Ezr 8 | KaaIBT22L | STEP | Artakserkstiń patshalıǵı dáwirinde meniń menen birge Babiloniyadan kelgen urpaq basshıları hám olardıń dizimi mınaday:

‏ Ezra 8

Ezra menen birge Erusalimge qaytıp kelgenlerdiń dizimi

1 Artakserkstiń patshalıǵı dáwirinde meniń menen birge Babiloniyadan kelgen urpaq basshıları hám olardıń dizimi mınaday: 2 Pinexas urpaǵınan Gershom,
Itamar urpaǵınan Daniel,
Dawıttıń násilinen bolǵan 3 Shekaniya urpaǵınan Xattush;
Parosh urpaǵınan Zexariya hám onıń menen bir násilden dizimge alınǵan 150 erkek;
4 Paxat-Moab urpaǵınan Zeraxiya ulı Eliehoenay hám onıń menen birge 200 erkek;
5 Zattu urpaǵınan Yaxaziel ulı Shekaniya hám onıń menen birge 300 erkek;
6 Adin urpaǵınan Ionatan ulı Ebed hám onıń menen birge 50 erkek;
7 Elam urpaǵınan Ataliya ulı Eshaya hám onıń menen birge 70 erkek;
8 Shefatiya urpaǵınan Mixail ulı Zebadiya hám onıń menen birge 80 erkek;
9 Ioab urpaǵınan Exiel ulı Obadiya hám onıń menen birge 218 erkek;
10 Baniy urpaǵınan Iosifiyanıń ulı Shelomit hám onıń menen birge 160 erkek;
11 Bebay urpaǵınan Bebay ulı Zexariya hám onıń menen birge 28 erkek;
12 Azgad urpaǵınan Haqqatan ulı Yuxanan hám onıń menen birge 110 erkek;
13 Adoniqamnıń Elifelet, Eiel, Shemaya degen eń sońǵı ulları hám olar menen birge 60 erkek;
14 Bigway urpaǵınan Utay, Zakkur hám olar menen birge 70 erkek.

Erusalimge qaytıw

15 Men olardı Ahawaǵa qaray aǵıp turǵan ózektiń boyına topladım. Bizler sol jerde úsh kún turdıq. Men xalıq hám ruwxaniyler arasınan lebiylilerdi izledim, biraq Lebiy urpaǵınan hesh kimdi taba almadım. 16 Sonlıqtan basshılardan Eliezerdi, Arieldi, Shemayanı, Elnatandı, Yaribti, Elnatandı, Natandı, Zexariyanı, Meshullamdı hám alımlardan Ioyarib penen Elnatandı shaqırttım. 17 Olardı Kasifiya degen jerdiń basshısı Iddo degen adamǵa jiberdim. Olardıń Qudaydıń Úyinde xızmet etetuǵın adamlardı jiberiwi ushın, Iddoǵa hám Kasifiya degen jerdegi Ibadatxana xızmetshileri bolǵan tuwısqanlarına nelerdi aytıwı kerekligin úyrettim. 18 Qudayımızdıń miyrimli qolı bizlerdiń ústimizde bolǵanlıǵı sebepli, olar Izraildıń ulı Lebiydiń násilinen, Maxliydiń urpaǵınan Sherebiya degen dana bir adamdı jiberdi. Ol ózi menen birge ulları hám tuwısqanlarınan 18 adamdı ákeldi. 19 Sonday-aq, Xashabiyanı, Merariy urpaǵınan Eshayanı hám tuwısqanları menen olardıń ullarınan 20 adamdı, 20 lebiylilerge járdemlesiw ushın Dawıt hám onıń xızmetshileri qoyǵan Ibadatxana xızmetshilerinen 220 adamdı alıp keldi. Olardıń hámmesi atpa-at dizimge alınǵan.

