Gal 2 | KaaIBT22L | STEP | Aradan on tórt jıl ótkennen soń, Barnaba menen birge jáne Erusalimge bardım. Janıma Titustı da aldım.

‏ Galatians 2

Basqa elshilerdiń Paveldi qabıl etiwi

1 Aradan on tórt jıl ótkennen soń, Barnaba menen birge jáne Erusalimge bardım. Janıma Titustı da aldım. 2 Ol jerge Qudaydan alǵan ayanım sebepli bardım. Sol jerdegi jámáát jetekshileri menen jeke sóylesip, basqa milletler arasında ózim járiyalap júrgen Xosh Xabardı bayan ettim. Islegen miynetim hám házir islep atırǵan is-háreketimniń zaya ketpewi ushın usılay isledim. 3 Al olar meniń janımdaǵı Titustıń grek bolıwına qaramay, onı súnnet etiliwge májbúrlemedi.

4 Biraq aramızǵa jasırın kirgen ayırım jalǵan tuwısqanlar bar edi. Olar bizlerge Iysa Masiyx bergen azatlıqtı kóre almay, bizlerdi Nızamdaǵı qaǵıydalarǵa qul qılmaqshı edi. 5 Al bizler Xosh Xabardıń haqıyqatı sizler menen bárqulla birge bolsın dep, olarǵa bir dem de boysınıp, táslim bolmadıq.

6 Erusalim jámáátiniń jetekshileri qanshelli ataqlı bolsa da, men ushın bári bir: Quday adamlardı ayırmaydı. Olar meniń járiyalaw isime qosımsha hesh nárse júklemedi. 7 Kerisinshe, Xosh Xabardı yahudiylerge járiyalaw isi Petrge isenip tapsırılǵanday, basqa milletlerge járiyalaw isi maǵan isenip tapsırılǵanın olar bildi. 8 Sebebi Petrdi yahudiyler ushın elshi etip tayınlaǵan Quday meni de basqa milletler ushın elshi etip tayınladı. 9 Iseniwshiler jámáátiniń tirekleri esaplanǵan Yaqıp, Kifa hám Yuxan Qudaydıń maǵan bergen miyrimin moyınlap, maǵan hám Barnabaǵa birdemlik qolların sozdı. Solay etip, bizlerdiń basqa milletlerge, al ózleriniń yahudiylerge ketiwin maqul kórdi. 10 Tek ele de jarlılarǵa járdem beriwdi esten shıǵarmawımızdı ótinish etti. Men de bul isti shın kewilden islewge tırısıp kiyatırǵan edim.

Paveldiń Petrdi áshkaralawı

11 Kifa Antioxiyaǵa kelgende, onıń qátesin betine aytıp áshkara ettim. 12 Óytkeni Yaqıptıń janınan bazı adamlar kelmesten aldın Kifa basqa millet iseniwshileri menen birge awqat jeytuǵın edi. Biraq sol yahudiyler kelgende qorqıp, súnnet etilmegen basqa millet iseniwshilerinen ózin shetke aldı hám olar menen baylanıstı úzdi. 13 Basqa yahudiyler de Kifaǵa uqsap eki júzlilik isledi. Hátte, Barnaba da olardıń eki júzliligine berildi.

14 Olardıń Xosh Xabardıń haqıyqatı boyınsha is tutpay atırǵanın kórgenimde, hámmeniń aldında Kifaǵa bılay dedim: «Sen yahudiy bola tura, yahudiy sıyaqlı emes, al basqa millet adamı sıyaqlı jasap atırsań. Endi qalayınsha sen basqa millet adamların yahudiylesiwge májbúrleyseń? 15 Bizler yahudiy bolıp tuwıldıq, basqa milletler sıyaqlı gúnakar ^{▼▼ Gúnakar – yahudiylerdiń oyı boyınsha, Muxaddes Nızamsız jasaytuǵın basqa millet adamları gúnakar bolıp esaplanatuǵın edi.} emespiz. 16 Biraq ta, adam Muxaddes Nızamdı orınlap jasaǵanı arqalı emes, al Iysa Masiyxqa degen isenimi arqalı aqlanatuǵının bilemiz. Sonlıqtan bizler de Muxaddes Nızamdı orınlap jasaǵanımız arqalı emes, al Masiyxqa degen isenimimiz benen aqlanamız dep, Iysa Masiyxqa isendik. Sebebi hesh bir adam Muxaddes Nızamdı orınlap jasaǵanı arqalı aqlanbaydı».

17 Eger Masiyx arqalı aqlanıwdı izlep, ózlerimiz gúnakar bolıp shıqsaq, Masiyx bizlerdi gúnaǵa jetelewshi bolǵanı ma? Hesh qashan! 18 Eger men ózim keshken nárseni qaytadan qabıl qılsam, onda men ózimniń nızam buzıwshı ekenimdi dálillegen bolaman. 19 Quday aldında jasaw ushın, Muxaddes Nızam arqalı men Muxaddes Nızam aldında ólgenmen. 20 Men Masiyx penen birge atanaq aǵashqa shegelengenmen. Endi jasap atırǵan men emes, al mende Masiyx jasap atır. Házir denede jasap atırǵan ómirimde meni súygen hám men ushın Ózin qurban etken Qudaydıń Ulına degen isenimim menen jasap atırman. 21 Men Qudaydıń miyrimin qádirsiz dep esaplamayman. Eger de Muxaddes Nızam arqalı aqlanıw múmkin bolǵanda, onda Masiyx biykarǵa ólgen bolar edi.