Ezr 1 | KaaIBT22L | STEP | Persiya patshası Kirdiń patshalıǵınıń birinshi jılında Jaratqan Iye Óziniń Eremiya payǵambar arqalı aytqan sózin ámelge asırıw ushın, Persiya patshası Kirdiń júregine túrtki saldı. Sonda patsha Kir mınaday párman shıǵarıp, onı pútkil patshalıǵı boylap járiyalawdı hám jazba túrde taratıwdı buyırdı:

‏ Ezra 1

Kirdiń súrginde bolǵanlardıń qaytıwına ruxsat beriwi

1 Persiya patshası Kirdiń patshalıǵınıń birinshi jılında Jaratqan Iye Óziniń Eremiya payǵambar arqalı aytqan sózin ^{▼▼ Erm 25:11; 29:10.} ámelge asırıw ushın, Persiya patshası Kirdiń júregine túrtki saldı. Sonda patsha Kir mınaday párman shıǵarıp, onı pútkil patshalıǵı boylap járiyalawdı hám jazba túrde taratıwdı buyırdı:

2 «Persiya patshası Kir bılay deydi: „Aspannıń Qudayı Jaratqan Iye jer júzindegi barlıq patshalıqlardı maǵan berdi hám Yahudanıń Erusalim qalasına Ózi ushın bir Úy qurıwdı maǵan tapsırdı. 3 Arańızdaǵı Onıń xalqınan bolǵan hár bir adamǵa Qudayı yar bolsın! Endi olar Yahudanıń Erusalim qalasına barıp, Erusalimdegi Qudaydıń, yaǵnıy Izraildıń Qudayı Jaratqan Iyeniń Úyin qayta qursın. 4 Házir tiri qalǵan yahudiyler jasap atırǵan jerlerdiń turǵınları olardı gúmis, altın, buyım hám mallar menen támiyinlew menen birge, Erusalimdegi Qudaydıń Úyi ushın ıqtıyarlı sadaqalar bersin“».

5 Solay etip, Yahuda hám Benyamin urıwlarınıń áwlad basshıları, ruwxaniyler, lebiyliler hám Quday tárepinen ruwxlandırılǵan hár bir adam Jaratqan Iyeniń Erusalimdegi Úyin qayta qurıw ushın ketiwge tayarlandı. 6 Hámme qońsıları ıqtıyarlı sadaqalarǵa qosa, olarǵa gúmis buyımlar, altın, mal-múlikler hám qımbatbaha nárseler berip, járdem qolların sozdı. 7 Patsha Kirdiń ózi Jaratqan Iyeniń Úyine tiyisli bolǵan zatlardı, yaǵnıy Nabuxodonosordıń Erusalimnen alıp kelip, óz qudayınıń úyine qoyǵan zatların ol jerden shıǵarttı. 8 Persiya patshası Kir olardı qaznashı Mitredatqa ákeldirip, Yahuda hákimi Sheshbassarǵa sanap tapsırttı. 9 Olardıń esabı mınaday edi: Altın ıdıs – 30 dana,
Gúmis ıdıs – 1000 dana,
Pıshaq – 29 dana,
10 Altın tostaǵan – 30 dana,
Jup gúmis tostaǵan – 410 dana,
Basqa buyımlar – 1000 dana.

11 Altın hám gúmis buyımlardıń barlıǵı 5400 dana edi. Súrgin etilgenler Babiloniyadan Erusalimge qaytarılǵanda, Sheshbassar bul ıdıslardı ózi menen birge alıp qayttı.