Gal 5 | KaaIBT22L | STEP | Masiyx bizlerdi erkin ómir súriwimiz ushın azat qıldı. Sonlıqtan bekkem turıńlar, ózlerińizge qaytadan qullıq moyıntırıǵın salıwǵa jol qoymańlar.

‏ Galatians 5

Azatlıǵıńızdı saqlańlar!

1 Masiyx bizlerdi erkin ómir súriwimiz ushın azat qıldı. Sonlıqtan bekkem turıńlar, ózlerińizge qaytadan qullıq moyıntırıǵın salıwǵa jol qoymańlar.

2 Qarańlar! Men, Pavel, sizlerge mınalardı aytıp atırman: eger súnnet etilseńiz, Masiyxtıń sizlerge hesh paydası joq. 3 Súnnet etilgen hár bir adamdı jáne eskertip atırman: ol pútkil Muxaddes Nızamdı orınlawǵa parızlı. 4 Muxaddes Nızamdı orınlaw arqalı aqlanıwǵa tırısıp atırǵan sizler Masiyxtan ayırıldıńlar. Qudaydıń miyriminen alısladıńlar.

5 Biraq bizler Muxaddes Ruwx sebepli isenim arqalı aqlanıwdan úmit etip, intizarlıq penen kútpektemiz. 6 Iysa Masiyxqa isenetuǵınlar ushın súnnetleniwdiń de, súnnetlenbewdiń de hesh qanday áhmiyeti joq. Tek súyispenshilik penen háreket etken isenim ǵana áhmiyetli.

7 Sizler jaqsı baratır edińler. Haqıyqatqa boysınıwdı dawam etiwden sizlerdi kim aynıttı? 8 Bunday aynıtıw sizlerdi shaqırǵan Quday tárepinen bolmadı. 9 Az ǵana ashıtqı pútkil qamırdı ashıtadı. 10 Sizlerdiń basqasha pikir júrgizbeytuǵınıńızǵa Iyem Iysa aldında isenimim kámil. Biraq, sizlerdiń aqılıńızdı shatastırǵan kim bolıwına qaramay, jazasın tartadı.

11 Maǵan keletuǵın bolsaq, tuwısqanlarım, eger elege deyin súnnettiń kerek ekenligin járiyalap kelgenimde, quwdalanar ma edim? Eger olay bolǵanda, atanaq aǵash haqqında aytqan wazlarım sebepli mashqala tuwılmas edi. 12 Qáne endi, sizlerdi úgitlep atırǵanlardıń hámmesi ózlerin aqta etse ^{▼▼ Aqta etiw – pishtiriw.}!

13 Tuwısqanlar! Quday sizlerdi azat bolıwǵa shaqırǵan. Biraq bul azatlıǵıńızdı óz tábiyatıńızdıń qálewleriniń qurbanı qılmań. Onıń ornına bir-birińizge súyispenshilik penen xızmet etińler. 14 Pútkil Muxaddes Nızam bir sózde jámlengen: «Ózińdi súygeniń sıyaqlı, janıńdaǵı adamdı da súy». ^{▼▼ Leb 19:18.} 15 Biraq bir-birińiz benen tislesip, bir-birińizdi jeseńler, onda bir-birińizdi joq etiwden abaylı bolıńlar!

Adam tábiyatı hám Muxaddes Ruwx

16 Jáne aytajaǵım mınaw: Muxaddes Ruwxqa boysınıp jasańlar! Sonda óz tábiyatıńızdıń jaman qálewlerine hesh qashan boysınbaysızlar. 17 Óytkeni adam tábiyatınıń jaman qálewleri Muxaddes Ruwxqa, al Muxaddes Ruwx bolsa adam tábiyatınıń jaman qálewlerine qarsı. Olar bir-birine qarsı bolǵanlıqtan, sizler islewdi qálegen nárselerińizdi isley almaysızlar. 18 Al eger sizler Muxaddes Ruwxtıń jetelewi menen júrseńler, onda Muxaddes Nızam astında emessizler.

19 Adamnıń gúnakar tábiyatınıń isleri ayan, olar: neke hadallıǵın buzıw, haramılıq, buzıqshılıq, 20 butparazlıq, sıyqırshılıq, dushpanlıq, jánjelkeshlik, kúnshillik, ǵázep, menmenlik, alawızlıq tuwdırıw, bóliniw, 21 qızǵanshaqlıq ^{▼▼ Bazı qoljazbalarda «adam óltiriw» degen sózler de bar.}, máskúnemshilik, ayshı-áshiret hám usılarǵa uqsaǵan nárseler. Sizlerdi aldın eskertkenimdey, jáne eskertip atırman: usınday is-háreketlerdi islewshiler Qudaydıń Patshalıǵın miyras etip almaydı.

22 Biraq, adam ómirinde jetistiretuǵın Muxaddes Ruwxtıń jemisi – súyispenshilik, quwanısh, tınıshlıq, sabırlılıq, miyrimlilik, qayırqomlıq, sadıqlıq, 23 múláyimlilik hám ózin tutıp biliw. Bunday islerge qarsı hesh qanday nızam joq.

24 Iysa Masiyxqa tiyisli bolǵanlar óz tábiyatın qálewleri hám nápsileri menen birlikte atanaq aǵashqa shegelep qoyǵan. 25 Muxaddes Ruwx ómirimizdiń tiykarı bolǵanlıqtan, Onıń jetelewi menen júreyik. 26 Dańqparaz bolmayıq, bir-birimizdiń ashıwımızǵa tiyip, kúnshillik etpeyik.