Ezr 3 | KaaIBT22L | STEP | Izraillılar óz qalalarına jaylasıp bolǵannan soń, jetinshi ayda olardıń hámmesi bir adamday Erusalimge jıynaldı.

‏ Ezra 3

Qurbanlıq orınnıń qayta qurılıwı

1 Izraillılar óz qalalarına jaylasıp bolǵannan soń, jetinshi ayda olardıń hámmesi bir adamday Erusalimge jıynaldı. 2 Qudaydıń adamı bolǵan Muwsanıń Nızam kitabındaǵı jazıwlarǵa muwapıq, qurbanlıq orın ústinde jandırılatuǵın qurbanlıqlar usınıw ushın, Iosadaq ulı Eshua hám onıń ruwxaniy aǵayinleri, Shealtiel ulı Zerubbabel hám onıń tuwısqanları Izraildıń Qudayına arnap qurbanlıq orın qurıwǵa kiristi. 3 Olar átiraptaǵı xalıqlardan qorqsa da, qurbanlıq orındı onıń burınǵı tiykarı ústine qurıp, onda azanda hám keshte Jaratqan Iyege arnap jandırılatuǵın qurbanlıqlar berdi. 4 Sońınan Nızamda jazılǵanı boyınsha, Qos bayramın nıshanladı hám qaǵıyda boyınsha hár kún ushın belgilengen muǵdarda jandırılatuǵın qurbanlıqlar berdi. 5 Bunnan soń, kúndelikli jandırılatuǵın qurbanlıqlardı, Jańa ay bayramında hám Jaratqan Iye belgilegen barlıq muxaddes bayramlarda beriletuǵın qurbanlıqlardı, Jaratqan Iyege arnap ıqtıyarlı sadaqalardı usındı. 6 Jetinshi aydıń birinshi kúninen baslap, olar Jaratqan Iyege arnap jandırılatuǵın qurbanlıqlar beriwdi baslaǵan edi. Biraq ele Jaratqan Iyeniń Ibadatxanasınıń tiykarı salınbaǵan edi.

Ibadatxananıń tiykarınıń qayta salınıwı

7 Izraillılar tas kesiwshilerge hám ustalarǵa gúmis teńge, Lebanonnan Yafoǵa teńiz jolı arqalı kedr aǵashların alıp keliwi ushın sidonlılar menen tirlilerge azıq-awqat, ishimlik hám záytún mayın berdi. Bularǵa Persiya patshası Kir ruxsat bergen edi. 8 Erusalimge, Qudaydıń Úyi bolǵan jerge kelgennen soń, ekinshi jıldıń ekinshi ayında Shealtiel ulı Zerubbabel, Iosadaq ulı Eshua, basqa ruwxaniyler, lebiyliler hám súrginnen Erusalimge qaytqanlardıń hámmesi isti basladı. Jigirma hám onnan joqarı jasta bolǵan lebiyliler Jaratqan Iyeniń Úyindegi islerdi qadaǵalaw ushın qoyıldı. 9 Qudaydıń Úyindegi jumısshılardı Eshua, onıń ulları hám aǵayinleri, Qadmiel hám onıń ulları, Hodawiyanıń pútkil urpaqları qadaǵalap turdı. Olar bul xızmetti atqarıwda Xenadad urpaǵınan bolǵan lebiylilerden járdem aldı. 10 Qurılısshılar Jaratqan Iyeniń Ibadatxanasınıń tiykarın salıp bolǵanda, ruwxaniyler arnawlı kiyimlerin kiyip, qollarına kárnayların aldı. Asaf urpaqlarınan bolǵan lebiyliler de kimbalların alıp, Izrail patshası Dawıt belgilegen qaǵıydaǵa muwapıq, Jaratqan Iyege alǵıs-maqtaw aytıw ushın óz orınların iyeledi. 11 Olar gezekpe-gezek: «Jaratqan Iye iygilikli,
Onıń Izrailǵa bolǵan sadıqlıǵı máńgi dawam etedi», –

dep Jaratqan Iyege alǵıs-maqtaw hám táriyiplew qosıqların ayttı.

Jaratqan Iyeniń Úyiniń tiykarı salınǵanı ushın, pútkil xalıq qattı dawıs penen Jaratqan Iyege alǵıs-maqtaw ayta basladı. 12 Kópshilik quwanıshtan qıshqırǵan bolsa da, Jaratqan Iyeniń burınǵı Úyin kórgen kóplegen jası úlken ruwxaniyler, lebiyliler hám urpaq basshıları bul Úydiń tiykarınıń salınǵanın kórgende ókirip jıladı. 13 Xalıq qattı shuwlasıp baqırısqanlıqtan, quwanısh seslerinen jılaǵanlardıń dawısların ajıratıw múmkin emes edi. Shawqım uzaqtan esitilip turdı.