Eze 9 | KaaIBT22L | STEP | Keyin men Jaratqan Iyeniń bálent dawıs penen: – Qalanı jazalaw ushın tayınlanǵanlar, hár birińiz qurallarıńızdı alıp berman keliń!

‏ Ezekiel 9

Erusalimniń jazalanıwı

1 Keyin men Jaratqan Iyeniń bálent dawıs penen:

– Qalanı jazalaw ushın tayınlanǵanlar, hár birińiz qurallarıńızdı alıp berman keliń! – dep baqırǵanın esittim. 2 Men arqaǵa qarap turǵan joqarǵı dárwaza tárepten kiyatırǵan altı erkekti kórdim. Olardıń hár biriniń qolında qırǵın qılıwshı qural bar edi. Olardıń janında zıǵırdan kiyim kiygen, beline jazıw quralların asıp alǵan birew bar edi. Olar ishke kirip, qola qurbanlıq orınnıń qasında turdı.

3 Kerublar ^{▼▼ Kerublar – ruwxıy barlıqlar. 1:5-25 qarań.} ústindegi Izraildıń Qudayınıń saltanatı óz ornınan kóterilip, Ibadatxananıń bosaǵasına bardı. Jaratqan Iye zıǵır kiyim kiyip, beline jazıw quralların asıp alǵan adamdı shaqırıp, 4 oǵan:

– Erusalim qalasın aylanıp shıq hám qalada islenip atırǵan jerkenishli islerden nala shegip, zarlap atırǵanlardıń mańlayına belgi qoy, – dedi. 5 Basqa altı adamǵa Onıń bılay degenin esittim:

– Onıń izinen qalanı aylanıp, adamlardı qırıp taslań, ayamań, rehim etpeń. 6 Ǵarrılardı, jigit hám qızlardı, balalardı hám hayallardı qırıp taslań. Biraq mańlayında belgisi barlarǵa tiymeń. Meniń Muxaddes mákanımnan baslań.

Olar Ibadatxana aldında turǵan aqsaqallardan basladı. 7 Quday altı adamǵa:

– Háwlilerdi óli denelerge toltırıp, Ibadatxananı haramlań. Qáne, baslańlar! – dedi. Olar barıp, qaladaǵılardı qıra basladı. 8 Olar adamlardı óltirgende, jalǵız ózim qalǵan men et betimnen jerge jıǵılıp, páriyad etip:

– Ah, Quday Iye! Ǵázebińdi Erusalimge shashıp, Izrailda tiri qalǵanlardıń hámmesin qırıp jibermekshimiseń? – dedim. 9 Ol maǵan bılay dep juwap berdi:

– Izrail hám Yahudanıń gúnası júdá awır, el qanǵa, qala ádalatsızlıqqa tolǵan. Adamlar: «Jaratqan Iye eldi tárk etti, Jaratqan Iye kórmeydi», – deydi. 10 Men de olardı ayamayman, rehim de etpeymen. Tutqan jollarına jarasa jazasın beremen.

11 Sol arada zıǵır kiyim kiyip, beline jazıw quralların asqan adam qaytıp kelip:

– Men buyırǵanıńday qıldım, – dep xabarladı.