‏ Galatians 1

Sálemnama

1– 2Adamlar tárepinen yamasa adamlar arqalı emes, al Iysa Masiyx hám Onı ólimnen tiriltken Ákemiz Quday tárepinen elshi bolıp tayınlanǵan men, Pavelden hám meniń menen birge bolǵan barlıq tuwısqanlardan, Galatiyadaǵı iseniwshi jámáátlerge sálem!

3Ákemiz Quday hám Iyemiz Iysa Masiyx sizlerge miyrim hám tınıshlıq bersin! 4Ákemiz Qudaydıń erki boyınsha, Iysa Masiyx bizlerdi házirgi jawız zamannan qutqarmaqshı bolıp, gúnalarımız ushın Ózin qurban etti. 5Qudayımızǵa máńgi-baqıy dańq bolsın! Awmiyin.

Xosh Xabar jalǵız

6Sizlerdi Masiyxtıń miyrimi arqalı shaqırǵan Qudaydan sonshelli tez júz burıp, basqa bir «xosh xabar» ǵa awıp ketkenińizge hayranman. 7Negizinde basqa bir «xosh xabar» joq. Al, sizlerdiń aqılıńızdı shatastırıp, Masiyxtıń Xosh Xabarın burmalamaqshı bolıp atırǵanlar ǵana bar.

8Biraq eger de bizler ózlerimiz kelip, yamasa aspannan bir perishte kelip, ózlerimiz sizlerge aytqan Xosh Xabarǵa qarsı «xosh xabar» járiyalap atırǵan bolsa, ol Qudaydıń ǵarǵısına ushırasın! 9Burın aytqanımızdı jáne qaytalap aytaman: eger kim de kim sizler qabıl etken Xosh Xabarǵa qarsı bir «xosh xabar» dı járiyalap atırǵan bolsa, ol Qudaydıń ǵarǵısına ushırasın!

10Endi men adamlardıń maqtawın qálep atırman ba yamasa Qudaydıń ba? Ya bolmasa, adamlarǵa jaǵınıwǵa tırısıp atırman ba? Eger elege deyin adamlarǵa jaǵınbaqshı bolǵanımda, onda men Masiyxtıń xızmetshisi bola almas edim.

Pavel qalay Masiyxtıń elshisi boldı

11Tuwısqanlarım, men járiyalaǵan Xosh Xabardı adam oylap shıǵarmaǵanın biliwińizdi qáleymen. 12Men bul Xosh Xabardı adamnan qabıl etpedim hám hesh kimnen úyrenbedim. Onı maǵan Iysa Masiyxtıń Ózi ayan arqalı bildirdi.

13Men yahudiy dininde bolǵanımda, qalay ómir súrgenim haqqında esitkensizler. Qudaydıń jámáátin ayawsız quwdalap, onı qurtıwǵa tırısatuǵın edim. 14Yahudiy dininde óz milletimdegi kóp qatar-qurbılarımnan ozıp, ata-babalarımızdıń úrp-ádetlerin orınlawǵa jan-tánim menen ǵayrat salatuǵın edim.

15– 16Biraq meni anamnıń qarnında bolǵanımda-aq tańlap, Óz miyrimi menen shaqırǵan Quday basqa milletler arasında Xosh Xabardı járiyalawım ushın, maǵan Ulın ashıp bildiriwge ırazı boldı. Sonda men adamlar menen másláhátlesip otırmadım. 17Erusalimge, yaǵnıy mennen burın elshi bolǵanlarǵa da barmadım. Al dárhal Arabstanǵa ketip, keyin jáne Damaskke qaytıp keldim. 18Úsh jıldan keyin Kifa ▼

▼ Kifa – yaǵnıy Petr.

menen tanısıw ushın Erusalimge bardım. Onıń janında on bes kún boldım. 19Biraq, basqa elshilerdiń hesh birin kórmedim, tek Iyemizdiń inisi Yaqıptı ǵana kórdim. 20Sizlerge jazıp atırǵanlarımnıń ótirik emes ekenligin Qudaydıń aldında bildirip atırman. 21Bunnan soń, men Siriya hám Kilikiya úlkelerine kettim. 22Al Yahudiyadaǵı Masiyxqa tiyisli jámáátler meni júzbe-júz tanımaytuǵın edi. 23Olar tek: «Bir waqıtları bizlerdi quwdalaǵan adam burın ózi joq qılmaqshı bolǵan isenim haqqında endi ózi járiyalap júr», – degendi esitip, 24men ushın Qudaydı alǵıslaǵan edi.