Ezekiel 48
Urıwlarǵa tiyisli jerler
1«Mınalar urıwlardıń atları. Dan urıwınıń úlesi arqada jaylasqan. Onıń shegarası Xetlon jolı boylap Lebo-Xamatqa deyin barıp, onnan Damask hám Xamat arasındaǵı arqa shegarada ornalasqan Xasar-Enanǵa deyin sozıladı. Dan urıwına tiyisli aymaq Izrail eliniń shıǵıs shegarasınan batıs shegarasına shekem sozıladı. 2Asherdiń úlesi Dannıń jeri menen shegaralasıp, shıǵıstan batısqa deyin sozıladı. 3Naftaliydiń úlesi Asher jeri menen shegaralasıp, shıǵıstan batısqa deyin sozıladı. 4Menashsheniń úlesi Naftaliydiń jeri menen shegaralasıp, shıǵıstan batısqa deyin sozıladı. 5Efrayımnıń úlesi Menashshe jeri menen shegaralasıp, shıǵıstan batısqa deyin sozıladı. 6Rubenniń úlesi Efrayım menen shegaralasıp, shıǵıstan batısqa deyin sozıladı. 7Yahudanıń úlesi Rubenniń jeri menen shegaralasıp, shıǵıstan batısqa deyin sozıladı. 8Yahudanıń shegarasınan baslap, shıǵıstan batısqa deyin sozılǵan jerdi ajıratıp qoyıń. Onıń eni jigirma bes mıń shıǵanaq, uzınlıǵı shıǵıstan batısqa sozılǵan, urıwlardıń payına tiygen jerdiń uzınlıǵı menen teń bolsın. Bul jerdiń ortasında Muxaddesxana boladı. 9Jaratqan Iyege arnalǵan jerdiń uzınlıǵı jigirma bes mıń shıǵanaq, eni jigirma mıń shıǵanaq ▼ boladı. 10Muxaddes aymaqtıń ruwxaniylerge tiyisli bóleginiń arqadaǵı uzınlıǵı jigirma bes mıń shıǵanaq, batıstaǵı eni on mıń shıǵanaq, shıǵıstaǵı eni on mıń shıǵanaq, qubladaǵı uzınlıǵı jigirma bes mıń shıǵanaq boladı. Onıń ortasında Jaratqan Iyeniń Muxaddesxanası boladı. 11Bul úles Sadoq násilinen shıqqan hám ruwxaniylikke tayınlanǵan ruwxaniylerge tiyisli boladı. Olar Meniń talaplarımdı orınladı. Izrail xalqı menen birge lebiyliler de joldan azǵanda, olar Maǵan sadıq qaldı. 12Muxaddes aymaqtıń júdá muxaddes bólegi ruwxaniylerge tiyisli boladı. Ol jer lebiylilerdiń jerine shegaralas boladı. 13Ruwxaniylerdiń jeriniń janınan lebiylilerge beriletuǵın jerdiń uzınlıǵı jigirma bes mıń shıǵanaq, eni jigirma mıń shıǵanaq boladı. Bul bólektiń uzınlıǵı barlıǵı bolıp jigirma bes mıń shıǵanaq, eni jigirma mıń shıǵanaq boladı. 14Bul bólekti satıwǵa da, almastırıwǵa da bolmaydı. Bul eldegi eń jaqsı úles boladı. Onı basqa adamnıń qolına beriwge bolmaydı. Sebebi bul – Jaratqan Iyeniń muxaddes jeri. 15Qalǵan eni bes mıń shıǵanaq, uzınlıǵı jigirma bes mıń shıǵanaq bolǵan ápiwayı jer qala úyleri hám jaylawlar ushın beriledi. Qala sol jerdiń orayında jaylasadı. 16Qalanıń ólshemi mınaday: arqa tárepi tórt mıń bes júz, qubla tárepi tórt mıń bes júz, shıǵıs tárepi tórt mıń bes júz hám batıs tárepi tórt mıń bes júz shıǵanaq. 