‏ Ezra 10

Aralas nekege shek qoyıw jobası

1Ezra Qudaydıń Úyiniń aldında jer bawırlap jılawı menen gúnalardı moyınlap, duwa etip atırǵanda, izraillılardıń úlken bir jıyını: erkekler, hayallar hám balalar onıń janına jıynaldı. Olar da zar eńirep, jılap turdı. 2Sonda Elam urpaǵınan Exiel ulı Shekaniya Ezraǵa bılay dedi:

– Bizler basqa millet qızlarına úylenip, Qudayımızdıń aldında opasızlıq ettik. Degen menen, izraillılar ushın ele úmit bar. 3Endi Qudayımız benen kelisim dúzeyik. Mırzam, siziń hám Qudayımızdıń buyrıqların qádirleytuǵınlardıń másláháti boyınsha, basqa milletten alınǵan barlıq hayallar menen ajırasıp, olardı balaları menen birge bosatıp jibereyik. Bunı Nızamǵa say túrde isleyik. 4Qáne, ornıńızdan turıń! Sebebi bul is sizge júklengen, al bizler sizdi qollap quwatlaymız. Ruwxıńızdı kóterip, iske kirisiń!

5Sonda Ezra ornınan turdı. Ol ruwxaniylerdiń basshılarına, lebiylilerge hám pútkil izraillılarǵa usı aytılǵanlardı orınlaymız dep, ant ishiwdi buyırdı. Olar ant ishti. 6Keyin Ezra Qudaydıń Úyiniń aldınan turıp, Elyashib ulı Ehoxanannıń bólmesine bardı. Sol jerde bolǵanda, ol súrginnen qaytqanlardıń opasızlıǵı ushın aza tutıwın dawam etip, nan da jemedi, suw da ishpedi.

7«Súrginnen qaytqanlardıń hámmesi Erusalimge jıynalsın», – dep Yahuda hám Erusalim boylap jar salındı. 8Jáne de: «Eger kim de kim úsh kún ishinde kelmese, basshılardıń hám aqsaqallardıń qararı boyınsha onıń barlıq mal-múlki tartıp alınıp, ózi súrginnen kelgenler jámiyetinen shıǵarıp jiberiledi», – dep xabarlandı. 9Sonda pútkil Yahudanıń hám Benyamin urıwınıń adamları úsh kún ishinde Erusalimge jıynaldı. Bul toǵızınshı aydıń jigirmalanshı kúni edi. Pútkil xalıq Qudaydıń Úyi aldındaǵı maydanda otırdı. Olar hám usı isten, hám quyıp jawǵan jawınnan dirilder edi. 10Ruwxaniy Ezra ornınan turıp, olarǵa bılay dedi:

– Sizler opasızlıq ettińler, basqa millet qızlarına úylenip, Izraildıń ayıbına ayıp jamadıńlar. 11Endi ata-babalarıńızdıń Qudayı Jaratqan Iye aldında gúnalarıńızdı moyınlap, Onıń erkin orınlańlar. Átirapıńızdaǵı xalıqlardan hám basqa milletten alınǵan hayallardan ayırılıńlar.

12Sonda pútkil jámiyet juwap berip, bálent dawıs penen bılay dedi:

– Awa, siz haqsız. Siz ne aytsańız, sonı isleymiz. 13Degen menen, xalıq kóp, jawın da quyıp tur, ashıq jerde turıwǵa dimarımız qalmadı. Bul bir-eki kúnlik is emes, sebebi bizlerdiń kópshiligimiz usı iste gúna islegenbiz. 14Basshılarımız pútkil jámiyet atınan wákillik qılsın. Al qalalarımızdaǵı basqa millet qızlarına úylengen adamlardıń hámmesi belgilengen waqıtta óz qalalarınıń aqsaqalları hám qazıları menen birge usı jerge kelsin. Qudayımızdıń usı is sebepli lawlaǵan ǵázebi qaytqanǵa shekem usılay islensin.

15Bul usınısqa tek Asahel ulı Ionatan hám Tiqwa ulı Yaxzeya qarsı boldı, al Meshullam hám lebiyli Shabbetay bolsa, bulardı qollap quwatladı. 16Súrginnen qaytqanlar aytılǵanday isledi. Ruwxaniy Ezra hár bir urpaqtıń urpaq basshısın atpa-at tańlap aldı. Onınshı aydıń birinshi kúni olar bul isti izertlewge otırdı. 17Birinshi aydıń birinshi kúni olar basqa millet qızlarına úylengenlerdiń hámmesiniń isin qarap boldı.

Basqa millet qızlarına úylengenler dizimi

18Ruwxaniyler urpaǵı arasında basqa millet qızlarına úylengenler:

Iosadaq ulı Eshuanıń hám onıń tuwısqanlarınıń urpaqlarınan: Maaseya, Eliezer, Yarib hám Gedaliya. 19Olar hayallarınan ajırasıwǵa sóz berdi hám hár biri súriwden bir qoshqardı óz ayıbı ushın ayıp qurbanlıǵı retinde qurbanlıqqa berdi. 20Immer urpaǵınan: Xananiy hám Zebadiya;
21Xarim urpaǵınan: Maaseya, Iliyas, Shemaya, Exiel, Uzziya;
22Pashxur urpaǵınan: Elyoenay, Maaseya, Ismayıl, Netanel, Iozabad, Elasa;
23Lebiylilerden: Iozabad, Shimey, Kelaya, yaǵnıy Kelita, Petaxiya, Yahuda, Eliezer;
24Qosıqshılardan: Elyashib;
Dárwaza qarawıllarınan: Shallum, Telem, Uriy.

25Basqa izraillılardan: Parosh urpaǵınan: Ramiya, Izziya, Malkiya, Miyamin, Elazar, Malkiya, Benaya;
26Elam urpaǵınan: Mattaniya, Zexariya, Exiel, Abdiy, Eremot, Iliyas;
27Zattu urpaǵınan: Elyoenay, Elyashib, Mattaniya, Eremot, Zabad, Aziza;
28Bebay urpaǵınan: Ehoxanan, Xananiya, Zabbay, Atlay;
29Baniy urpaǵınan: Meshullam, Mallux, Adaya, Yashub, Sheal, Ramot;
30Paxat-Moab urpaǵınan: Adna, Kelal, Benaya, Maaseya, Mattaniya, Besalel, Binnuy, Menashshe;
31Xarim urpaǵınan: Eliezer, Ishshiya, Malkiya, Shemaya, Shimon, 32Benyamin, Mallux, Shemariya;
33Xashum urpaǵınan: Mattenay, Mattata, Zabad, Elifelet, Eremay, Menashshe, Shimey;
34Baniy urpaǵınan: Maaday, Amram, Uwel, 35Benaya, Bedeya, Keluhu, 36Waneya, Meremot, Elyashib, 37Mattaniya, Mattenay, Yasay, 38Baniy, Binnuy, Shimey, 39Shelemiya, Natan, Adaya, 40Maxnadbay, Shashay, Sharay, 41Azarel, Shelemiya, Shemariya, 42Shallum, Amariya, Yusup;
43Nebo urpaǵınan: Eiel, Mattitiya, Zabad, Zebina, Yadday, Ioel, Benaya.

44Bul adamlardıń hámmesi basqa millet qızlarına úylengen bolıp, olardıń ayırımlarınıń balaları da bar edi.