Ezr 5 | KaaIBT22L | STEP | Sol arada payǵambar Xaggay menen Iddo ulı payǵambar Zexariya Yahuda hám Erusalimde jasaytuǵın yahudiylerge olardıń ústinen biylik etken Izraildıń Qudayınıń atı menen payǵambarshılıq etti.

‏ Ezra 5

1 Sol arada payǵambar Xaggay menen Iddo ulı payǵambar Zexariya Yahuda hám Erusalimde jasaytuǵın yahudiylerge olardıń ústinen biylik etken Izraildıń Qudayınıń atı menen payǵambarshılıq etti. 2 Sonda Shealtiel ulı Zerubbabel hám Iosadaq ulı Eshua Qudaydıń Erusalimdegi Úyin qayta qurıwdı basladı. Qudaydıń payǵambarları da olar menen birge bolıp, olarǵa járdem berdi.

3 Sol waqıtta Evfrattıń arǵı tárepindegi úlkeniń hákimi Tattenay, Shetar-Boznay hám olardıń joldasları yahudiylerge kelip: «Mına Úydi qurıp, bul qurılıstı qayta tiklewge sizlerge kim ruxsat berdi?» – dep soradı. 4 Olar bul qurılıstı alıp barıp atırǵan adamlardıń atların da soradı. 5 Biraq Quday yahudiy aqsaqallarına názerin salǵan edi. Persiya hámeldarları bul is tuwralı Dariyge bir xat jibergen bolıp, sol xatqa juwap kelmegenshe, yahudiylerdi toqtatpadı.

6 Dáryanıń arǵı tárepindegi úlkeniń hákimi Tattenay, Shetar-Boznay, olardıń joldasları, yaǵnıy sol úlkeniń hámeldarları patsha Dariyge xat jazıp, nusqasın jiberdi. 7 Olar patsha Dariyge jollaǵan xatta bılay dep jazılǵan edi:

«Patsha Dariyge tınıshlıq tileymiz! 8 Patshaǵa mınalardı bildirmekshimiz: bizler Yahuda wálayatına, ullı Qudaydıń Úyine bardıq. Ol úlken taslardan qurılıp, diywallarına aǵashlar qosıp qalanıp atır. Bul jumıs jedel pát alǵan bolıp, olardıń qollarında tabıslı ketip atır. 9 Bizler sol jerdegi aqsaqallar menen sóylesip, olardan: „Mına Úydi qurıp, bul qurılıstı qayta tiklewge sizlerge kim ruxsat berdi?“– dep soradıq. 10 Bunıń ústine, sizge maǵlıwmat retinde jazıp jiberiw ushın olardıń basshılarınıń atların da soradıq.

11 Olar bizlerge bılay dep juwap berdi: „Bizler aspan hám jerdiń Qudayınıń qullarımız. Bizler kóp jıllar burın qurılǵan Qudaydıń Úyin qayta tiklep atırmız. Bul Úy Izraildıń bir ullı patshası tárepinen qurıp pitkerilgen edi. 12 Biraq ata-babalarımız aspannıń Qudayın ǵázeplendirgeni ushın, Quday olardı Babiloniya patshası kaldeyli Nabuxodonosorǵa táslim etti. Ol bul Úydi wayran etip, xalıqtı Babiloniyaǵa súrgin qıldı. 13 Degen menen, Babiloniya patshası Kir óz húkimdarlıǵınıń birinshi jılında usı Qudaydıń Úyi qayta tiklensin dep, párman shıǵardı. 14 Nabuxodonosor Qudaydıń Erusalimdegi Úyinen altın hám gúmis ıdıslardı alıp ketip, Babilondaǵı ibadatxanaǵa aparıp qoyǵan edi. Patsha Kir Babilondaǵı ibadatxanadan sol ıdıslardı aldırıp, ózi hákim etip tayınlaǵan Sheshbassar degen adamǵa qaytarıp berdi. 15 Patsha Kir Sheshbassarǵa: „Bul ıdıslardı aparıp, Erusalimdegi Ibadatxanaǵa qoy. Al Qudaydıń Úyi óz ornına qayta qurılsın“, – dedi. 16 Solay etip, Sheshbassar kelip, Qudaydıń Erusalimdegi Úyiniń tiykarın qoydı. Sonnan beri qurılıs dawam etpekte, ele tamamlanbadı“.

17 Eger patshaǵa maqul bolsa, Babiloniyadaǵı hújjetler saqlanatuǵın arxiv tekserilip, patsha Kirdiń Qudaydıń Erusalimdegi Úyin qurıwǵa ruxsat bergeni yamasa bermegeni anıqlansın. Sońınan patsha óz qararın bizlerge jazıp jibersin».