırılatuǵın qurbanlıqlardı, ǵálle sadaqaların hám ishimlik sadaqaların támiyinlewi shárt. Ol Izrail xalqın páklew ushın beriletuǵın gúna qurbanlıǵın, ǵálle sadaqasın, jandırılatuǵın qurbanlıqtı hám tatıwlıq qurbanlıǵın alıp keledi.

18 Quday Iye bılay deydi: Birinshi aydıń birinshi kúni minsiz bir buǵa alıp, Muxaddesxananı pákle. 19 Ruwxaniy gúna qurbanlıǵınıń qanınan alıp, onı Ibadatxana qapılarınıń jaqlawlarına, qurbanlıq orınnıń ústiniń tórt múyeshine, ishki háwlige kiretuǵın dárwazalardıń jaqlawlarına jaqsın. 20 Xalıqtıń bilmey hám abaylamay qılǵan gúnaları ushın jetinshi kúni de solay isleńler. Usılayınsha Ibadatxananı pákleń.

21 Birinshi aydıń on tórtinshi kúni Qutqarılıw bayramın bayramlań, bunda jeti kún dawamında ashıtqısız nan jewińiz kerek. ^{▼▼ Shıǵ 12:1-20.} 22 Bayramnıń birinshi kúni húkimdar óziniń hám xalıqtıń gúnası ushın bir buǵanı gúna qurbanlıǵı ushın usınadı. 23 Bayramnıń jeti kúni dawamında hár kúni húkimdar Maǵan minsiz jeti buǵa menen minsiz jeti qoshqardı jandırılatuǵın qurbanlıq etip hám hár kúni bir tekeni gúna qurbanlıǵı etip beriwi kerek. 24 Qurbanlıq qılınatuǵın hár bir buǵa hám hár bir qoshqar menen birge ǵálle sadaqası sıpatında bir efadan un hám hár bir efa ushın bir hinnen záytún mayın bersin.

25 Jetinshi aydıń on besinshi kúni baslanatuǵın Qos bayramı ushın da húkimdar jeti kún dawamında beriletuǵın gúna qurbanlıqların, jandırılatuǵın qurbanlıqlardı, ǵálle sadaqaların hám záytún mayın bersin». ^{▼▼ Leb 23:33-43.}