Eze 5 | KaaIBT22L | STEP | – Insan ulı! Ótkir bir qılısh al, onı páki ornına paydalanıp, shashıń menen saqalıńdı qırqıp tasla. Keyin shashıńdı ólshew ushın tárezi alıp, olardı bóleklerge ból.

‏ Ezekiel 5

Erusalimdi qırǵın bolıw kútpekte

1 – Insan ulı! Ótkir bir qılısh al, onı páki ornına paydalanıp, shashıń menen saqalıńdı qırqıp tasla. Keyin shashıńdı ólshew ushın tárezi alıp, olardı bóleklerge ból. 2 Qalanıń qamal kúnleri tamamlanǵanda, shashıńnıń úshten bir bólegin gerbishke sızılǵan qalanıń ústinde jandır. Úshten bir bólegin qala átirapına shashıp taslap, qılısh penen maydala. Qalǵan úshten birin samalǵa ushırıp jiber. Men de qılıshımdı jalańashlap, qala turǵınlarınıń izinen quwaman. 3 Biraq shashıńnıń bir neshe talın alıp, shapanıńnıń shalǵayına tańıp qoy. 4 Olardan jáne bir neshewin alıp, otqa taslap, órtep jiber. Sol jerden shıqqan ot pútkil Izrail xalqına taraydı.

5 Quday Iye bılay deydi: Bul Erusalim, onı Men milletlerdiń qaq ortasına, al basqa milletlerdi onıń aylanasına jaylastırdım. 6 Biraq Erusalim aylanasındaǵı barlıq milletlerden hám ellerden beter jamanlıq qılıp, Meniń nızamlarıma hám qaǵıydalarıma qarsı bas kóterdi. Meniń nızamlarımnan waz keshti hám qaǵıydalarıma boysınbadı.

7 Sonlıqtan Quday Iye bılay deydi: Sizler aylanańızdaǵı milletlerden de beter bas kótergish bolıp kettińler. Meniń qaǵıydalarıma ámel qılmadıńlar, nızamlarıma boysınbadıńlar, hátte, átirapıńızdaǵı milletlerdiń dástúrleri boyınsha da háreket etpedińler.

8 Sonlıqtan Quday Iye bılay deydi: Bilip qoy, Men Ózim saǵan qarsı shıǵaman. Seni milletlerdiń kóz aldında jazalayman. 9 Qılǵan jerkenishli isleriń sebepli, Men saǵan burın islemegen hám keleshekte de islemeytuǵın bir isti qılaman. 10 Sonda ashlıqtan sendegi ata-analar balalarınıń, balalar ata-analarınıń etin jeydi. Men sizlerdi jazalayman hám tiri qalǵanlardı samalǵa suwıraman.

11 Óz tiriligim haqı ant ishemen, – deydi Quday Iye, – barlıq jerkenishli músinleriń hám buzıq dástúrleriń menen sen Muxaddes mákanımdı haramladıń. Men seni saqal qırıqqanday etip qırqıp taslayman, ayamayman, rehim de qılmayman. 12 Xalqıńnıń úshten biri illetten yamasa ashlıqtan qala ishinde óledi, úshten biri qala átirapında qılıshtan qırıladı, al qalǵan úshten birin samalǵa suwıraman hám qılıshımdı jalańashlap, olardıń izinen quwaman.

13 Olarǵa ǵázebimdi tolıq shashıp bolǵannan keyin, qáhárim basıladı hám Men tınıshlanaman. Qáhárimdi olarǵa tolıq shashıp bolǵannan keyin, olar Meniń, Jaratqan Iyeniń qızǵanısh penen aytqanın bilip aladı.

14 Aynalańdaǵı xalıqlardıń hám sen arqalı ótetuǵın hár bir adamnıń kóz aldında seni qıyratıp taslap, nasaqqa qaldıraman. 15 Men sizlerdi ashıw hám ǵázep penen húkim qılıp, awır jaza menen jazalaǵanımda, sen aynalańdaǵı xalıqlarǵa masqara bolıp, kúlkige qalasań, olar bunnan qorqıwǵa túsip, sabaq aladı. Bunı Men, Jaratqan Iye aytıp turman. 16 Sizlerdi joq qılıw ushın, ústińizge ashlıqtıń nabıt qılıwshı oqların ataman. Ashlıǵıńdı kúsheytip, bir tislem nanǵa zar qılaman. 17 Men saǵan ashlıqtı hám jabayı ańlardı jiberemen, olar seni balalarıńnan ayıradı. Illet hám qan tógispe eldi jaylaydı, ústińe qılısh dóndiremen. Bunı Men, Jaratqan Iye aytıp turman.