21 Sonda Qudayımızǵa boysınıw, Onnan ózlerimiz, balalarımız hám pútkil dúnya malımız ushın, haq jol soraw ushın Ahawa ózeginiń boyında oraza járiya ettim. 22 Bizler patshaǵa: «Qudayımız Ózin izlegenlerdiń hámmesiniń ústine miyrimli qolın qoyadı, al Ózinen júz burǵanlarǵa kúshli ǵázebin shashadı», – degen edik. Sonlıqtan jolda bizlerdi dushpannan qorǵaw ushın áskerler hám atlılar sorawǵa uyaldım. 23 Solay etip, bizler oraza tutıp, Qudayımızǵa jolımız ushın jalbarındıq, Ol da duwamızdı qabıl etti.

Ibadatxana ushın sawǵalar

24 Sońınan basshı ruwxaniyler arasınan on ekisin: Sherebiyanı, Xashabiyanı hám olardıń tuwısqanlarınan onın tańlap aldım. 25 Keyin patshanıń, onıń másláhátshileriniń, basshılarınıń hám sol jerdegi pútkil izraillılardıń Qudayımızdıń Úyi ushın bergen barlıq sadaqaların: gúmisti, altındı hám ıdıslardı tárezige tartıp, olarǵa berdim. 26 Men olarǵa bergen zatlardıń ólshemi mınaday edi: 650 talant gúmis, 100 talantlıq gúmis ıdıslar, 100 talant altın. 27 Narqı 1000 darik bolǵan 20 altın tostaǵan, altınday qunlı, jıltır mıstan islengen eki ıdıs. 28 Men olarǵa bılay dedim: «Sizler – Jaratqan Iyeniń muxaddesisizler, ıdıslar da muxaddes. Gúmis hám altın – sizlerdiń ata-babalarıńızdıń Qudayı Jaratqan Iyege berilgen ıqtıyarlı sadaqalar. 29 Ruwxaniylerdiń basshıları, lebiyliler hám izraillılardıń urpaq basshıları aldında ólshep, Jaratqan Iyeniń Erusalimdegi Úyiniń qaznasına tapsırǵanıńızsha sergek bolıp, olardı saqlańlar». 30 Solay etip, ruwxaniyler hám lebiyliler Erusalimge, Qudayımızdıń Úyine alıp barıw ushın, tárezige tartılǵan gúmisti, altındı hám ıdıslardı qabıl etip aldı.

31 Bizler birinshi aydıń on ekinshi kúni Erusalimge barıw ushın Ahawa ózegi boyınan jolǵa shıqtıq. Qudayımızdıń qolı bizlerdiń ústimizde bolıp, jolımızda Ol bizlerdi dushpanlardıń hújiminen hám qaraqshılardan qorǵadı. 32 Solay etip, bizler Erusalimge jetip kelip, ol jerde úsh kún dem aldıq.

33 Tórtinshi kúni Qudayımızdıń Úyine barıp, gúmisti, altındı hám ıdıslardı tárezige tartıp, Uriya ulı ruwxaniy Meremotqa tapsırdıq. Pinexas ulı Elazar onıń qasında boldı. Lebiyli Eshua ulı Iozabad hám Binnuy ulı Noadiya da olar menen birge edi. 34 Hár bir nárse sanaldı hám tárezige tartıldı. Ólshengen zatlardıń hámmesi sol waqıtta jazıp qoyıldı.

35 Tutqınnan kelgenler, yaǵnıy súrginnen qaytıp kelgenler Izraildıń Qudayına arnap, jandırılatuǵın qurbanlıqlar berdi. Olar pútkil izraillılar ushın on eki buǵa, toqsan altı qoshqar, jetpis jeti toqlı shaldı. Al gúna qurbanlıǵı ushın on eki tekeni qurbanlıqqa shaldı. Bulardıń hámmesi Jaratqan Iyege usınılǵan jandırılatuǵın qurbanlıqlar edi. 36 Súrginnen qaytqanlar patshanıń buyrıqların patshanıń nayıplarına ^{▼▼ Nayıplar – Persiya imperiyasında joqarı lawazımdı iyelegen basshılar. Olar birikken bir neshe wálayatlardı basqaratuǵın edi.} hám dáryanıń arǵı tárepindegi wálayatlarınıń hákimlerine berdi. Olar da Izrail xalqın hám Qudaydıń Úyin qollap quwatlaytuǵın boldı.