Eze 46 | KaaIBT22L | STEP | «Quday Iye bılay deydi: Ishki háwlige alıp kiretuǵın shıǵıs táreptegi dárwaza altı jumıs kúni dawamında jabıq tursın. Al Shabbat kúni hám Jańa ay bayramı kúni ashılsın.

‏ Ezekiel 46

1 «Quday Iye bılay deydi: Ishki háwlige alıp kiretuǵın shıǵıs táreptegi dárwaza altı jumıs kúni dawamında jabıq tursın. Al Shabbat kúni hám Jańa ay bayramı kúni ashılsın. 2 Húkimdar dárwaza imaratınıń aywanı arqalı dárwazanıń ishinen ótip, dárwazanıń jaqlawlarınıń janında tursın. Ruwxaniy onıń jandırılatuǵın hám tatıwlıq qurbanlıqların usınıp atırǵanda, húkimdar aywan bosaǵasında turıp sıyınsın. Keyin kelgen jolı menen shıǵıp ketsin. Biraq dárwaza keshke shekem ashıq tursın. 3 Hár Shabbat hám Jańa ay bayramı kúni Izrail xalqı usı dárwaza aldında turıp, Jaratqan Iyege sıyınsın. 4 Shabbat kúni húkimdar Jaratqan Iyege minsiz altı toqlı menen minsiz bir qoshqardı jandırılatuǵın qurbanlıq ushın alıp kelsin. 5 Qoshqarǵa qosıp, ǵálle sadaqası ushın bir efa un bersin. Al toqlılar menen birge qálegen muǵdarda un bersin. Hár bir efa unǵa bir hin muǵdarda záytún mayın qosıp bersin. 6 Jańa ay bayramı kúni minsiz bir buǵa, altı toqlı hám bir qoshqar bersin. 7 Ǵálle sadaqası ushın buǵaǵa qosıp bir efa, qoshqarǵa qosıp bir efa un alıp kelsin. Al toqlılar menen birge qálegen muǵdarda ǵálle sadaqasın bersin. Hár bir efa un ushın bir hin záytún mayın qosıp bersin. 8 Húkimdar ishke kirgende, dárwaza imaratınıń aywanı arqalı kirsin hám sol jol menen qaytıp shıqsın.

9 Belgilengen bayramlarda úlke xalqı sıyınıw ushın Jaratqan Iyeniń aldına kelgende, arqadaǵı dárwazadan kirgenleri qubladaǵı dárwazadan, qubladaǵı dárwazadan kirgenleri arqadaǵı dárwazadan shıǵıp ketsin. Hár bir adam kirgen dárwazasınan qaytıp shıqpay, qarama-qarsı dárwazadan shıǵıp ketiwi kerek. 10 Húkimdar olardıń arasında bolıwı kerek. Xalıq kirgende kiriwi, xalıq shıqqanda shıǵıwı kerek.

11 Úlken bayramlarda hám belgilengen bayramlarda qurbanlıq qılınatuǵın hár bir buǵa hám hár bir qoshqar menen birge bir efadan ǵálle sadaqası beriledi. Toqlılar menen birge qálegen muǵdarda ǵálle sadaqası beriledi. Hár bir efa un menen birge bir hin záytún mayı beriledi. 12 Húkimdar Jaratqan Iyege ıqtıyarlı túrde jandırılatuǵın qurbanlıq yamasa tatıwlıq qurbanlıǵın bermekshi bolsa, oǵan shıǵısqa qaraǵan dárwaza ashılsın. Bul qurbanlıqlardı ol Shabbat kúni beretuǵın qurbanlıqlarday etip usınsın. Keyin ol sırtqa shıǵıp ketedi hám dárwaza jabıladı».

Kúndelikli qurbanlıqlar

13 «Hár kúni azanda bir jasar minsiz bir toqlını jandırılatuǵın qurbanlıq etip alıp kelip, onı Jaratqan Iyege usınıń. 14 Onıń menen birge hár kúni azanda ǵálle sadaqası ushın efanıń altıdan bir bólegi muǵdarında sapalı un hám unǵa aralastırıw ushın hinniń úshten bir bólegi muǵdarında záytún mayı berilsin. Ǵálle sadaqasınıń Jaratqan Iyege usınıw qaǵıydası máńgige usınday boladı. 15 Toqlı, ǵálle hám záytún mayı jandırılatuǵın qurbanlıq ushın hár kúni azanda úzliksiz túrde alıp kelinsin».

Húkimdardıń jer múlki tuwralı nızam

16 «Quday Iye bılay deydi: Eger húkimdar óz iyeliginen ullarınıń birine jer sawǵa qılsa, bul jer onıń áwladlarına da miyrasqa ótip, olardıń miyrası boladı. 17 Eger húkimdar xızmetshileriniń birine jer sawǵa qılsa, xızmetshi bul jerge Qutlı jılǵa ^{▼▼ Leb 25:8-17; 27:17-24.} deyin ǵana iyelik qıla aladı. Keyin jer húkimdarǵa qaytarıp beriledi. Húkimdardıń jeri tek onıń balalarına ǵana miyrasqa óte aladı. 18 Húkimdardıń xalıqtı jerden quwıp shıǵarıp, olardıń jerin tartıp alıwǵa haqısı joq. Ol tek óz jerinen balalarına miyras ajıratıwı múmkin. Xalqımnıń hesh biri óz jerinen quwıp shıǵarılmasın».

Ibadatxana asxanası

19 Keyin adam meni dárwaza janındaǵı jol arqalı ruwxaniylerge arnalǵan, arqaǵa qarap turǵan muxaddes bólmelerge alıp keldi. Sol jerden batıstaǵı eń shetki orındı kórsetti. 20 Ol bılay dedi:

– Bul jerde ruwxaniyler ayıp hám gúna qurbanlıqlarınıń góshin pisiredi hám ǵálle sadaqasınıń nanın jabadı. Xalıqtıń muxaddes azıq-awqatlarǵa tiyip ketpewi ushın, olardı sırtqı háwlige shıǵarmawı kerek.

21 Keyin ol meni sırtqı háwlige shıǵarıp, háwliniń tórt múyeshine alıp bardı. Hár bir múyeshte qorshalǵan bir orın bar edi. 22 Háwliniń hár bir múyeshinde ólshemleri birdey bolǵan, uzınlıǵı qırıq shıǵanaq, eni otız shıǵanaq bolǵan ústi jabıq orınlar bar edi. 23 Olardıń hámmesi diywal menen aylandırılǵan bolıp, diywaldıń ishi boylap oshaqlar qurılǵan edi. 24 Adam maǵan bılay dedi:

– Bular asxanalar. Onda Ibadatxana xızmetshileri xalıqtıń alıp kelgen qurbanlıq góshlerin pisiredi.