‏ Ezekiel 47

Ibadatxanadan aǵıp shıqqan dárya

1Keyin ol meni qaytadan Ibadatxana qapısına alıp bardı. Ibadatxana shıǵısqa qarap turǵan edi. Men Ibadatxana bosaǵasınıń astınan shıǵısqa qaray suw aǵıp turǵanın kórdim. Suw Ibadatxananıń qubla tárepinen shıǵıp, qurbanlıq orınnıń qublası arqalı aǵıp turǵan edi. 2Adam meni arqa dárwaza arqalı alıp shıqtı hám sırt jaq penen aylanıp, shıǵısqa qarap turǵan sırtqı dárwazaǵa alıp bardı. Suw qubla tárepten aǵıp turǵan edi.

3Adam qolındaǵı ólshewish jibi menen shıǵısqa qaray júrdi de, mıń shıǵanaq aralıqtı ólshedi. Keyin meni suwǵa túsirdi. Suw tobıǵıma kelip turdı. 4Ol taǵı mıń shıǵanaq aralıqtı ólshep, meni armanıraq alıp bardı. Suw dizeme keldi. Jáne mıń shıǵanaq aralıqtı ólshep, meni jáne de armanıraq alıp bardı. Endi suw belime deyin keldi. 5Keyin ol jáne mıń shıǵanaq aralıqtı ólshep aldı. Bul jerde suw men óte almaytuǵın dáryaǵa aylandı. Suw kóterilip, júzip ótpese, keship óte almaytuǵın dáryaǵa aylanǵan edi.

6Ol mennen:

– Insan ulı, mınanı kórip tursań ba? – dep soradı. Keyin meni jaǵaǵa alıp shıqtı. 7Jaǵaǵa shıqqanımda, men eki jaǵada da kóp tereklerdiń ósip turǵanın kórdim.

8Ol maǵan bılay dedi:

– Bul suw shıǵısqa qaray aǵıp, Iordan tegisligi arqalı Óli teńizge quyadı. Sonda teńizdiń suwı dushshı boladı. 9Dárya aǵıp barǵan hámme jerde tirishilik baslanadı, balıqlar tolıp tasadı. Sebebi dárya suwı ashshı suwdı dushshı suwǵa aylandıradı. Bul suwlar aǵıp ótken jerlerdiń hámmesinde tirishilik boladı. 10Dárya boylarında balıqshılar turıp, En-Gediyden En-Eglayımǵa shekemgi orınlarda awların keptiredi. Jer Orta teńizindegidey balıqlardıń túri kóp boladı. 11Biraq batpaqlıqlar menen shalshıq suwlardıń suwları tazalanbaydı. Olar duz káni bolıp qala beredi. 12Dáryanıń eki tárepinde hár túrli miywe aǵashları ósedi, japıraqları solımaydı, miyweleri tawısılmaydı, hár ayda miywe beredi. Óytkeni Muxaddesxanadan shıqqan suw olardı suwǵaradı. Miyweleri azıq boladı, al japıraqları shıpalı boladı.

Eldiń jańa shegaraları

13Quday Iye bılay deydi: «Jerdi Izraildıń on eki urıwına bólip bergenińizde, mınaday qılıń: Yusupke eki pay berilsin. 14Jerdi urıwlarǵa teńdey bólip berińler. Men bul jerdi ata-babalarıńızǵa beremen dep ant ishtim. Bul jer sizlerdiń múlkińiz boladı.

15Eldiń shegarası mınaday: arqa shegarańız Jer Orta teńizinen baslanıp, Xetlon jolı arqalı Lebo-Xamattıń qası menen Sedad, 16Berota qalalarına hám Damask penen Xamat aralıǵında jaylasqan Sibrayım qalasına deyin barıp, Xawran shegarasındaǵı Xaser-Hattixonǵa deyin sozıladı. 17Solay etip, shegara Jer Orta teńizinen Xasar-Enonǵa shekem sozıladı. Arqada Damask hám Xamat iyelikleri bar. Bul arqa shegarańız.

18Shıǵıs shegara Xawran hám Damask aralıǵınan baslanıp, Izrail hám Gilad jerleri arasınan aǵıp ótetuǵın Iordan dáryası arqalı shıǵıstaǵı teńizge barıp, sol jerden Tamar qalasına deyin jetip baradı. Bul shıǵıs shegarańız.

19Qubla shegarańız Tamar qalasınan Qadeshtegi Meriba suwlarına shekem, keyin Mısır shegarasındaǵı say boylap barıp, Jer Orta teńizine kelip tireledi. Bul qubla shegarańız.

20Batıs shegarańız Jer Orta teńizin boylap barıp, Lebo-Xamatqa qarama-qarsı jaylasqan jerge deyin sozıladı. Bul batıs shegarańız boladı.

21Bul jerlerdi Izrail urıwlarına bólip berińler. 22Jerdi ózlerińizge hám arańızda jasap balalı bolǵan kelgindilerge bólistirip beriń. Jat jerliler Izrail urpaqları arasında jergilikli turǵınlar sıpatında qaralsın hám izraillılar menen teńdey úleske iye bolsın. 23Jat jerli qaysı urıwdıń arasına qonıs basqan bolsa, oǵan sol urıwdıń jerinen úles berilsin», – deydi Quday Iye.