Gal 4 | KaaIBT22L | STEP | Jáne aytajaǵım mınaw: miyrasxor hámme nárseniń iyesi bolsa da, bala waqtında onıń quldan ayırmashılıǵı joq.

‏ Galatians 4

1 Jáne aytajaǵım mınaw: miyrasxor hámme nárseniń iyesi bolsa da, bala waqtında onıń quldan ayırmashılıǵı joq. 2 Ol ákesiniń belgilegen waqtına deyin tárbiyashılar menen úy basqarıwshısınıń baqlawı astında boladı.

3 Usı sıyaqlı, bizler de balalıq waqtımızda, yaǵnıy haqıyqatlıqtı tolıq túsinbegen waqtımızda dúnyanıń mánissiz qaǵıydalarınıń qulı edik. 4 – 5 Biraq waqtı kelgende, Quday Óz Ulın jiberdi. Ol Muxaddes Nızamnıń qulı bolǵanlardıń qutqarılıwı ushın hám bizlerdiń Qudaydıń balaları bolıwımız ushın hayaldan tuwılıp, Muxaddes Nızamǵa boysınıp jasadı. 6 Sizler endi Qudaydıń balaları boldıńlar. Sonlıqtan Ol Óz Ulınıń Ruwxın júreklerińizge jiberdi. Usı Ruwx arqalı sizler Qudaydı: «Áke, Ákejanım!» dep shaqırıwıńızǵa boladı. 7 Sol sebepten sen endi qul emesseń, al Qudaydıń perzentiseń. Qudaydıń perzenti bolǵanıń ushın, Quday seni miyrasxor etti.

Paveldiń galatiyalılar ushın táshiwishleniwi

8 Burın sizler Qudaydı bilmey, negizi Quday bolmaǵan nárselerge qul boldıńlar. 9 Endi bolsa, Qudaydı bilip aldıńlar, tuwrıraǵı, sizlerdi Quday tanıydı. Solay eken, nege endi jáne dúnyanıń hálsiz hám qádirsiz qaǵıydalarına qaytıp baratırsızlar. Qaytadan jáne olardıń qulları bolmaqshımısızlar? 10 Kúnler, aylar, máwsimler hám jıllardı belgileysizler. 11 Sizler ushın biykarǵa miynet ettim be eken, degen táshiwishtemen.

12 Tuwısqanlarım! Sizlerden ótinish etemen, men sıyaqlı bolıńlar. Sebebi men de sizler sıyaqlı boldım. Sizler maǵan hesh qanday jamanlıq islemedińler. 13 Xosh Xabardı sizlerge birinshi márte densawlıǵımnıń hálsizligi sebepli járiyalaǵanımnan xabarıńız bar. 14 Meniń densawlıǵımnıń jaǵdayı sizler ushın bir sınaq bolsa da, meni pás kórip, ayırıp taslamadıńız. Kerisinshe, meni Qudaydıń bir perishtesindey, hátte, Iysa Masiyxtay qabıl ettińler. 15 Endi sol quwanıshıńız qayaqta?! Sizlerge ózim gúwaman: qollarıńızdan kelse, kózlerińizdi oyıp, maǵan berer edińler. 16 Endi sizlerge haqıyqattı aytaman dep, dushpanıńız boldım ba?

17 Muxaddes Nızamdı orınlawdı talap etkenler sizlerdi óz tárepine awdarıwǵa tırısıp atır, biraq bul jaqsı niyet emes. Ózlerine baǵındırıw ushın, olar sizlerdi bizlerden ayırmaqshı. 18 Jaqsı niyet penen tırısıw – bul jaqsı nárse. Bul tek men sizlerdiń arańızda bolǵanımda emes, al bárqulla usılay bolsa jaqsı. 19 Balalarım! Masiyx sıyaqlı bolmaǵanıńızsha, men sizlerdi qaytadan tuwıp atırǵanday, tolǵaq azabın shekpektemen. 20 Házir janıńızda bolıp, dawısımdı múláyim qılıp ózgertsem edi. Óytkeni sizlerdi ne qılarımdı bilmey, ań-tań bolıp turman.

Ajar hám Sara mısalı

21 Muxaddes Nızam astında jasawdı qálegen sizler maǵan aytıńlarshı, Muxaddes Nızamnıń ne deytuǵının bilmeysizler me? 22 Sebebi Ibrayımnıń eki ulı boldı: birewi shorı hayaldan, ekinshisi azat hayalınan edi, dep jazılǵan ^{▼▼ Jar 21:1-12.}. 23 Shorı hayaldan bolǵan ulı ápiwayı jol boyınsha, al azat hayaldan bolǵan ulı wáde boyınsha tuwıldı.

24 Bunda tımsal mánisi bar. Bul eki hayal eki kelisimdi ańlatadı. Birewi qullıqta bolatuǵın balalardı tuwatuǵın Ajar – Sinay tawında dúzilgen kelisimniń tımsalı. 25 Arabstandaǵı Sinay tawınıń tımsalı bolǵan Ajar házirgi Erusalimdi ańlatadı. Óytkeni bul qala óz xalqı menen ele de Muxaddes Nızamnıń qullıǵında. 26 Biraq, aspandaǵı Erusalimniń tımsalı bolǵan Sara azat, ol bizlerdiń anamız. 27 Sebebi bılay dep jazılǵan: «Shadlan, háy, bala kórmegen násilsiz hayal!
Tolǵatıp kórmegen, sen, shadlanıp baqır!
Sebebi taslap ketilgen hayaldıń balaları,
Kúyewi bar hayaldikinen kóp boladı». ^{▼▼ Iysh 54:1.}

28 Tuwısqanlar! Sizler de Ísaq sıyaqlı wáde boyınsha tuwılǵan balalarsız. 29 Tábiyǵıy jol menen tuwılǵan Muxaddes Ruwxtıń wádesi boyınsha tuwılǵandı qalay quwdalaǵan bolsa, házir de solay bolıp atır.

30 Biraq, Muxaddes Jazıw ne deydi?

«Shorını balası menen birge quwıp jiber. Sebebi shorınıń ulı azat hayaldıń ulı menen teńdey miyrasxor bolmasın». ^{▼▼ Jar 21:10.}

31 Solay etip, tuwısqanlar, bizler shorı hayaldıń emes, al azat hayaldıń balalarımız.