Eze 8 | KaaIBT22L | STEP | Súrginde bolǵan waqtımızdıń altınshı jılınıń altınshı ayınıń besinshi kúni men úyimde otırǵan edim, Yahuda aqsaqalları da meniń janımda edi. Sonda Quday Iye qolın ústime qoydı.

‏ Ezekiel 8

Ibadatxanadaǵı butparazlıq

1 Súrginde bolǵan waqtımızdıń altınshı jılınıń altınshı ayınıń besinshi kúni men úyimde otırǵan edim, Yahuda aqsaqalları da meniń janımda edi. Sonda Quday Iye qolın ústime qoydı. 2 Qaraǵanımda, jalınǵa uqsaǵan birewdi kórdim. Onıń belinen tómeni jalınǵa uqsaydı, belinen joqarısı bolsa, mıstay jarqırap turǵan edi. 3 Ol qolǵa uqsaǵan bir nárseni sozıp, meniń shashımnan uslap aldı. Ruwx meni jer hám kók aralıǵına kóterdi hám Qudaydıń ayanında meni Erusalimge, Ibadatxananıń ishki háwlisiniń arqa dárwazasınıń kirer awzına alıp bardı. Ol jerde Qudaydıń qızǵanıshın oyatqan buttıń músini turǵan edi. 4 Sol jerde maǵan Izraildıń Qudayınıń saltanatı kórindi. Men bunday ayandı oypatlıqta da kórgen edim.

5 Quday maǵan:

– Insan ulı! Arqa tárepke qara, – dedi. Qarasam, qurbanlıq orın janındaǵı dárwazanıń arqa tárepinde sol qızǵanısh oyatatuǵın buttıń músini turǵan eken.

6 Quday maǵan jáne bılay dedi:

– Insan ulı, sen olardıń ne islep atırǵanın kórip tursań ba? Izrail xalqı bul jerde júdá jerkenishli islerdi islewi arqalı Meni Muxaddes mákanımnan uzaqlastırmaqta. Biraq sen bunnan da beter jerkenishli nárselerdi kóreseń.

7 Ol meni háwliniń kirer awzına alıp keldi. Qarasam, diywalda bir tesik bar eken. 8 Ol maǵan:

– Insan ulı! Diywaldı tes, – dedi. Men diywaldı testim hám ol jerde bir qapını kórdim. 9 Ol maǵan:

– Kirip, olar bul jerde islep atırǵan júdá jerkenishli islerdi kór, – dedi. 10 Men ishke kirip qaraǵanımda, diywaldı aylandırıp hár qıylı jer bawırlawshılardıń, jerkenishli haywanlardıń hám izraillılardıń barlıq butlarınıń súwretleriniń salınǵanın kórdim. 11 Olardıń aldında izraillılardıń jetpis aqsaqalı hám aqsaqallardıń arasında Shafan ulı Yazaniya turǵan edi. Olardıń hár biriniń qolında tútetki tútetiletuǵın ıdıs bolıp, ıdıstan shıqqan xosh iyis bultlar kibi joqarıǵa kóterilip turdı.

12 Keyin Quday maǵan bılay dedi:

– Insan ulı! Izrail aqsaqallarınıń hár biriniń qarańǵılıqta, ózleriniń butlarınıń bólmelerinde neler islep atırǵanın kórdiń be? Olar: «Jaratqan Iye bizlerdi kórmeydi, Jaratqan Iye eldi tárk etken», – deydi.

13 Ol maǵan taǵı da:

– Sen olardıń bunnan da beter jerkenishli islerdi islegenin kóreseń, – dedi.

14 Sońınan Ol meni Jaratqan Iyeniń Úyiniń arqa dárwazasınıń kirer awzına alıp keldi. Men ol jerde Tammuz degen quday ushın aza tutıp jılap ^{▼▼ Aza tutıp jılaw – hár jılı islenetuǵın diniy dástúr.} otırǵan hayallardı kórdim. 15 Ol maǵan:

– Bunı kórdiń be, insan ulı? Sen bunnan da beter jerkenishli islerdi kóreseń, – dedi.

16 Ol meni Jaratqan Iyeniń Úyiniń ishki háwlisine alıp keldi. Ol jerde, Ibadatxananıń kirer awzında, aywan hám qurbanlıq orın aralıǵında jigirma beske jaqın erkek bar edi. Olar Jaratqan Iyeniń Ibadatxanasına arqasın, al shıǵısqa júzin qaratıp, shıǵıstaǵı quyashqa tabınıp atırǵan edi. 17 Ol maǵan bılay dedi:

– Kórdiń be, insan ulı? Yahuda xalqınıń bul jerde islep atırǵan jerkenishli isleri jeterli emes pe edi? Buǵan qosa, olar jerdi zorabanlıqqa toltırmaqta hám Meniń ǵázebimdi qattıraq qozǵatpaqta. Olardıń Maǵan qalay til tiygizip atırǵanına qara! 18 Sonıń ushın Men ǵázep atına minemen. Men olardı ayamayman, rehim de etpeymen. Bar dawısı menen baqırıp jalbarınsa da, olardı tıńlamayman.