17Qala arqa, shıǵıs, qubla hám batıs táreplerden eni eki júz eliw shıǵanaq bolǵan jaylawlar menen qorshalǵan boladı. 18Qaladan tısqarı bolǵan, muxaddes jer menen shegaralas turǵan jerdiń shıǵıs tárepi de, batıs tárepi de on mıń shıǵanaq boladı. Bul jerde qalada islewshiler ushın azıq jetistiriledi. 19Izraildıń hámme urıwlarınan qalada islewshiler bul atızlarǵa egin egiwi múmkin. 20Ulıwma ajıratılǵan jerdiń uzınlıǵı da, eni de jigirma bes mıń shıǵanaqtan boladı, al qalaǵa ajıratılǵan úles muxaddes aymaqtıń tórtten birine teń boladı. 21Muxaddes aymaqtıń hám qalaǵa qaraslı bólektiń eki tárepindegi jerler húkimdarǵa tiyisli boladı. Onıń uzınlıǵı jigirma bes shıǵanaq bolıp, shıǵıs tárepindegisi shıǵıs shegaraǵa, batıs tárepindegisi batıs shegaraǵa barıp taqaladı. Urıwlarǵa tiyisli úleske shegaralas jaylasqan bul eki aymaq húkimdarǵa tiyisli boladı. Muxaddes Ibadatxana turǵan muxaddes aymaq olardıń ortasında boladı. 22Solay etip, lebiylilerdiń úlesi hám qala múlki húkimdardıń iyeliginiń arasında jaylasadı. Húkimdardıń iyeligi Yahuda hám Benyamin jerleriniń ortasında boladı. 23Qalǵan urıwlarǵa kelsek, Benyaminniń úlesi shıǵıstan batısqa deyin sozıladı. 24Shimonnıń úlesi Benyaminniń úlesi menen shegaralasıp, shıǵıstan batısqa deyin sozıladı. 25Issaxardıń úlesi Shimonnıń úlesi menen shegaralasıp, shıǵıstan batısqa deyin sozıladı. 26Zebulonnıń úlesi Issaxardıń úlesi menen shegaralasıp, shıǵıstan batısqa deyin sozıladı. 27Gadtıń úlesi Zebulonnıń úlesi menen shegaralasıp, shıǵıstan batısqa deyin sozıladı. 28Gadtıń úlesiniń qubla shegarası Tamar qalasınan Qadeshtegi Meriba suwlarına shekem baradı, ol jerden Mısır shegarasındaǵı say boylap ótip, Jer Orta teńizine jetedi. 29Solay etip, Izrail urıwlarına bólip beretuǵın úles jerlerińiz usılar», – deydi Quday Iye.Qalanıń aynala dógeregi
30«Qalanıń aynala dógeregi mınaday bolsın: uzınlıǵı tórt mıń bes júz shıǵanaq bolǵan arqa tárepte 31úsh dárwaza bolsın. Qala dárwazaları Izrail urıwlarınıń atları menen atalsın. Arqa táreptegi dárwazalar Ruben, Yahuda hám Lebiy dárwazaları dep atalsın. 32Uzınlıǵı tórt mıń bes júz shıǵanaq bolǵan shıǵıs tárepte úsh dárwaza bolıp, olar Yusup, Benyamin hám Dan dárwazaları dep atalsın. 33Uzınlıǵı tórt mıń bes júz shıǵanaq bolǵan qubla tárepte úsh dárwaza bolıp, olar Shimon, Issaxar hám Zebulon dárwazaları dep atalsın. 34Uzınlıǵı tórt mıń bes júz shıǵanaq bolǵan batıs tárepte úsh dárwaza bolıp, olar Gad, Asher hám Naftaliy dárwazaları dep atalsın. 35Qalanıń aylanası barlıǵı bolıp on segiz mıń shıǵanaq boladı. Qala sol kúnnen baslap „Jaratqan Iye sol jerde“dep ataladı».
Copyright information for
KaaIBT22L