Ezr 9 | KaaIBT22L | STEP | Bul waqıyalardan keyin, basshılar aldıma kelip bılay dedi: «Izrail xalqı, hátte, ruwxaniyler menen lebiyliler de aynalamızdaǵı xalıqlardıń: qanan, xet, periz, ebus, ammon, moab, amor xalıqlarınıń hám mısırlılardıń jerkenishli nárselerinen ele arılmadı.

‏ Ezra 9

Ezranıń duwası

1 Bul waqıyalardan keyin, basshılar aldıma kelip bılay dedi: «Izrail xalqı, hátte, ruwxaniyler menen lebiyliler de aynalamızdaǵı xalıqlardıń: qanan, xet, periz, ebus, ammon, moab, amor xalıqlarınıń hám mısırlılardıń jerkenishli nárselerinen ele arılmadı. 2 Sebebi ózleri de, ulları da usı xalıqlardıń qızlarına úylengen. Usılayınsha muxaddes tuqım átiraptaǵı xalıqlar menen aralasıp ketken. Basshılar hám xızmetker adamlar bul opasızlıqqa bas boldı».

3 Men bul gáplerdi esitkenimde, kóylek-shapanımdı jırtıp, shash-saqalımdı julıp, qattı qapa bolıp jerge otırıp qaldım. 4 Sonda súrginnen qaytqanlardıń opasızlıǵına baylanıslı, Izraildıń Qudayınıń sózlerinen qorqqanlardıń hámmesi meniń janıma toplandı. Men bolsam, keshki qurbanlıq waqtına shekem qayǵıǵa batıp otırdım. 5 Al keshki qurbanlıq waqtında qayǵıǵa batıp, kóylek-shapanım jırtılǵan halda otırǵan ornımnan turdım. Dizerlep otırıp qollarımdı jayıp, Qudayım Jaratqan Iyege 6 bılay dedim: «Qudayım! Basımdı kóterip Saǵan qarawǵa uyalıp hám qısınıp turman. Sebebi gúnamız basımızdan asıp, ayıbımız aspanǵa jetken. 7 Ata-babalarımızdıń zamanınan baslap usı kúnge shekem ayıpqa kómilip qalǵanbız. Gúnamız sebepli bizler ózlerimiz, patshalarımız, ruwxaniylerimiz basqa ellerdiń patshalarınıń qolına tapsırıldıq, óltirildik, tutqınǵa alındıq, talandıq hám búgingidey shermende boldıq. 8 Biraq búgin Qudayımız Jaratqan Iye! Sen bizlerge qısqa waqıtqa miyrim kórsetip, ayırımlarımızdı tiri qaldırdıń. Qullıqta bolǵanımızda kózimizge nur beriw hám az ǵana bolsa da, eńsemizdi kóteriw ushın, Ózińniń muxaddes ornıńnan mákan jay berdiń.

9 Sebebi bizler qullar edik. Biraq Qudayımız, Sen bizlerdi qullıqqa taslap qoymadıń. Sen Persiya patshalarınıń júreginde bizlerge degen miyrim oyattıń. Ózińniń Úyińdi qurıwımız hám qarabaqanaǵa aylanǵan Úydi qayta tiklewimiz ushın jańa ómir berdiń. Jáne de, Erusalimde hám Yahudada bizlerge qorǵanıw diywalın berdiń.

10 Al endi, Qudayımız, bunnan keyin ne dey alamız? Óytkeni Seniń buyrıqlarıńnan júz burdıq. 11 Sen Óz qullarıń payǵambarlar arqalı mınaday buyrıq bergen ediń: „Sizler iyelik etiw ushın kirip atırǵan jer – haram jer. Ol sol jerde jasap atırǵan xalıqlardıń haramlıqları hám jerkenishli dástúrleri menen haramlanǵan. Olar eldi bastan ayaǵına óz napákligine toltırǵan. 12 Sonlıqtan olar menen qız berisip, qız alıspańlar. Hesh qashan olardıń tınıshlıǵı hám iygiligi ushın háreket etpeńler. Sonda kúshli bolasız, bul jerdiń óniminen jep, olardı óz balalarıńızǵa máńgige miyras etip beresiz“. 13 Basımızǵa túskenlerdiń hámmesi ózlerimizdiń jaman islerimiz hám úlken ayıbımız sebepli boldı. Biraq Sen, Qudayımız, bizlerdi islegen isimizge qaraǵanda jeńil jazaladıń hám ayırımlarımızdı tiri qaldırdıń. 14 Endi qalayınsha jáne Seniń buyrıqlarıńdı buzıp, usınday jerkenishli islerdi islep atırǵan xalıqlar menen quda-tamır bola alamız? Eger solay islesek, onda Sen bizlerge ǵázeplenip, birde birewimizdi tiri qaldırmay, qırıp taslamaysań ba? 15 Izraildıń Qudayı Jaratqan Iye! Sen ádilseń. Búgingi kúnge kelip bizler aman qaldıq. Seniń aldıńda turıwǵa haqımız bolmasa da, mine, bizler óz ayıplarımızdı arqalap, Seniń aldıńda turmız».