Ezr 7 | KaaIBT22L | STEP | Bul waqıyalardan keyin, Persiya patshası Artakserkstiń húkimdarlıǵı dáwirinde Ezra degen bir adam jasadı. Ol Seraya ulı edi, Seraya Azariya ulı, Azariya Xilkiya ulı,

‏ Ezra 7

Ezranıń Erusalimge keliwi

1 Bul waqıyalardan keyin, Persiya patshası Artakserkstiń húkimdarlıǵı dáwirinde Ezra degen bir adam jasadı. Ol Seraya ulı edi, Seraya Azariya ulı, Azariya Xilkiya ulı, 2 Xilkiya Shallum ulı, Shallum Sadoq ulı, Sadoq Axitub ulı, 3 Axitub Amariya ulı, Amariya Azariya ulı, Azariya Merayot ulı, 4 Merayot Zeraxiya ulı, Zeraxiya Uzziy ulı, Uzziy Bukkiy ulı, 5 Bukkiy Abishua ulı, Abishua Pinexas ulı, Pinexas Elazar ulı, al Elazar bas ruwxaniy Xaronnıń ulı edi.

6 Usı Ezra Babiloniyadan Erusalimge keldi. Ezra Izraildıń Qudayı Jaratqan Iyeniń Muwsaǵa bergen Nızamın jetik biletuǵın ulama edi. Qudayı Jaratqan Iyeniń qolı onıń ústinde bolǵanlıǵı sebepli, patsha oǵan soraǵan nársesiniń hámmesin berdi. 7 Patsha Artakserkstiń húkimdarlıǵınıń jetinshi jılı Izrail xalqınan ayırım adamlar, sonday-aq ruwxaniylerden, lebiylilerden, qosıqshılardan, dárwaza qarawıllarınan hám Ibadatxana xızmetshilerinen ayırımları da onıń menen birge Erusalimge qayttı.

8 Ezra Erusalimge kelgende, Artakserkstiń húkimdarlıǵınıń jetinshi jılınıń besinshi ayı edi. 9 Ol birinshi aydıń birinshi kúni Babiloniyadan jolǵa shıǵıp, óz Qudayınıń miyrimli qolı astında besinshi aydıń birinshi kúni Erusalimge jetip keldi. 10 Sebebi Ezra óz ómirin Jaratqan Iyeniń Nızamın úyreniwge, olardı orınlawǵa hám Izrailda qaǵıyda hám nızamlardı úyretiwge baǵıshlaǵan edi.

Patsha Artakserkstiń Ezraǵa bergen xatı

11 Jaratqan Iyeniń buyrıqların hám Onıń Izrailǵa bergen qaǵıydaların jaqsı biletuǵın ulama hám ruwxaniy Ezraǵa patsha Artakserkstiń bergen xatınıń mazmunı mınaday edi:

12 «Patshalar patshası Artakserksten aspannıń Qudayınıń Nızamın jetik biletuǵın ulama, ruwxaniy Ezraǵa sálem!

13 Men mınanı buyıraman: patshalıǵımda jasaytuǵın Izrail xalqınan bolǵan hár bir adamnıń, sonday-aq seniń menen birge Erusalimge ketiwdi qálegen ruwxaniylerdiń hám lebiylilerdiń ketiwine ruxsat beremen. 14 Sen qolıńdaǵı Qudaydıń Nızamına tiykarlanıp, Yahuda menen Erusalimdegi jaǵdaydı úyreniw ushın patsha hám onıń jeti másláhátshisi tárepinen jiberilip atırsań. 15 Erusalimde mákan basqan Izraildıń Qudayına arnap, patsha hám onıń jeti másláhátshisi ıqtıyarlı túrde bergen gúmis hám altınlardı sol jerge jetkereseń. 16 Jáne de, Babilon wálayatınan óziń jıynaytuǵın barlıq gúmis hám altındı, ózleriniń Qudayınıń Erusalimdegi Úyine arnap xalıq hám ruwxaniyler bergen ıqtıyarlı sadaqalardı da alıp keteseń.

17 Bul pullarǵa sen tanalar, qoshqarlar, toqlılar, olardıń ǵálle sadaqaların hám ishimlik sadaqaların satıp al. Olardı Qudayıńnıń Erusalimdegi Úyiniń qurbanlıq ornında qurbanlıqqa ber. 18 Qalǵan gúmis hám altınlardı tuwısqanlarıń menen birge Qudaydıń erkine say qálegenińshe islet. 19 Qudayıńnıń Úyindegi xızmetke qollanıw ushın berilgen ıdıslardı Erusalimniń Qudayına tapsır. 20 Qudayıńnıń Úyi ushın ne nárse talap etilse de, jetkiziwiń kerek bolǵan hár bir nárseni patshanıń qaznasınan alarsań.

21 Endi men, patsha Artakserks dáryanıń arǵı tárepindegi úlkeniń barlıq qaznashılarına buyıraman: aspannıń Qudayınıń Nızamı boyınsha ulama, ruwxaniy Ezranıń sizlerden talap qılǵan nársesiniń hámmesin sózsiz berińler. 22 Oǵan 100 talantqa ^{▼▼ 100 talant – bir talant shama menen 34 kg.} shekem gúmis, 100 korǵa ^{▼▼ 100 kor – bir kor shama menen 220 l.} shekem biyday, 100 batqa ^{▼▼ 100 bat – bir bat shama menen 22 l.} shekem sharap, 100 batqa shekem záytún mayı hám qálegeninshe duz berińler. 23 Aspannıń Qudayı Óz Úyi ushın neni buyırsa, sonı buljıtpay orınlańlar. Onıń ǵázebin meniń hám ullarımnıń patshalıǵına qarsı lawlatıwdıń ne keregi bar? 24 Mınanı da bilip qoyıńlar: ruwxaniylerdiń, lebiylilerdiń, qosıqshılardıń, dárwaza qarawıllarınıń, Úy xızmetshileriniń hám Qudaydıń sol Úyindegi basqa xızmetshilerdiń hesh birinen salǵırt ta, salıq ta, bajı pulı da alınbasın.

25 Saǵan kelsek, Ezra, Qudayıńnıń ózińe bergen danalıǵı menen hákimler hám qazılar tayınla. Olar dáryanıń arǵı tárepindegi seniń Qudayıńnıń nızamların biletuǵın barlıq xalıqtı húkim etsin. Al nızamlardı bilmeytuǵınlarǵa tálim ber. 26 Qudayıńnıń nızamlarına hám patshanıń buyrıqlarına boysınbaǵanlar jazaǵa tartılsın: ólimge húkim etilsin, súrginge jiberilsin, mal-múlki tartıp alınsın yaki sózsiz qamaqqa taslansın».

Ezranıń Qudaydı alǵıslawı

27 Jaratqan Iyeniń Erusalimdegi Úyine húrmet kórsetiw ushın patshanıń júregine usınday qálewdi salǵan ata-babalarımızdıń Qudayı Jaratqan Iyege alǵıslar bolsın! 28 Ol patshada, onıń másláhátshilerinde hám barlıq kúshli basshılarında maǵan degen miyrim oyattı. Qudayım Jaratqan Iyeniń qolı meniń ústimde bolǵanlıqtan jigerlendim hám ózim menen alıp ketiw ushın Izraildıń basshıların topladım.