Ezr 6 | KaaIBT22L | STEP | Bunnan soń, patsha Dariydiń buyrıǵı boyınsha, Babiloniyadaǵı hújjetler saqlanatuǵın arxivte izlew isleri alıp barıldı.

‏ Ezra 6

Dariydiń buyrıǵı

1 Bunnan soń, patsha Dariydiń buyrıǵı boyınsha, Babiloniyadaǵı hújjetler saqlanatuǵın arxivte izlew isleri alıp barıldı. 2 Arxiv Midiya wálayatınıń paytaxtı Axmeta qorǵan qalasında bolıp, ol jerden bir orama hújjet tabıldı. Onda bılay dep jazılǵan edi:

«Este saqlaw ushın: 3 patsha Kirdiń húkimdarlıǵınıń birinshi jılında Qudaydıń Erusalimdegi Úyi haqqında Kir mınaday párman shıǵardı: „Qudaydıń Úyi qurbanlıq usınılatuǵın orında, burınǵı tiykarı ústine qayta qurılsın. Onıń biyikligi alpıs shıǵanaq, eni de alpıs shıǵanaq bolsın. 4 Diywalları úsh qatar úlken taslardan hám bir qatar aǵashtan qurılsın. Al ketetuǵın qárejetler bolsa, patsha qaznasınan tólensin. 5 Bunnan tısqarı, Qudaydıń Úyiniń altın hám gúmis ıdısları, yaǵnıy Nabuxodonosordıń Erusalimdegi Ibadatxanadan Babilonǵa alıp kelgen ıdısları da qaytarıp berilsin. Olar Erusalimdegi Ibadatxanaǵa, óz ornına alıp barılıp, Qudaydıń Úyine qoyılsın“».

6 Sonda patsha Dariy mına xattı jolladı:

«Solay etip, dáryanıń arǵı tárepindegi úlkeniń hákimi Tattenay, Shetar-Boznay hám olardıń joldasları, yaǵnıy dáryanıń arǵı tárepinde jasawshı hámeldarlar! Ol jerge jaqınlaspańlar. 7 Qudaydıń Úyindegi islerge aralaspańlar. Yahuda hákimi hám yahudiylerdiń aqsaqalları Qudaydıń Úyin burınǵı ornına qayta tiklesin. 8 Bunnan tısqarı, Qudaydıń Úyiniń qurılısı ushın yahudiy aqsaqallarına járdem retinde neler islewińiz kerekligi tuwralı sizlerge mınalardı buyıraman: bul adamlardıń jumsaytuǵın qárejetleri tolıq patsha qaznasınan tólenetuǵın bolǵanlıqtan, jumıs toqtap qalmawı ushın, dáryanıń arǵı tárepinen jıynalatuǵın salıqlardan tez olarǵa berińler. 9 Erusalimdegi ruwxaniyler talap etken hámme nárse: aspannıń Qudayına arnap jandırılatuǵın qurbanlıqlar ushın tanalar, qoshqarlar, toqlılar, jáne de, biyday, duz, sharap hám záytún mayı hár kúni irkinishsiz berilsin. 10 Solay etip, olar aspannıń Qudayına unaytuǵın qurbanlıqlar bersin, patsha hám onıń ullarınıń ómiri ushın duwa etsin. 11 Taǵı da mınanı buyıraman: eger kim de kim bul pármandı ózgertse, onda sol adamnıń úyinen bir bórene alıp shıǵılıp, sol adam bóreneniń ushına ildirip óltirilsin, al úyi qarabaqanaǵa aylandırılsın. 12 Óz atın sol jerde ornatqan Quday bul pármandı ózgertiwge yamasa Qudaydıń Erusalimdegi Úyin joq qılıwǵa urınǵan hár bir patshanı yaki xalıqtı joq qılsın. Men, Dariy usı buyrıqtı berdim. Buyrıǵım tolıq orınlansın».

Ibadatxananıń baǵıshlanıwı

13 Sonda dáryanıń arǵı tárepindegi úlkeniń hákimi Tattenay, Shetar-Boznay hám olardıń joldasları patsha Dariydiń buyrıǵın tolıq orınladı. 14 Yahudiy aqsaqalları qurılıstı dawam etti hám payǵambarlar Xaggay menen Iddo ulı Zexariyanıń payǵambarshılıq sózlerinen jiger alıp, olardıń isleri tabıslı boldı. Olar Izraildıń Qudayınıń buyrıǵı hám Persiya patshaları Kir, Dariy hám Artakserkstiń pármanı boyınsha Ibadatxananı qurıp pitkerdi. 15 Qudaydıń Úyiniń qurılısı patsha Dariydiń húkimdarlıǵınıń altınshı jılında, adar ayınıń úshinshi kúni tamamlandı.

16 Izraillılar: ruwxaniyler, lebiyliler hám súrginnen qaytqanlardıń hámmesi Qudaydıń Úyiniń baǵıshlanıwın quwanısh penen bayramladı. 17 Olar Qudaydıń Úyiniń baǵıshlanıwına arnap júz tana, eki júz qoshqar hám tórt júz toqlı shaldı, al Izrail urıwlarınıń sanı boyınsha on eki tekeni pútkil Izrail xalqınıń gúnaları ushın gúna qurbanlıǵı retinde qurbanlıqqa berdi. 18 Sońınan Muwsanıń kitabında jazılǵanınday, ruwxaniylerdi toparları hám lebiylilerdi shaqapları boyınsha Erusalimdegi Qudaydıń Ibadatxanasındaǵı xızmetke qoydı.

Qutqarılıw bayramınıń nıshanlanıwı

19 Birinshi aydıń on tórtinshi kúni súrginnen qaytqanlar Qutqarılıw bayramın nıshanladı. 20 Sebebi ruwxaniyler menen lebiyliler ózlerin páklew rásiminen ótkergen bolıp, olardıń hámmesi pák edi. Lebiyliler súrginnen qaytqanlardıń hámmesi ushın, ruwxaniy tuwısqanları ushın hám ózleri ushın Qutqarılıw bayramınıń qurbanlıǵın shaldı. 21 Súrginnen qaytqan Izrail xalqı hám Izraildıń Qudayı Jaratqan Iyege sıyınıw ushın, ózlerin átiraptaǵı xalıqlardıń napákliklerinen saqlaǵan adamlardıń hámmesi qurbanlıq góshinen jedi. 22 Olar jeti kún quwanısh penen Ashıtqısız nan bayramın bayramladı. Sebebi Jaratqan Iye olardı quwanıshqa bólegen edi hám Izraildıń Qudayı bolǵan Qudaydıń Úyiniń qurılısına járdem beriw ushın Assiriya patshasınıń júregin jibitken edi.