‏ Ezekiel 7

Izrail xalqınıń sońǵı kúnleri

1Maǵan Jaratqan Iyeden sóz tústi:

2– Insan ulı! Quday Iye Izrail jerine bılay deydi: «Aqırı jetti! Jerdiń tórt tárepiniń aqırı jetti! 3Mine, seniń aqırıń jetti! Men seniń ústińe ǵázebimdi shashaman. Saǵan tutqan jollarıńa ılayıqlı húkim shıǵarıp, barlıq jerkenishli isleriń ushın jazalayman. 4Seni ayamayman, rehim de qılmayman. Tutqan jollarıń ushın seni sózsiz jazalayman, jerkenishli isleriń ushın jazańdı tartasań. Sonda sizler Meniń Jaratqan Iye ekenimdi bilip alasız.

5Quday Iye bılay deydi: Apat ústine apat! Qarańlar, apat kelmekte! 6Aqırıń jetti, awa, kúniń payanına jetti! Ol saǵan qarsı kóterildi. Qara, ol kiyatır! 7Saǵan qırǵın keldi, saǵan keldi, háy, eldiń turǵını! Waqıt jetti, kún jaqın. Tawlarda quwanısh emes, ala-sapıran húkim súredi. 8Tez arada Men saǵan qáhárimdi tógemen hám ǵázebimdi tolıq shashaman. Saǵan tutqan jollarıńa ılayıqlı húkim shıǵarıp, barlıq jerkenishli isleriń ushın jazalayman. 9Seni ayamayman, rehim de qılmayman. Tutqan jollarıń ushın seni sózsiz jazalayman, jerkenishli isleriń ushın jazańdı tartasań. Sonda sizlerdi jazalaǵan Men, Jaratqan Iye ekenimdi bilip alasız.

10Mine ol, sol kún! Mine, ol keldi: qırǵın kógerip shıqtı, zorlıq gúlledi, menmenlik búrtik jardı. 11Zorlıq nızamsızlıqtı jazalaytuǵın tayaq bolıp ósip shıqtı. Xalıqtan hesh kim qalmadı. Olardıń molshılıǵı da, baylıǵı da, saltanatı da qalmadı. 12Waqıt keldi, sol kún jaqınlastı. Satıp alǵan quwanbasın, satqan ǵam shekpesin. Sebebi Meniń ǵázebim pútkil alaman ústine jawadı. 13Jerin satqan adam ómiriniń aqırına deyin satqan jerin qaytarıp ala almaydı. Óytkeni ayan pútkil alamanǵa tiyisli, ol ózgermeydi. Ózleriniń gúnası sebepli olardıń birewi de ómirin saqlap qala almaydı. 14Kárnaylar shalındı, hámmesi tayar. Biraq hesh kim sawashqa túspeydi, óytkeni Meniń ǵázebim pútkil alaman ústine jawadı. 15Sırtta qılısh, ishte illet hám ashlıq. Daladaǵılar qılıshtan, qala ishindegiler ashlıqtan hám illetten óledi. 16Aman qalǵanlar oypatlıqtaǵı kepterlerdey tawǵa qashadı. Olardıń hár biri óz gúnası ushın zar eńireydi. 17Qollarında hal qalmaydı, dizeleriniń mádarı qurıydı. 18Olar aza kiyimin kiyedi, olardı qorqınısh biyleydi. Hámmesiniń júzi uyattan qızarıp, barlıǵı shashların tıqırlap aldıradı. 19Olar gúmisin kóshege ılaqtıradı, altını haram sanaladı. Jaratqan Iyeniń ǵázep kúninde gúmis hám altını olardı qutqara almaydı, ashlıqtan da saqlamaydı, qarnın da toydırmaydı. Altın hám gúmis olardı gúnaǵa baslaǵan edi. 20Ózleri maqtanıp júrgen ájayıp taǵınshaqlarınan olar jerkenishli butlarınıń músinlerin hám haramı nárselerin isletti. Sonlıqtan Men bul baylıqların olar ushın haram qıldım. 21Men olardı jat jerlilerge olja qılaman, jer betindegi jawızlarǵa talataman. Jawızlar olardı haramlaydı. 22Men olarǵa názer salmayman, olar Meniń qádirli ornımdı haramlaydı. Basqınshılar sol jerge kirip, onı haramlaydı.

23Shınjırlar tayarlań! El qanlı jınayatqa, qala zorlıqqa tolıp ketken. 24Men milletlerdiń eń jawızın jiberemen. Olar xalqımnıń úylerin basıp aladı. Kúshlilerdiń menmenligine shek qoyaman, olardıń muxaddes orınları haram qılınadı. 25Qorqınısh kelgende, olar tınıshlıq izley baslaydı, biraq tınıshlıq bolmaydı. 26Apat izinen apat keledi, mısh-mısh izinen mısh-mısh tarqaladı. Olar payǵambarlardan biykarǵa ayanlar soraydı, ruwxaniyler tálim beriwden, aqsaqallar keńes beriwden juda boladı. 27Patsha ǵamǵa batadı, húkimdarın qorqınısh biyleydi, el xalqınıń qolı iske barmaydı. Olardı tutqan jollarına say jazalayman, óz húkimlerine ılayıqlı húkim shıǵaraman. Sonda olar Meniń Jaratqan Iye ekenimdi bilip aladı».
Copyright information for KaaIBT22L