‏ Ezekiel 6

Jaratqan Iyeniń butparazlıqqa qarsı húkimi

1Maǵan Jaratqan Iyeden sóz tústi:

2– Insan ulı! Izrail tawlarına júzińdi qaratıp, olarǵa qarsı payǵambarshılıq etip, 3bılay dep ayt: «Háy, Izrail tawları, Quday Iyeniń sózin tıńlań! Quday Iye tawlarǵa, tóbelerge, say-salalarǵa hám oypatlıqlarǵa bılay deydi: Qarańlar, Men sizlerge qarsı qılısh jiberemen, sıyınıw orınlarıńızdı qıyrataman. 4Qurbanlıq orınlarıńız wayran qılınadı, tútetki tútetiletuǵın orınlarıńız qıyratıladı, óltirilgen adamlarıńızdı butlarıńızdıń aldına ılaqtıraman. 5Men Izrail xalqınıń óli denelerin olardıń butlarınıń aldına taslayman hám súyeklerińizdi qurbanlıq orınlarıńızdıń dógeregine shashaman. 6Sizler qay jerde jasasańız da, qalalarıńız wayran boladı, sıyınıw orınlarıńız qıyraydı. Sonda qurbanlıq orınlarıńız wayran bolıp, qańırap qaladı, butlarıńız bóleklenip, jer menen jeksen boladı, tútetki tútetiletuǵın orınlarıńız sındırıp taslanıp, qol miynetińiz túp-tamırı menen joq qılınadı. 7Arańızda óltirilgenler qulap jatadı, sonda Meniń Jaratqan Iye ekenimdi bilip alasız.

8Biraq Men bazılardı aman qaldıraman. Sizler el boylap tarqatıp jiberilgenińizde, ayırımlarıńız basqa milletler arasında qılıshtan qutılıp qalasız. 9Aman qalǵanlar súrgin etip alıp ketilgen jerindegi milletler arasında Meni esleydi. Mennen júz burǵan opasız júrekleri hám butlardıń izinen qaraǵan buzıq kózleri sebepli qanshelli hásiret shektim. Olar islegen jamanlıqları hám jerkenishli isleri ushın ózlerinen ózleri jerkenedi. 10Sonda olar Meniń Jaratqan Iye ekenimdi bilip aladı. Men olarǵa bul apatshılıqtı jiberemen dep, bostan-bosqa aybat etkenim joq.

11Quday Iye bılay demekte: Ashıw menen alaqanıńdı alaqanıńa urıp, jerdi tewip bılay dep ayt: Islegen barlıq jawız hám jerkenishli isleri ushın izraillılardıń sorı qurıydı! Olar qılıshtan, ashlıqtan hám illetten qırıladı. 12Uzaqtaǵılar illetten óledi, jaqındaǵılar qılıshtan qırıladı. Qutılıp, aman qalǵanlar ashlıqtan nabıt boladı. Usılayınsha, Men olarǵa ǵázebimdi tolıq shashaman. 13Qurbanlıq orınlarınıń átirapındaǵı butlardıń arasında, hár bir biyik tóbeshikte hám barlıq tawdıń tóbelerinde, hár bir qoyıw japıraqlı terektiń hám hár bir sayalı terebinf astında, yaǵnıy butlarına xosh iyisli tútetki tútetken jerlerde qırılǵanlar sozılıp jatqanda, olar Meniń Jaratqan Iye ekenimdi bilip aladı. 14Men olarǵa qolımdı kóterip, shólden Diblaǵa shekemgi, olar jasaǵan barlıq jerlerdi qańıratıp, bos qaldıraman. Sonda olar Meniń Jaratqan Iye ekenimdi bilip aladı».
Copyright information for KaaIBT22L